سوڭعى جىلدارى وتاندىق كىتاپحانالاردىڭ قىزمەت كورسەتۋ ساپاسى ايتارلىقتاي اقساپ، جاڭاشا ەكپىندى قاجەت ەتىپ تۇرعانى جاسىرىن ەمەس. وسىنى ەسكەرگەن «نۇر وتان» پارتياسى ەلىمىزدەگى كىتاپحانالاردىڭ قىمزەتىن جاڭعىرتۋدى قولعا الدى.
اتالعان جوبا ءقازىردىڭ وزىندە ءوز جەمىسىن بەرىپ، كوپتەگەن كىتاپحانالار جاڭاشا قىزمەت كورسەتۋدى باستاپ كەتتى. سولاردىڭ قاتارىندا شىمكەنت قالاسىنداعى «وتىرار» امبەباپ عىلىمي كىتاپحاناسى دا بار. مۇندا پارتيانىڭ باستاماسىمەن اشىلعان كوۆوركينگ-ورتالىق جاڭا تەحنولوگيامەن، جىلدامدىعى جوعارى ينتەرنەتپەن جابدىقتالعان. ودان بولەك، ورتالىقتا كونفەرەنس-زال قاراستىرىلىپ، وندا ءتۇرلى تاقىرىپتاردا سەمينارلار، دارىستەر جانە ترەنينگتەر وتكىزۋگە جاعداي جاسالعان. سونداي-اق دەمالىس ايماعى، كينو زالى، كوفەحانا، كىتاپ دۇكەنى، اعىلشىن ءتىلىن ۇيرەتەتىن كۋرس جانە ەركىن پىكىرتالاس ايماعى بار. وسىلايشا ءداستۇرلى كىتاپحانادان جاڭا زامان تالاپتارىنا ساي ءبىلىم ورتالىعى رەتىندە قايتا جاڭعىرعان نىسان جەرگىلىكتى جاستاردىڭ ءجيى باس قوساتىن جەرىنە اينالىپ وتىر.
بۇگىن شىمكەنت قالاسىنا ارنايى ساپارمەن كەلگەن «نۇر وتان» پارتياسى ءتوراعاسىنىڭ ءبىرىنشى ورىنباسارى اتالعان نىسانعا بارىپ، اتقارىلعان جۇمىستارمەن تانىستى. وسىنداي كوۆوركينگ-ورتالىقتار جاستارعا بەرىلىپ وتىرعان ۇلكەن مۇمكىندىك ەكەنىن ايتقان ماۋلەن اشىمبايەۆ ونى جاستار، سونىڭ ىشىندە «جاس وتان» جاستار قاناتىنىڭ مۇشەلەرى ءتيىمدى پايدالانۋى كەرەكتىگىن تىلگە تيەك ەتتى.
– ەلباسىنىڭ «رۋحاني جاڭعىرۋ» باعدارلاماسىنىڭ نەگىزگى باعىتتارىنىڭ ءبىرى – حالىقتىڭ بىلىمگە دەگەن قۇشتارلىعىن ارتتىرۋ. وسىعان وراي «نۇر وتان» پارتياسى ەلىمىزدەگى كىتاپحانالاردىڭ قىزمەتىن جاڭعىرتىپ، ولاردى جاڭا زامانعا ساي كوۆوركينگ-ورتالىق رەتىندە قايتا قۇرۋ جوباسىن قولعا الدى. سەبەبى، كىتاپحانالار تەك كىتاپ وقيتىن ورىن ەمەس، ءتۇرلى سەمينارلار، ترەنينگتەر، دارىستەر وتەتىن، جاستار ءجيى باس قوساتىن ناعىز ءبىلىم ورتالىعى بولۋى ءتيىس. سوندىقتان وسىنداي ورتالىقتاردى مازمۇندى، ءماندى دۇنيەلەرمەن تولتىرۋىمىز كەرەك. جوبانىڭ نەگىزگى ماعىناسى دا وسى، ياعني ءداستۇرلى كىتاپحانالارعا جاستاردى تارتىپ، ولاردىڭ كىتاپ وقۋعا، ساپالى ءبىلىم الۋىنا جاعداي جاساۋ، – دەدى ماۋلەن اشىمبايەۆ.
سونىمەن قاتار «نۇر وتان» پارتياسى سيفرلاندىرۋ ىسىنە ۇلەس قوسۋ، حالىقتىڭ سيفرلى ساۋاتتىلىعىن ارتتىرۋ، جاستاردىڭ ساپالى ءبىلىم الىپ، دەنى ساۋ ۇرپاق بولىپ قالىپتاسۋىنا جاعداي جاساۋ ماقساتىندا ءبىرقاتار جوبالاردى جۇزەگە اسىرا باستاعانى بەلگىلى. سوعان وراي ماۋلەن اشىمبايەۆ شىمكەنتكە ساپارى بارىسىندا م.اۋەزوۆ اتىنداعى وڭتۇستىك-قازاقستان مەملەكەتتىك ۋنيۆەرسيتەتىندە «نۇر وتاننىڭ» باستاماسىمەن اشىلعان ءىت-ورتالىققا جانە وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىندە جۇمىسىن باستاعان ءىت-سىنىپتارعا باردى. سونداي-اق پارتيا ءتوراعاسىنىڭ ءبىرىنشى ورىنباسارى «رۋحاني جاڭعىرۋ» باعدارلاماسى جانە بيزنەستىڭ الەۋمەتتىك جاۋاپكەرشىلىگى اياسىندا سالىنعان مۇمكىندىگى شەكتەۋلى بالالارعا ارنالعان «ايگەرىم» ارناۋلى كوررەكسيالىق بالاباقشاسىنا بارىپ، بۇل سالا ۇنەمى پارتيانىڭ باستى نازارىندا ەكەنىن ايتتى.
ساپار سوڭىندا پارتيا ءتوراعاسىنىڭ ءبىرىنشى ورىنباسارى «نۇر وتان» پارتياسىنىڭ شىمكەنت قالالىق فيليالىنىڭ كونفەرەنسياسىنا قاتىستى. وندا پارتيا قالالىق فيليالىنىڭ ءتوراعاسى بولىپ شىمكەنت اكىمى عابيدوللا ءابدىراحىموۆ سايلاندى.
