بۇرىنعى وڭتۇستىك قازاقستان، قازىرگى تۇركىستان وبلىسىنداعى اباي اۋىلىنىڭ زورلاندى دەگەن جەتى جاسار تۇرعىنىن قورعاپ جۇرگەن ادۆوكات باۋىرجان ازانوۆقا قارسى ءىس قوزعالدى، دەپ حابارلايدى Qamshy.kz اقپارات اگەنتتىگى.

باۋىرجان ازانوۆتىڭ ايتۋىنشا، ادۆوكاتقا قارسى ق ر قك 274-بابىنىڭ 2ء-بولىمىنىڭ 3-بولىمشەسىنە سايكەس، تۇركىستان وبلىسىندا وزىنەن ۇلكەن سىنىپتا وقيتىن بالالاردىڭ تاراپىنان بىرنەشە مارتە زورلىق كوردى دەگەن 7 جاسار بالاعا قاتىستى جازىپ ءارى سۇحبات بەرگەنى ءۇشىن ايىپ تاعىلىپتى.

ايتا كەتەرلىگى، باۋىرجان ازانوۆ زارداپ شەگۋشى بالانى تەگىن قورعاپ ءجۇر. ايتۋىنشا، بالانىڭ قۇقىعىن قورعاۋ ءۇشىن ارى-بەرگى جول اقىسىن دا ءوز قالتاسىنان شىعارعان.

«مۇنىڭ ءبارىن مەن تەك بالانىڭ مۇددەسى ءۇشىن جاسادىم. كىنالىلەردى تاۋىپ، سوتتىڭ الدىنا جەتەلەپ اپارعىم كەلەدى. بار بولعانى سول. ءوزى ىسىممەن اينالىستىم، وزگەسىنە باس سۇقپادىم. سوندا قالاي، ادامدارعا جاساعان جاقسىلىعىڭ وزىڭە جاماندىق اكەلەدى مە؟ الدە بىزگە سەنىپ وتىرعان ادامداردى تولىق قورعاي المايمىز با؟ ايتەۋىر ءبىر كۇنى ايىپتالادى ەكەنمىن دەپ ەشكىمدى قورعامايىق پا؟ ادۆوكاتتىق قىزمەتكە گارانتيا بار ما بۇل قوعامدا؟»، - دەپ اشىندى باۋىرجان ازانوۆ ءوزىنىڭ Facebook-تەگى پاراقشاسىندا.

كىشكەنتاي عانا ءبۇلدىرشىننىڭ قۇقىعىن قورعاۋدا تەگىن جۇمىس ىستەپ جۇرگەن ادۆوكاتتى ەندى حالىق قورعاپ جاتىر. قوعام بەلسەندىلەرى باۋىرجان ازانوۆتى قورعاۋ ءۇشىن قازاقستان ازاماتتارىنان قول جيناماق.

«الماتىلىقتار مەنى قولداۋ ءۇشىن قول جيناماق. 25 شىلدەدە سەيفۋللين كوشەسىنىڭ بويىنداعى مەگا ساۋدا ورتالىعىنا مەن ءۇشىن جينالماقشى»، - دەگەن باۋىرجان ازانوۆ تاڭ قالىسىن جاسىرمادى.

ال قوعام بەلسەندىلەرى زارداپ شەككەن قازاقستاندىقتى، ونىڭ ۇستىنە كىشكەنتاي بالانىڭ قۇقىعىن مەملەكەتتەن دە، قورعالۋشى تاراپتان دا ءبىر تيىن الماي قورعاپ جۇرگەن ادۆوكاتقا زاڭ تيىسپەۋ كەرەك دەپ سانايدى.

«ازعىنداعان زاماندا جەتى جاسار بالانى قورلاۋشىلار ەمەس قورعاۋشىلاردىڭ ارتىنا شىراق الىپ تۇسەدى. زورلاندى دەگەن جەتى جاسار سارىاعاشتىق بالانى العاش رەت وتەماقىسىز قورعاۋشى ادۆوكات باۋىرجان ازانوۆتىڭ ۇستىنەن ءىس قوزعالىپتى. وۋ، اعايىن، بۇل نەتكەن سۇمدىق! زورلانعان بالانىڭ اقىسى كەتتى. ەندى ونى قورعاۋشىسىنىڭ وزىنە ءىس قوزعالۋدا»، - دەپ جازعان باۋىرجان جاقسىبايەۆ حالىقتى قول قويۋعا شاقىردى.  

بيىل مامىردا قازىرگى تۇركىستان وبلىسى اباي اۋلىنىڭ تۇرعىنى "نەمەرەم بىرنەشە جىل بويى زورلانىپ كەلگەن" دەپ بۇكىل قازاقستاندى ءدۇر سىلكىندىرگەن ەدى. ايتۋىنشا، جەتى جاستاعى بالاسىن ۇلكەن سىنىپتىڭ وقۋشىلارى بىرنەشە مارتە زورلاعان. ءتيىستى ورگاندارعا شاعىم تۇسىرگەنىمەن العاشىندا تىرپ ەتكەن ءتىرى جان بولمادى. ال قازىرگى ۋاقىتتا بالانىڭ جاعدايىنا قازاقستاندىقتاردىڭ ءبارى دەرلىك الاڭداۋلى.