الماتىنىڭ قاق ورتاسىندا، دالىرەك ايتساق، "اتاكەنت" ورتالىعىنىڭ الدىندا بيىكتىگى 12 مەتر ءتيىننىڭ ءمۇسىنى ورناتىلدى. وعان 23 ميلليون تەڭگە جۇمسالعان. ونىڭ 15 ميلليونى مەملەكەت بيۋدجەتىنەن بولىنگەن. قازاقستان ازاماتتارى بۇل قارجىنى حالىق ءۇشىن الدەقايدا پايدالى دۇنيەگە جۇمساۋعا بولاتىنىن ايتىپ، نارازىلىق ءبىلدىرىپ جاتىر. ەكونوميستەردىڭ ايتۋىنشا، 15 ميلليون ەلدىڭ كەم-كەتىگىن تولتىرۋعا جەتىڭكىرەمەيدى، دەسە دە كەيبىر ماسەلەلەردى شەشۋگە سەپتىگىن تيگىزەر ەدى، دەپ جازادى Qamshy.kz اقپارات اگەنتتىگى.

ەكونوميكا عىلىمدارىنىڭ دوكتورى اتامۇرات شامەنوۆ: "15 ميلليون پەدوفيليا، ۇرلىق-قارلىق، زورلىق-زومبىلىق سەكىلدى قىلمىستاردىڭ الدىن الار ەدى"، — دەيدى.

-15 ميلليوندى، ءتيىننىڭ ءمۇسىنىن ورناتۋدان بولەك، وزگە دە كوپتەگەن ماڭىزدى نارسەلەرگە جۇمساۋعا بولار ەدى. جامايتىن جىرتىعىمىز بارشىلىق. ماسەلەن، حالىقتىڭ قاۋىپسىزدىگى. ءقازىر ەلدە ۇرلىق، زورلىق، پەدوفيليا ماسەلەسى ءورشىپ تۇرعاندىقتان، كوشەلەر مەن عيماراتتارداعى بەينەكامەرالاردىڭ سانىن ارتتىرۋ كەرەك. ونى ەليتالى اۋداندارعا ەمەس، قىلمىس كوپ بولاتىن، كوپبالالى وتباسىلار تۇراتىن اۋداندارعا ورناتۋ كەرەك، — دەيدى ەكونوميست.

قازىرگى نارىق زامانىندا 15 ميلليون از دا ەمەس، كوپ تە ەمەس. بۇل قاراجاتقا جاڭا اۋرۋحانا سالۋ مۇمكىن بولماسا دا، الماتى شەتىندەگى، اۋىل كوشەلەرىندەگى جولدى جوندەۋگە بولار ەدى. قالا كوشەلەرى جىل سايىن جوندەۋدەن وتسە دە، قالا شەتى نازاردان تىس قالىپ جاتادى. اۋىل كوشەلەرىندە جازدا شاڭعا ورانىپ، جاڭبىرلى كۇنى اياعىڭدى بالشىقتان الىپ جۇرە المايسىڭ. بۇل — ءبىر.

ەكىنشىدەن، ءقازىر اۋىر دەرتكە شالدىققان، الايدا ونىڭ ەمىنە قارجى تابا الماي شارق ۇرىپ جۇرگەندەر كوپ. 15 ميلليون مەملەكەتتىڭ باستى بايلىعى – ادام ءومىرىن ساقتاپ قالۋعا كومەكتەسەر ەدى.

ۇشىنشىدەن، 15 ميلليون جاڭا اۋرۋحانا سالۋعا جەتپەسە دە، اۋرۋحانانى كۇردەلى جوندەۋدەن وتكىزۋگە جەتەدى. ماسەلەن، مەنينگيت اۋرۋى ءورشىپ تۇرعاندا جۇرتتىڭ جاعاسىن ۇستاتقان قاسكەلەڭدەگى جۇقپالى اۋرۋلار ەمحاناسىن ءبىر جاڭارتىپ الۋعا بولار ەدى.

تورتىنشىدەن، 15 ميلليون تەڭگە كوپبالالى، جالعىزباستى انالارعا الماتىدان كولەمى 56 شارشى مەتر ەكى بولمەلى پاتەر الىپ بەرۋگە جەتەدى.