بۋرابايدا شاڭعى ترامپلينى پايدالانۋعا بەرىلدى، دەپ جازادى Qamshy.kz اقپارات اگەنتتىگى ءتىلشىسى. اتالعان ايماقتا شاڭعى بازاسى ءساۋىر ايىندا اشىلعان بولاتىن.

بۇگىن ششۋچينسك قالاسىندا «بۋراباي» اتتى جاڭا ءترامپليننىڭ اشىلۋ سالتاناتى ءوتىپ، وعان ەلباسى ارنايى قاتىستى. پرەزيدەنت شاڭعى بازاسىنان وزگە ەكى كەشەندى ارالادى. اقمولا وبلىسى بۋراباي اۋدانىندا كوپتەن كۇتكەن شاڭعى بازاسىنىڭ قولدانىسقا بەرىلۋ سالتاناتىندا پرەزيدەنتپەن بىرگە ۆيسە پرەمەر اسقار ءمامين، مادەنيەت جانە سپورت ءمينيسترى ارىستانبەك مۇحامەدي ۇلى، اقمولا وبلىسى اكىمى ءمالىم مۋرزالين بولدى. جاڭادان اشىلعان ترامپليندە شاڭعىشىلار پرەزيدەنت الدىندا سەكىرىپ، ونەرلەرىن كورسەتتى. جاڭا رەسپۋبليكالىق شاڭعى سپورتى بازاسىندا شاڭعى جارىستارى، بياتلون، شاڭعى-روللەر سپورتى بويىنشا جاتتىعۋلار مەن حالىقارالىق جارىستار وتكىزۋ جوسپارلانعان.

اشىلۋدا جوبا تۋرالى «ەلىمىزدىڭ جەر بايلىعىن كوبەيتىپ، ونىڭ ادەمىلىگىن حالىققا كورسەتۋ كەرەك. قازاقستاننىڭ جەرى انشەيىن جاتقان دالا ەمەس، نەشە ءتۇرلى كەرەمەت دەمالاتىن جەرلەر بار ەكەنىن كورسەتەيىك. ونىڭ ۇستىنە استانا ىرگەسىندەگى بۋرابايدا نەشە ءتۇرلى شارالار وتكىزىلەتىن بولادى، سوعان جاعداي جاسايىق. مۇنىڭ بارلىعى اكىمشىلىكتىڭ قاراۋىندا. تۋريستىك جەرلەردى كوبەيتىپ، باعاسىن قولجەتىمدى ەتىپ قويۋ كەرەك. ءالى دە اتقارىلاتىن جۇمىس كوپ. ءتۋريزمدى – ەكونوميكانىڭ ءبىر سالاسى رەتىندە قاراۋىمىز كەرەك. بىزگە رەسەيدەن، ورتا ازيادان تۋريستەر كوپتەپ كەلەدى. ەلىمىزگە كەلەتىن تۋريستەردىڭ سانىن ءۇش ميلليوننان ون ميلليونعا ارتتىراتىن بولساق، ودان تۇسەتىن قارجى 8 پايىزعا ارتادى»، دەگەن ەلباسى ءار ايماقتىڭ اكىمدەرىنە ءبىرشاما جۇمىستار تاپسىردى.

ەلباسى بۋراباي دەمالىس ايماعىندا قانداي جۇمىستار جاسالۋ قاجەتتىگىنە توقتالدى. «بۋرابايدا جاسالاتىن ءبىرىنشى ماسەلە – ىشكى ينفراقۇرىلىمىن جۇمىستارىن ءبىتىرۋ. سەبەبى، ءبىز سىرتقى جۇمىستاردى اياقتادىق. ول ءۇشىن ءتيىستى جۇمىستاردى جۇرگىزدىك. استانادان بۋرابايعا اۆتو جانە تەمىرجول سالىندى. كوكشەتاۋدىڭ اەروپورتى جوندەلدى. ەندى ىشتەگى ينفراقۇرىلىمدى قولعا الۋ كەرەك. ەگەر ءبىز بارلىق وبەكتىلەرگە سۋ تارتىپ، ەلەكتر جۇيەلەرى مەن كارىس جۇيەسىن اكەلەتىن بولساق، مەملەكەت ءتۋريزمدى دامىتادى. ونى مەملەكەتتەن باسقا ەشكىم سالمايدى. سوندا ينۆەستورلاردىڭ كەلۋىنە مۇمكىنشىلىك جاسالادى»، - دەدى ول. «سوندىقتان مەنىڭ تاپسىرمام بويىنشا مەملەكەت تاراپىنان 2023 جىلعا دەيىن (ءتۋريزمدى دامىتۋ بويىنشا اۆتور) بەسجىلدىق باعدارلاما قابىلداندى. مەن ونىڭ ورىندالۋ جولدارىن ءقازىر تىڭدادىم. ۇكىمەت پەن مينيسترلىك وكىلى، وبلىستىڭ اكىمى نە ىستەپ جاتقانىن كوردىك. بۇل جۇمىستى ءبىز ءبىتىرۋىمىز كەرەك»، - دەدى ەلباسى سوزىندە.

قىسقى سپورت تۇرىمەن اينالىساتىن اتلەتتەر مۇندا جىل بويى جاتتىعۋ وتكىزە الادى. سپورت كەشەنى شارتتى تۇردە شاڭعى بازاسى دەپ اتالعانىمەن، مۇندا ترامپلين، بياتلون، شاڭعىدان حالىقارالىق دەڭگەيدەگى جارىستاردى وتكىزۋگە بولادى. مۇندا 2 تۇعىر بار. بىرەۋىنىڭ بيىكتىگى – 125، ەكىنشىسى – 90 مەتر. ءترامپليننىڭ جالپى اۋماعى 125،54 گا جەردى قۇرادى. وبەكت ەكى قۇرىلىس نىسانىنان تۇرادى: 1) جالپى كولەمى 111 گا جەردى قۇرايتىن شاڭعى سپورت بازاسى؛ 2) شاڭعى ءترامپلينى. مەملەكەتتىك ساراپتاما قورىتىندىسىنا سايكەس، قۇرىلىس جۇمىستارىنا بيۋدجەتتەن 38،5 ميلليارد تەڭگە كولەمىندە قارجى جۇمسالدى.

نىسان تەڭىز دەڭگەيىنەن 430 مەتر بيىكتىكتە ورنالاسقان. مەردىگەر كومپانيانىڭ وكىلدەرى بارلىق حالىقارالىق تالاپ ساقتالعانىن ايتادى. قۇرىلىس كومپانياسىنىڭ ديرەكتورى ميركو گورنيكتىڭ ايتۋىنشا شاڭعىشىلار كەشە عانا ترامپليننەن سەكىرىپ كوردى. ول – 125 مەتر. نىساننىڭ قۇرىلىسىن حالىقارالىق شاڭعى فەدەراسياسى جوعارى باعالاپ وتىر. ترامپلين سالىنعان ايماقتا جەلدىڭ جىلدامدىعى سەكۋندىنا 3 مەتردەن اسپاۋى كەرەك.

ەسكە سالا كەتەر بولساق، بۇل قازاقستانداعى ەكىنشى شاڭعى ترامپلينى. بۇعان دەيىن ازيادا ويىندارى ءۇشىن الماتىدا شاڭعى ترامپلينى اشىلعان بولاتىن.