بۇل جايىندا لاگەرگە بارىپ كەلگەن وقۋشىلاردىڭ ءبىرى قايتىپ ورالعاننان كەيىن جەدەل جاردەم شاقىرتىپ، دارىگەردىڭ كومەگىنە جۇگىنگەننەن كەيىن بەلگىلى بولدى. قالالىق ءبىلىم باسقارماسى قىزمەتكەرلەرىنىڭ ايتۋىنشا، ۇرىپ-سوققانى تۋرالى فاكتىلەر ۆەدومستۆوعا كەلىپ تۇسپەگەن.

15 جاستاعى مەيرامبەك تولەگەنوۆ ەسىمدى ءجاسوسپىرىم لاگەردەن كەلگەننەن كەيىن جەدەل-جاردەم شاقىرتقان. ورال قالالىق مەكتەبىنىڭ 9-سىنىبىندا وقيتىن 4 وقۋشى باسقا دا بالالارمەن بىرگە جاعى دەمالىس كەزىندە «قايسار» لاگەرىنە بارىپ، 5 كۇن سول جەردە بولۋدى جوسپارلاعان. ناتيجەسىندە دەنساۋلىعىنان ايىرىلىپ كەلدى.

«قايسار» لاگەرى العاشىندا ءتارتىبى قيىن وقۋشىلاردى تۇزەۋ ماقساتىندا قۇرىلعان. بۇگاندە ونىڭ تانىمالدىعى ارتىپ، بالالار لاگەرىنە اينالدى. مەيرامبەك تولەگەنوۆتىڭ مەكتەپتە ءتارتىبى جاعىنان ەش قيىندىقتار بولماعان، دوستارىنىڭ اراسىندا تاتۋ ءارى بەدەلگە يە بالا بولعان. جىل اياقتالار ۋاقىتتا ونىڭ اناسى زاميرا قوجامبەرلييەۆاعا بالاسىن اسكەري-پاتريوتتىق لاگەرگە جىبەرۋگە ۇسىنىس بىلدىرگەن.

25 ماۋسىم كۇنى مەيرامبەك العاشقى اسكەري دايىندىق پانىنەن بەرەتىن مۇعالىمىمەن بىرگە، تاعى قاسىندا بەس بالا بار، التاۋى لاگەرگە قاراي شىققان. ول جەردە بالالاردى باسقا كومانديرلەر مەن تاربيەشىلەر كۇتىپ العان.

«بەس كۇن وتكەننەن كەيىن، 30 ماۋسىم كۇنى ساعات 11-لەر شاماسىندا ۇيگە قايتىپ كەلدى، ءتۇرى وتە شارشاڭقى بولعان. باسىندا ونشا ءمان بەرمەگەن ەدىم، 15-20 مينۋتتان كەيىن №43 مەكتەپ وقۋشىلارىنىڭ اتا-انالارى حابارلاسىپ، ابايداعى پوليسيا بولىمشەسىنە كەلۋىمىزدى ايتتى. سول جەردە بالالارىمىزدى قۇرداستارى لاگەردە اياۋسىز ۇرىپ-سوققانىن ءبىلدىم»، - دەيدى زارداپ شەككەن بالانىڭ اناسى.

№43 ورتا مەكتەپتىڭ تاعى ءۇش بالاسى ءزابىر كورگەن، مەيرامبەك ول بالالاردىڭ 9-سىنىپ وقۋشىلارى ەكەنىن ايتىپتى. ولاردى قولدارىمەن، تاياقپەن كوبىنەسە ارقالارىنان، دەنەنىڭ تومەنگى بولىگىنەن ۇرىپ-سوققان. ءزابىر كورسەتكەن بالالار ولارعا: «شىدايسىڭ با؟»، «شاعىمدانباي جۇرە الاسىڭ با؟»، «سىناقتان وتە الاسىڭ با؟» دەپ ايتقان ەكەن.

«ءبىز پوليسياعا ارىز جازدىق. كەيىننەن مەنىڭ بالامدى ۇرعان بالالاردىڭ ءبىرىنىڭ اناسى ماعان كەلدى دە ءوزىمدى جالا جاپتىڭ دەپ ايىپتاي باستادى. اسكەري-پاتريوتتىق لاگەردە مۇنداي سۇمدىق جاعدايلار ورىن الدى دەگەنگە سەنۋ ماعان دا قيىن ءتۇستى»، - دەيدى زاميرا.

«قايسار» لاگەرىنىڭ تاربيە ءىسى جونىندەگى ءبولىم باسشىسى جازيرا رىسكازييەۆانىڭ ايتۋىنشا، اتالمىش وقيعاعا بايلانىستى لاگەر اكىمشىلىگى مەن تاربيەشىلەرى جانە بالالاردىڭ اتا-انالارى شاقىرىلىپ، جينالىس بولعان.

«اتا-انالار لاگەردىڭ جۇمىسىن باقىلاۋعا الۋدى ءوتىندى. سونىمەن قاتار، ۇرىپ-سوققان بالالارعا قاتىستى قانداي دا شارا قولدانۋ قاجەتتىگىن ايتتى. تاراپتار بىر-بىرىنە ەش نارازىلىقتارى جوق ەكەنىن ايتقان. جينالىس بولعان كۇنى ماسەلەنى شەشكەن بولاتىنبىز»، - دەدى ءبولىم باسشىسى.

ال بۇل ىسكە قاتىستى زارداپ شەككەن بالانىڭ ويى مۇلدەم باسقاشا. اناسىنىڭ: «سەندەردى ۇرىپ-سوققاندا تاربيەشىلەر مەن كومانديرلەر قايدا بولدى؟» دەگەن سۇراعىنا بالا: «ولار كوپ ۋاقىتتا تەك وزدەرىمەن-وزدەرى جۇرەتىن. ال بىزگە قاراۋ كەرەك بولعان تاربيەشى كۇنى بويى ناردى ويىناپ وتىردى»، - دەپ جاۋاپ بەرگەن.

دەرەككوزى: Uralskweek.kz