بۇگىن جاركەنتتەگى پانفيلوۆ اۋداندىق سوتىندا وتباسىنا جەتۋ ءۇشىن جۇڭگو مەن قازاقستان شەكاراسىن زاڭسىز كەسىپ وتكەن سايراگۇل ساۋىتبايدىڭ كەزەكتى سوت وتىرىسى ءوتتى. وندا ەلدىڭ ءار وڭىرىنەن جۇزگە جۋىق جۋرناليست پەن قوعام بەلسەندىلەرى قاتىستى. سونىمەن قاتار قازاقستاندىق ءانشى مەرۋەرت تۇسىپبايەۆا دا بالالارىنا اسىققان انانى قولداپ، سوت وتىرىسىنا كەلدى، دەپ حابارلايدى Qamshy.kz اقپارات اگەنتتىگىنىڭ ءتىلشىسى.

سوت عيماراتى الدىندا جۋرناليستەرگە بەرگەن سۇحباتىندا تۇسىپبايەۆا سايراگۇلدىڭ سوتىنا ءانشى رەتىندە ەمەس، بۇكىل انالاردىڭ اتىنان بارعانىن باسا ايتتى. 

"مەن دە بالا تاربيەلەپ وتىرمىن. سايراگۇلدىڭ شەكارانى كەسىپ ءوتىپ، جولىندا كەزدەسكەن قيىندىقتارعا قاراماستان بالالارىن ءبىر قۇشايىن دەگەن سەزىمىن انا رەتىندە جاقسى ءتۇسىنىپ وتىرمىن. انا بولعاندىقتان مەن بۇگىن سوت ماجىلىسىنە كەلىپ وتىرمىن. قازاقستاندى ءدۇر سىلكىندىرگەن بۇل ىسكە ادامدار بەيجاي قاراماسا يگى بولار ەدى. اناسى مەن بالاسىن بىر-بىرىنەن اللا عانا ايىرا الادى، ادامنىڭ بۇعان قاقى جوق. مەن ءانشى رەتىندە ەمەس بارلىق انالاردىڭ اتىنان كەلىپ وتىرمىن ءارى انانى بالاسىنان ايىرماۋى كەرەك ەكەنىن تاعى دا قايتالاپ ايتامىن"، - دەدى مەرۋەرت تۇسىپبايەۆا. 

ۆيدەو قازىبەك يسانىڭ پاراقشاسىنان الىندى

بۇعان دەيىن سايراگۇل ساۋىتبايدىڭ سوتى ەكى مارتە بولدى. 9 شىلدە كۇنى وتكەن العاشقى سوت وتىرىسى سوتتىڭ ورىس تىلىندە جۇرگىزىلگەنىنە وراي كەيىنگە قالدىرىلعان. وندا سوتتىڭ قازاق تىلىندە ءوتۋى سۇرالدى. ناتيجەسىندە تالاپ قاناعاتتاندىرىلىپ 13 شىلدەدە كەزەكتى سوت وتىرىسى ءوتتى. ايىپتالۋشى سايراۇگل ساۋىتباي قىتايدا ءوزىن ءولىم جازاسى كۇتىپ تۇرعانىن، قازاقستاندا كەز-كەلگەن جازاعا دايىن ەكەندىگىن ايتتى.

ايتا كەتەيىك، 25 مامىردا الماتىلىق بەلسەندىلەر قازاقستانعا كەلىپ، قايتپاي قويعان، سول ءۇشىن دە قاماۋدا وتىرعان سايراگۇل ساۋىتبايعا مەملەكەتتىك جانە حالىقارالىق دەڭگەيدە اراشا سۇراۋ ءۇشىن ايەلدىڭ وتباسى مەن قوعام بەلسەندىلەرى باسپا ءسوز ءماسليحاتىن وتكىزگەن. باسپا ءسوز ءماسليحاتىنا قاتىسقان سايراگۇل ساۋىتبايدىڭ كۇيەۋى ءۋالي ءسىلام قازاقستان بيلىگى مەن قوعام بەلسەندىلەرىنەن ايەلىن قىتايعا قايتارماۋ تۋرالى سۇرادى. "سوتتالسا دا، قازاقستاندا سوتتالسىن"، - دەگەن ەدى ول.