بۇگىن الماتى وبلىسى ەڭبەكشىقازاق اۋدانى جاركەنت قالاسىنداعى پانفيلوۆ اۋداندىق سوتىندا "شەكارانى زاڭسىز كەسىپ ءوتتى" دەگەن ايىپ تاعىلعان سايراگۇل ساۋىتبايدىڭ سوتى باستالدى. 

بيىل 21 مامىردا سايراگۇل ساۋىتبايدى ۇلتتىق قاۋىپسىزدىك كوميتەتىنىڭ قىزمەتكەرلەرى الماتى وبلىسى ەڭبەكشىقازاق اۋدانى بايدىبەك بي اۋىلىنداعى ۇيىنەن تاڭعى 9.00-9.30 شاماسىندا ۇستاپ اكەتكەن. وعان ق ر قىلمىستىق كودەكسىنىڭ 392-بابى 1ء-بولىمى بويىنشا ايىپ تاعىلىپ (شەكارانى زاڭسىز كەسىپ ءوتۋ)، سودان بەرى قاماۋدا وتىر. 

دۇيسەنبى 9 شىلدە كۇنى سايراگۇل  ساۋىتبايدىڭ العاشقى سوت وتىرىسى وتكەن. سوت وتىرىسىندا ايەلدىڭ ادۆوكاتى ابزال قۇسپان ورىس تىلىندە ءوتىپ جاتقان سوت ءىسىنىڭ قازاق تىلىندە جۇرگىزىلۋىن تالاپ ەتتى. سۋديا دينارا تۇتقابايەۆا ايىپتالۋشى جاقتىڭ تالابىن قاناعاتتاندىردى. ءىس قاعازدارىن قازاق تىلىنە اۋدارىپ، سايراگۇلگە تۇسىنىكتى اراب حارپىنە كوشىرۋ ءۇشىن 12 شىلدەگە دەيىن مەرزىم بەلگىلەدى. ءارى سوت وتىرىسىن بۇگىنگە بەكىتكەن. 

بۇعان دەيىن قازاقستاندىق ادۆوكات ابزال قۇسپان شەكارانى زاڭسىز كەسىپ ءوتتى دەگەن ەتنيكالىق قازاق سايراگۇل ساۋىتبايدىڭ ىسىنە قاتىستى تەرگەۋ جۇمىستارىنىڭ بارىسىمەن تانىستىرىپ وتكەن بولاتىن.

ابزال قۇسپان مۇندا ايەلدىڭ زاڭسىز ارەكەتىنەن بۇرىن ماقساتى نەگىزگە الىناتىنىن ايتقان.  ال ءدۇيىم جۇرتقا ءمالىم سايراگۇلدىڭ ماقساتى – ءوز وتباسىنا اسىقتى. تەك جۇڭگو تاراپى ونىڭ قۇجاتتارىن بەلگىسىز سەبەپتەرمەن تارتىپ العان.

"سايراگۇل الاڭداپ وتىر. قازاقستاننىڭ تۇرمەسىندە وتىرسام دا، وسىندا قالسام بولدى"، - دەپ جەتكىزگەن ەدى ادۆوكات ايەلدىڭ ءسوزىن.

بۇعان دەيىن سايراگۇلدىڭ ومىرىنە اراشا تۇسكەن قازاقستاندىقتاردىڭ سانىندا شەك بولمادى. رەسپۋبليكانىڭ ءار اۋدانىنان "سايراگۇلگە اراشا!" اتتى ۆيدەو تارالىپ، بيلىكتىڭ قۇلاعىنا جەتكىزۋگە تىرىسىپ باقتى. سايراگۇلدى قىتايعا قايتارعان جاعدايدا ءولىم جازاسىنا كەسىلەتىنىن ايەلدىڭ وتباسى دا، حالىق تا ءبىلىپ وتىر. بار ءۇمىت قازاق سوتىندا!