الماتىدا شىعىس اينالما جولىندا كولىك قاعىپ كەتكەن بالا پالاتاعا اۋىستىرىلدى. بۇل تۋرالى  Tengrinews.kz پورتالى حابارلادى.

بالالار جەدەل مەديسينالىق جاردەم ورتالىعىنداعى باس دارىگەردىڭ ورىنباسارى دىنمۇحامەد ءرۋزۋددينوۆتىڭ ايتۋىنشا، بالا نەيروحيرۋرگيا بولىمىندەگى پالاتاعا اۋىستىرىلدى.

"قازىرگى ۋاقىتتا بالانىڭ جاعدايى تۇراقتى اۋىر دەپ باعالانىپ وتىر. بۇگىن ونى نەيروحيرۋرگيا بولىمىنە اۋىستىردىق. بالا اناسىمەن بىرگە جاتىر. سويلەي الادى، تاماق ىشە الادى. بارلىق قاجەتتى ەمدى الىپ جاتىر. ءبىراق بالا ءالى دە ءالسىز. ونىڭ قانشا ۋاقىتتا قالپىنا كەلەتىنىن ايتۋ وتە قيىن. بالا اشىق باس مي جاراقاتىن الدى، وتا جاسالدى"، - دەدى دارىگەر.

ونىڭ بولجاۋىنشا، بالا 2-3 اپتادا اۋرۋحانادان شىعارىلادى. ەندى ول وسى ۋاقىت ارالىعىندا ەم الادى، ۆيتامين قابىلدايدى. ال بالانىڭ اناسى ازيزا اسكار-وعلى ۇلى مۇحاممەدتىڭ ءالى سويلەي المايتىنىن ايتادى.

"ازىرشە سويلەي المايدى، دارىگەرلەر قالپىنا كەلۋ ءۇشىن ۋاقىت قاجەت ەكەنىن ايتادى. ءقازىر ول سۇراقتارعا قويعاندا، قاراپ، كۇلىپ قويادى. كوڭىل-كۇيى وزگەرىپ تۇرادى، كەيدە جىلاپ جىبەرەدى دە. ءبىراق وزدىگىنشە تاماقتانا الادى"، - دەيدى.

سونداي-اق، اناسى وقيعانىڭ قالاي بولعانىن ايتىپ بەردى.

"بالا اۋلادا جۇرگەن بولاتىن. مەن ونى كۇيەۋىممەن جۇرگەن شىعار دەپ ويلادىم. ءبىراق ول جۇمىسقا كەتىپ قالعان بولىپ شىقتى. بالانىڭ قاسىندا مەن بولدى دەپ ويلاعان. ءبىراق ۇلىمىز كەنەتتەن جوق بولىپ كەتتى. ونى ايالداماعا دەيىن ىزدەپ باردىم. سوسىن پوليسياعا حابار بەردىم. ولار بولسا سول جەردە جول اپاتى بولعانىن ايتتى. ءبىز ارتىنشا سوندا باردىق"، - دەيدى زارداپ شەككەن بالانىڭ اناسى.

وسى جاعدايعا دەيىن مۇحاممەد بالاباقشاعا بارىپ جۇرگەن ەكەن.

ەسكە سالايىق، وسىعان دەيىن شىعىس اينالما اۆتوجولىندا بالانى كولىك قاعىپ كەتكەنى تۋرالى حابارلانعان ەدى. الەۋمەتتىك جەلىدە تاراعان مالىمەتكە سايكەس، "بالانى كورپەگە وراپ، بريانسكايا كوشەسىندەگى اعاشتىڭ تۇبىندە تاستاپ كەتكەن".

الايدا جول اپاتى بولعان جەر بالا تابىلعان جەردەن الىسىراق بولعان. دارىگەرلەردىڭ ايتۋىنشا، بالا ءۇشىنشى دەڭگەيلى كوما جانە ءتورتىنشى دەڭگەيلى تراۆماتيكالىق شوك العان جاعدايىندا بالالارعا شۇعىل جاردەم كورسەتۋ ورتالىعىنا تۇسكەن. وعان جەدەل وتا جاسالعان. 

ال كەيىنىرەك وقيعانىڭ ۆيدەوسى جاريالانعان ەدى.