14 شىلدەدە الماتى وبلىسىنداعى تاۋلاردىڭ بىرىندە جەتى جاسار ەرنۇر ءسادۋاقاس جۇمباق جاعدايدا جوعالىپ كەتتى. دوستارىمەن «كىشى جاز» جايلاۋىنا ويناۋعا كەتكەن بالا قايتىپ ورالماعان، ال دوستارىنىڭ ءبارى ۇيلەرىنە قايتقان ەكەن. بۇل تۋرالى كتك ارناسى حابارلادى.

پوليسيا قىزمەتكەرلەرى، قۇتقارۋشىلار مەن ەرىكتىلەر بالانى ءۇش تاۋلىك بويى ىزدەپتى، الايدا ناتيجەسىز. ال بالالاردىڭ ايتۋىنشا، اۋىل تۇرعىنى ولاردى پىشاقپەن قورقىتقان كورىنەدى.

ەستەرى شىققان بالالار تاۋعا قاراي قاشقان. ال ەرنۇر بەلگىسىز سەبەپتەرمەن تومەن قاراي جۇگىرىپتى. سودان كەيىن ونى ەشكىم كورمەگەن. جوعالعان بالانىڭ جاقىندارى بۇعان سەنبەي وتىر. ولاردىڭ ويىنشا، بالاعا 45 جاستاعى اسقار ەسىمدى باقتاشى قوقان-لوقى كورسەتكەن بولۋى مۇمكىن. ول كۇن سايىن ءىشىپ الىپ، ءوزىن ءبىرتۇرلى ۇستايتىن كورىنەدى. اۋىلداستارىمەن ءتىپتى ارالاسپايدى ەكەن.

«مالشى ادەتتەگىدەي ءىشىپ الىپ بالالار ونىڭ تەلەفونىن ۇرلاپ كەتتى دەپ ويلاعان شىعار. ال مەنىڭ بالام بالالارمەن قاشىپ ۇلگەرە الماي قالعان. الگى ەركەك بالانىڭ قايدا ەكەنىن بىلەتىنىنە سەنىمدىمىن. الايدا سول جاعدايدان كەيىن ول ادامدى اۋىلدان كورگەن جوقپىز»، - دەيدى بالانىڭ اناسى ءلاززات شالابايەۆا.

مالشى تەرگەلدى مە، جوق پا، ءالى بەلگىسىز. تەرگەۋشىلەر قانداي دا ءبىر پىكىر بەرۋدەن باس  تارتىپ وتىر.

ەگەر بالا جاقىن كۇندەرى تابىلماسا، ىزدەۋ جۇمىستارىنا تاعى بىرنەشە ادام قوسىلادى.