دەپۋتات قايرات قۇدايبەرگەن ورتالىق بالالار اۋرۋحاناسىنداعى دارىگەرلەردىڭ ايتقانىن تەرىسكە شىعاردى.

اعاش تۇبىنەن توسەنىشكە وراۋلى كۇيدە تابىلعان بالاعا قاتىستى كەشە الماتى قالاسىندا باسپا ءسوز ءماسليحاتى وتكەن بولاتىن. وندا قاتىسقا ورتالىق بالالار اۋرۋحاناسىنىڭ باس دارىگەرى «كومەكتەسەمىن دەگەن قايرات قۇدايبەرگەن ەشتەڭە دە ىستەگەن جوق» دەپ مالىمدەگەن.

ءتىپتى دەنساۋلىق ساقتاۋ باسقارماسى باسشىسىنىڭ ورىنباسارى نۇرجان يسابەكوۆ تە باس دارىگەردىڭ ءسوزىن راستاپ، دەپۋتاتتىڭ زارداپ شەككەن بەس جاسار بالا ءۇشىن ساۋساعىنىڭ ۇشىن دا قيمىلداتپاعانىن ايتتى.

الايدا قايرات قۇدايبەرگەن holanews.kz تىلشىلەرىنە بالانىڭ وتباسىنا قالاي كومەكتەسكەنىن تاپتىشتەپ ايتىپ بەردى.

«وقيعا جايلى الەۋمەتتىك جەلىدەن ءبىلدىم. اكەسىنىڭ ءنومىرىن تاۋىپ، بىردەن بايلانىسقا شىقتىم. تاڭعا جۋىق مۇحاممەدتىڭ اكەسى ەكەۋمىز باس دارىگەرگە باردىق. ونىڭ نەگە ونداي سوزدەردى ايتقانىن تۇسىنە الماي تۇرمىن. مەن اۋرۋحاناعا بارمايىنشا، باس دارىگەر بالانىڭ اتا-اناسىن ءتىپتى قابىلداماعان. دارىگەرگە ءوزىم كىرىپ، جاعدايدى ءتۇسىندىرۋىن تالاپ ەتتىم. ول ەشكىمنىڭ كەلمەگەنىن، حابارلاسپاعانىن ايتتى. ال مەن ول كىسىلەردىڭ تاڭنان بەرى اۋرۋحانادا ەكەنىن ءتۇسىندىردىم. ءسويتىپ باس دارىگەردى بالانىڭ اتا-اناسىنا ەرتىپ اپاردىم. بۇل ماسەلەنى ءبارىمىز بىرگە تالقىلادىق. دارىگەر باسقاشا سايراي باستادى. بالا ءۇشىن قولدارىنان كەلگەنىنىڭ ءبارىن ىستەپ جاتقانىن ايتتى. ال مەنەن بۇل اقپاراتتى تاراتپاۋىن ءوتىندى. سەبەبى بالانىڭ جاعدايى 50-دە 50 بولىپ تۇرعان ەدى. ەگەر بالاعا ءبىر جاعداي بولىپ قالسا، باس دارىگەر جاۋاپكەرشىلىكتى موينىنا العىسى كەلمەدى. مىنە، وسىنداي اڭگىمە بولدى»، - دەپ ءتۇسىندىردى دەپۋتات.

«كەيىن قاجەتتى قاراجاتتىڭ ءبارىن ءوزىم تولەپ بەرەتىنىمدى ايتتىم. ءبىراق دارىگەر بالانىڭ تەگىن ەمدەلىپ جاتقانىن ايتتى. اناسىنا بالاسىن كورسەتۋىن دە سۇرادىم، رۇقسات ەتپەدى. كەلەسى كۇنىتىپتى تۇتقاسىن كوتەرمەدى. اناسىن 17 ساعاتتان سوڭ كىرگىزەتىن بولدى. بالانىڭ جاعدايى قالپىنا كەلە باستاعان سەكىلدى بولدى. ءبىراق دارىگەر ونى ايتقىسى كەلمەدى، سەبەبى بالاعا بىرنارسە بولىپ قالۋى عاجاپ ەمەس ەدى. باقسا دا دارىگەرلەر، حيرۋرگتەر قولدارىنان كەلگەنىن جاساپ جاتتى، ونى ءوز كوزىممەن كوردىم.

بىرنەشە كۇن وتكەننەن كەيىن «تاعى نە ىستەي الامىز؟» دەپ سۇرادىم. ءتىپتى اكەسىنەن بالانى جەكە پالاتاعا اۋىستىرۋدى سۇرادىم. اقشاسىن ءوزىم تولەيتىنىمدى ايتتىم. كەيىن كومەكشىمدى جىبەرىپ، بالانى جەكە پالاتاعا اۋىستىردىق. ول ءۇشىن 86 مىڭ تەڭگە تولەدىك. اناسى بالاسىن ءجيى كورىپ تۇرعانىن قالادىق. ءتىپتى بارلىق ەمىن ءوزىمىز تولەگىمىز كەلدى. الايدا تەك اقىلى ءبولىمدى عانا تولەۋ كەرەك ەكەن. كەيىن دارىگەر سۇيەگىن قالپىنا كەلتىرۋ كەرەكتىگىن ايتتى. مەن بار شىعىندى ءوز موينىم الماقشى بولدىم. ءبىزدىڭ «ترانسفورماتور» اتتى كلۋبىمىز بالانى قولداۋعا دايىن ەدى. ءبىراق دارىگەرلەر اقشانى قابىلداماپتى. مەدبيكەلەر بار اقشانى اكەسىنە قايتارعانىن ەستىدىم. ال مەن ءبىر تيىنىن دا العان جوقپىن. ءتىپتى ءوزىم اۋرۋحاناعا بارماسام دا، اكەسى مۇراتپەن بايلانىستا بولدىق. ال دارىگەرلەر جۋرناليستەردى جيناپ الىپ، مەنى كومەكتەسپەدى دەپ ايتقان. شىنى كەرەك، تاڭىرقاپ قالدىم»، - دەدى قايرات قۇدايبەرگەن.

ءوز كەزەگىندە مۇحاممەدتىڭ اكەسى دە قايرات قۇدايبرگەنىنڭ كومەكتەسكەنىن جەتكىزدى. ايەلىنىڭ نەگە ولاي دەگەنىن مۇراتتىڭ ءوزى تۇسىنبەي دال. ايتۋىنشا، دەپۋتاتتىڭ ءوزى كەلمەسە دە كومەكشىلەرىن جىبەرىپ تۇرادى. ال قۇدايبەرگەننىڭ ءوزى قالا سىرتىندا جۇرگەن كورىنەدى. ءتىپتى Instagram-داعى پاراقشاسىنا سالعان سۋرەتتى دە قايرات قۇدايبەرگەننىڭ كومەكشىلەرى ءتۇسىرىپ، وعان جىبەرگەن ەكەن.