" "مەنى جاقسى كورەسىڭ بە؟"
- "جاقسى كورەمىن، بالام".
-"قاتتى جاقسى كورەسىڭ بە؟"
-"قاتتى-قاتتى جاقسى كورەمىن".
-"وتە-وتە؟"
-"وتە-وتە".
جەتى جاسار ۇلىم "جاقسى كورەسىڭ بە؟" دەپ كۇنىنە ونشاقتى رەت سۇرايتىن شىعار؟ جاۋابىم دايىن. ونى ءجۇز رەت بولسا دا، مىڭ رەت بولسا دا قايتالاي الامىن. قىسقاسى، ۇلىم ارقىلى جاقسى كورۋدى قايتادان ۇيرەنىپ جاتىرمىن. 
انام جارىتتىقتىڭ ماعان دەگەن ماxابباتى ەرەكشە-تۇعىن. باسقا بالالارىنان بولەك ءسۇيدى، مەنى. ءوزى توقسانعا، مەن ەلۋگە تولسام دا اينالىپ-تولعانىپ وتىراتىن. ەل-جۇرتتىڭ كوزىنشە بولسا دا وبەكتەي بەرەتىن. بۇعان كادىمگىدەي قىسىلۋشى ەدىم، "وگىزدەي بولدىم، اپا، قويشى ەندى" دەپ. اقىماق ەكەنمىن اۋ؟!
مىنا دۇنيەدە انا مەيىرىمىنەن ارتىق نە بار؟ انا قۇشاعىنان ىستىق نە بار؟ "اپا، ءسىزدى جاقسى كورەم" دەپ نەگە ءجيى ايتپادىم، كوزى تىرىسىندە؟ جاقسى كورەتىنىمدى سەزىمتال جۇرەگىمەن ءوزى ۇعار دەپ ويلاسام كەرەك. كەيدە، انامنىڭ التىن ماxابباتىن جەتكىلىكتى باعالامادىم با دەپ تە قاپالانام. 
ول كىسى (بىلتىر) ەكىنشى مامىر كۇنى 90 جاسقا تولىپ، ون التىنشى مامىر كۇنى ومىردەن وزدى. تاپ-تازا ءجۇرىپ، تاپ-تازا كەتتى. مارقۇم توسەك تارتىپ تا جاتپادى. جۇرەكتەن كەتەدى دەپ ويلاماپپىز. سوڭعى ەكى-ۇش جىلدىڭ ىشىندە (الدىما ءتۇرلى كەدەرگىلەر شىعىپ)، جوق جەردەن پايدا بولعان پروبلەمالارمەن الىسىپ كەتكەن ەدىم. ونى ءۇي ىشىندەگىلەرگە بىلدىرمەۋگە تىرىستىق. ءبىراق، انا جۇرەگى ءبارىن سەزەدى عوي. مەن ءۇشىن تالاي تاڭىن ۇيقىسىز اتىرعان دا بولار؟ كەيدە ويلايمىن، ىشىنەن تىنعان سارى ۋايىمى جۇرەگىن شىداتپادى ما دەپ.
دۇنيەدەن ەرتە كەتتى دەپ كۇيىنەتىن جاي جوق. اللانىڭ ىسىنە امال نە؟ قوشتاسا الماي قالعانىما، اۋىر ەڭبەكتەن كۇستەنگەن قولىن قۇشىرلانا ءسۇيىپ، وعان دەگەن پەرزەنتتىك ماxابباتىمنىڭ شەكسىزدىگىن جەتكىزە الماي قالعانىما ىشتەي وكىنەمىن. وكىنگەننەن نە پايدا؟ ءبارى كەش...
مۇنى بەكەر جازىپ وتىرعانىم جوق. جاقىندارىڭدى جاقسى كورىڭىزدەر دەگىم كەلەدى. جاقسى كورەتىنىڭدەرىڭىزدى جاسىرماڭىز دەگىم كەلەدى. جاقسى كورەتىندەرىڭىزدى ايتۋدان جالىقپاڭىزدار دەگىم كەلەدى.

مىنا بەينەسىردىڭ يەسى - امير (ءامىر) قاراقۇلوۆ، كينورەجيسسەر. ەكەۋمىز كازگۋ-دىڭ جۋرفاگىندا (ءبىرىنشى كۋرستا) بىرگە وقىعانبىز. ول كەيىن ماسكەۋگە (ۆگيك-كە) اۋىستى، ءبىز اسكەر قاتارىنا اتتاندىق.

ءاميردىڭ (ءامىردىڭ) اڭگىمەسىن اياعىنا دەيىن تىڭداڭىز. ويىمىز ءبىر جەردەن شىعىپ جاتقان سوڭ، وزدەرىڭىزبەن ءبولىسۋدى ءجون كوردىم" دەيدى سەرىك اباس-شاح.