ادۆوكات سۇڭقار نۇرماعامبەتوۆ اقجارقىن تۇرلىبايدىڭ ىسىنە قاتىستى قاجەت بولسا قىتايعا باراتىنىن ايتتى. زاڭگەر اقجارقىنمەن جەكە كەزدەسۋگە تىرىسىپ كورمەك. ونىڭ ايتۋىنشا، ازىرشە سوتتىڭ قاشان وتەتىنى بەلگىسىز. ۋاقىت ءالى بەلگىلەنبەگەن.
- قىتايدا تەرگەۋ يزولياتورىندا جاتقان وتانداسىمىز اقجارقىن تۇرلىبايدىڭ ىسىنە قاتىستى ءبىزدىڭ پوزيسيامىز بۇرىنعىداي - اقجارقىن كىناسىز. سوتتا سونى دالەلدەۋگە تىرىسامىز. ال سوتتىڭ قانداي شەشىم شىعارۋ مۇمكىن ەكەنىن بولجاپ تا ايتا المايمىن.
بۇعان دەيىن قىتايداعى قازاقستاندىق ديپلوماتتار اقجارقىن تۇرلىبايدىڭ جاعدايىن ءبىلۋ ءۇشىن تەرگەۋ يزولياتورىنا بارىپ تۇراتىنى ايتىلدى. ق ر ءسىم وتانداسىمىزدىڭ دەنساۋلىعى تۇراقتى ەكەنى حابارلانعان.
ەسكە سالا كەتەيىك، اقجارقىن تۇرلىباي 2014 جىلى گۋانچجوۋ اۋەجايىندا 4،5 كەلى ەسىرتكىمەن اۋەجايدا ۇستالعان. قىتايلىق سوت بۇل قىلمىس ءۇشىن قىزدى ءومىر بويىنا باس بوستاندىعىنان ايىرعان. 2016 جىلى اپپەللياسيالىق ينستانسيا سوتى اقجارقىنعا قاتىستى ءومىر بويىنا باس بوستاندىعىنان ايىرۋ جازاسىنان باس تارتىپ، ونىڭ ءىسىن ءبىرىنشى ينستانسيا سوتىنا جىبەرگەن. ءبىرىنشى ينستانسيا سوتىندا ا.تۇرلىبايدىڭ ءىسى قايتا قارالدى. قازىرگى ۋاقىتتا اقجارقىن تۇرلىباي تەرگەۋ اباقتىسىندا سوت ۇكىمىن كۇتىپ وتىر.