ۇلتتىق ۇلاننىڭ استانالىق قۇراماسىندا ەلىمىزدىڭ 14 وبلىسىنان شاقىرىلعان 800-گە جۋىق جاۋىنگەر انت قابىلدادى. 2018 جىلعى 7-شىلدەدە باس قالا ىرگەسىندەگى اسكەري قالاشىق اۋماعىندا جاس وتان قورعاۋشىلار ەلى مەن حالقىنا ادال قىزمەت ەتۋگە سەرت بەردى.
ساپ تۇزەگەن ساربازدارمەن قاتار، ولاردى قولداۋعا كەلگەن جۇرتشىلىق تا قوسىلىپ مەملەكەتتىك ءانۇراندى شىرقادى. ۇلتتىق ۇلان باس قولباسشىسىنىڭ ورىنباسارى گەنەرال-مايور مۇقامەتقالي ساتوۆ، اسكەر ارداگەرلەرى قالياقپار توقىشيەۆ پەن داۋلەت سالحانوۆ، 5573 اسكەري ءبولىمىنىڭ كومانديرى پولكوۆنيك ساكەنتاي شەكاربەكوۆ جاۋىنگەرلەردى وتان قورعاۋشىلار قاتارىنا قوسىلۋىمەن قۇتتىقتادى.
- بۇگىننەن باستاپ سىزدەر – ەل تىنىشتىعىنىڭ سەنىمدى قورعانىسىزدار! قاي مەملەكەتتىڭ بولماسىن، دامۋى جولىندا ونىڭ ىشكى تىنىشتىعىنىڭ ماڭىزى وتە زور. سول سەبەپتى، ءقازىر عانا وسى الاڭدا قابىلداعان انتتىڭ ءاربىر سوزىنە ادال بوپ، تاۋەلسىزدىگىمىزدى كوزدىڭ قاراشىعىنداي قورعايتىندارىڭىزعا سەنەمىن! وسىنداي جاۋاپتى جولدا دەندەرىڭىزگە ساۋلىق، قىزمەتتەرىڭىزگە تابىس تىلەيمىن!اسكەري ومىردە بىر-بىرىڭىزگە باۋىرداي جاقىن جولداس، كومانديرلەرىڭىزگە سەنىمدى سەرىك بولۋعا شاقىرامىن. قازاقستاندىق جاۋىنگەر اتاعىن بيىك ۇستاپ، جۇكتەلگەن مىندەتتىۇلكەن ابىرويمەن اتقارىپ شىعۋعا تىلەكتەسپىن، - دەدى قۇراما كومانديرى ساكەنتاي امانتاي ۇلى!
قىرىق كۇن بۇرىن 5573 اسكەري ءبولىمىنىڭ تابالدىرىعىن اتتاعان بۇل ساربازدار ارنايى دايىندىقتان ءوتىپ، ساپتىق ءجۇرىس پەن اسكەر ءىسىنىڭ قىر-سىرىن مەڭگەرىپ جاتىر. ەندى ءسال كۇندە قالامىزدىڭ قوعامدىق ءتارتىبىن، قالا تۇرعىندارى مەن قوناقتارىنىڭ تىنىشتىعىن كۇزەتەتىن بولادى. سونداي-اق، باس قالامىزدا وتەتىن بارلىق مادەني-كوپشىلىك، ساياسي-قوعامدىق، سپورتتىق شارالار مەن رەسمي باسقوسۋلار كەزىندە دە قاۋىپسىزدىكتى قامتاماسىز ەتۋ – وسى ۇلانداردىڭ ەنشىسىندە. ەلوردا ۇلاندارى شەتەلدىك دەلەگاسيالاردى قارسى الۋعا، تابيعي اپاتتار مەن توتەنشە جاعدايلاردا حالىققا كومەك كورسەتۋگە، داعدارىستى كيكىلجىڭدەردە ەلدى تىنىشتاندىرۋعا جۇمىلدىرىلادى.
وسىنداي جاۋاپتى مىندەت اتقاراتىن بولعاندىقتان جەدەل قۇراماعا جاڭادان قوسىلعان جاۋىنگەرلەر اعا بۋىن ساربازدار سەكىلدى ارنايى جاتتىعۋلار مەن دايىندىقتاردان، نۇسقاۋلىقتاردان وتكىزىلدى.
- بۇگىن وسى ساپتا تۇرعان ءاربىرىمىز ءۇشىن وتە ماڭىزدى كۇن. ءبىز ءوز وتانىمىزعا انت بەرىپ، تاۋەلسىز قازاق ەلىن قورعاۋعا قادام باستىق. ەجەلدەن باتىر بابالارىمىز وتانعا قىزمەت ەتۋدى ءوزىنىڭ ەر ازاماتتىق مىندەتى ساناعانىن بىلەمىز. ءبىز دە وسى جاۋىنگەرلىك ءداستۇردى جالعاستىرۋعا دايىنبىز. ۇلتتىق ۇلاندا قىزمەت ەتۋ، ەلىمىزدىڭ جۇرەگى – استانامىزدىڭ تىنىشتىعىن كۇزەتۋ – ءبىز ءۇشىن ۇلكەن مارتەبە. سىزدەرگە ەلىمىزدى ادال قورعاۋعا، ەرجۇرەك، رۋحتى جاۋىنگەر بولۋعا ءسوز بەرەمىز! - دەيدى انت قابىلداۋشى قاتارداعى ۇلان دۇيسەن.
سالتاناتتى انت قابىلداۋ شاراسىنا ۇلتتىق ۇلان باس قولباسشىلىعى، مەملەكەتتىك ۆەدومستۆولار مەن كۇش قۇرىلىمدارىنىڭ باسشىلىقتارى، ارداگەرلەر مەن ساربازداردىڭ تۋعان-تۋىستارى قاتىستى. اسكەري ءبولىمنىڭ الىپ الاڭىنا ساردارلار مەن ساربازداردى ەسەپتەمەگەننىڭ وزىندە 3 جارىم مىڭنان اسا ادام جينالىپ، جاس جاۋىنگەرلەردىڭ وتان قورعاۋشىلار قاتارىنا قوسىلۋىنا كۋا بوپ، سالتاناتتى ساپتىق شەرۋىن تاماشالادى. سونداي-اق، قوناقتار «اشىق ەسىك كۇنى» اياسىندا اسكەري ءومىردىڭ تىنىس-تىرشىلىگىمەن، ساربازداردىڭ تۇرمىسىمەن تانىستى.