اقتوبە قالاسىنىڭ تۇرعىنى پەرزەنتحاناعا اسىققان ايەلىن ءۇيىنىڭ كىرە بەرىسىندەگى باسپالداقتا بوساندىرىپ العان. كىندىك ءسابيدىڭ موينىنا ورالىپ قالعان ەكەن، الايدا كۇيەۋى ەش ساسپاستان بالانىڭ ءومىرىن امان الىپ قالعان. بۇل تۋرالى «دياپازون» جازدى.

ايان ۇلاننىڭ ايتۋىنشا، ايەلىنىڭ تولعاعى تۇندە قىسقان. تاكسي شاقىرتىپ، كەرەك زاتتاردىڭ ءبارىن الىپ پەرزەنتحاناعا بارماق بولادى، الايدا ءسابيى كۇتكىسى كەلمەگەن سەكىلدى. ايەل ۇيدەن شىعىپ بارا جاتقان كەزدە بوساندى.

«ءبارى باسپالداقتان ءتۇسىپ كەلە جاتقان كەزدە باستالدى. سۇلۋىمدى كورپەگە جاتقىزدىم، ول قاتتى ساسقالاقتادى. سابىر ساقتاۋىن ءوتىنىپ، «دەمال! كۇشەن!» دەپ قايتالاي بەردىم. ءۇشىنشى رەت كۇشەنگەنىندە بوساندى. ءبىراق بالا جىلامادى. سويتسەم، كىندىك ءسابيىمنىڭ موينىنا وراتىلىپ قالعان ەكەن. ونى شەشىپ ەدىم، بىردەن جىلادى. ساسقانىمنان 101-گە، ءورت ءسوندىرۋ قىزمەتىنە حابارلاسىپ جىبەرىپپىن. كەيىن جەدەل-جاردەمگە حابارلاستىم. ولار ەكى مينۋتتان كەيىن-اق كەلدى. شىنى كەرەك، وتە قورقىنىشتى بولدى، ءبىراق سىر بەرمەۋگە تىرىستىم»، - دەيدى ايان ۇلان.

جەدەل-جاردەم كەلىپ، انا مەن بالانى اۋرۋحاناعا الىپ كەتەدى. ال ءقازىر ەكەۋى دە ۇيىندە. قىرقىنان شىعارماعاندىقتان، ءسابيدىڭ ەسىمىن اتا-اناسى جاسىرىن ۇستادى.