شىمكەنت قالاسىنىڭ تۇرعىنى روزا بەكەتايەۆانىڭ «جيىرما كۇن» دەگەن تاقىرىپپەن فەيسبۋكتە جاريالاعان تومەندەگى مىنا جازباسى ەشكىمدى بەيجاي قالدىرا قويماس. تاپا تال تۇستە ءوز مۇلكىڭىزدى قورعايمىن دەپ اجال قۇشساڭىز تاڭ قالمايتىن بولدىق. ەندى كۇن شاقىرايىپ تۇرعان كەزدە تۇرعىن ءۇيدىڭ ادامدارى ءوز ۇيلەرىنە كىرۋدەن قورقاتىن بولدى. «سەبەبى اينالا تولعان بۇزاقىلار. ولار پوليسيادان قورىقپايتىن بولدى. پوليسيا ولاردى اڭدىمايتىن بولدى» دەيدى جازبانىڭ استىنا پىكىر قالدىرۋشىلار.

وقىرمان نازارىنا روزا بەكەتايەۆانىڭ تومەندەگى جازباسىن ۇسىنامىز:

«مەنىڭ شىمكەنت قالاسى، ءال-فارابي ءاىىب ارىز جازعانىما بۇگىن تۇپ-تۋرا 20 كۇن. 
تۋرا وسىنشا كۇن تىنىشتىق، تىرپ ەتكەن پوليسەيدى كورمەدىم. تىم-تىرىس!
تۋرا وسىنشا كۇننەن بەرى مەن جانە كورشىلەرىم الگى بۇزاقى تاعى داقايتا اينالىپ كەلىپ، جاس بالالارعا الىمجەتتىك جاساپ، قورقىتىپ، توناپ، ءتىپتى زورلاپ كەتە مە دەپ الاڭداۋلىمىز!
بىلاي بولدى. 5 شىلدە. كەشكى ساعات 19.30 شاماسى. جۇمىستان قايتقانمىن. پودەزد. مەن 2 قاباتقا جەتكەندە جوعارىدان تومەن قاراي ءبىر جىگىت ءتۇسىپ كەلە جاتتى. ءبىراق ول سىرتقا شىققان جوق. كىلت بۇرىلىپ، مەنىڭ سوڭىمنان ەردى.
سوڭعى ءبىر ايدىڭ شاماسىندا ونى ءبىزدىڭ "دومنان" ەكى رەت كورگەنمىن. بىرىندە پودەزدە تەمەكى شەگىپ تۇرعانىنا ۇرىسقانمىن. سوندىقتان ءتۇرى ەسىمدە قالىپتى. 20-25 جاس شاماسىنداعى قىرما ساقالى بار تۇرىككە ۇقسايتىن جىگىت. 
بۇرىن كورگەندىكتەن تۇرعىنداردىڭ ءبىرىنىڭ تۋىسى نە دوسى دەپ ويلاپ، كۇدىكتەنبەدىم. 
ءبىراق...مەنەن وزىپ كەتسىن دەپ جاي جۇرسەم، ول دا جاي، مەن تەزدەتسەم، ول دا اسىعا جونەلەتىنى ۇناماي قالدى. تەلەفونىمدى شۇقىلاعان بولىپ توقتاپ ەدىم، ول دا توقتادى. "وزىپ كەتشى" دەپ ايتپاققا بۇرىلا بەرسەم، الگى ماعان شابۋىلداۋعا دايىن تۇر ەكەن. سومكەم، سوتكامدى قىسا ۇستاعان بويى قۇستاي ۇشتىم. ول قۋا جونەلدى. كورشىلەر ەستىسىن دەپ ايقايلاپ قويامىن. ءبىراق ول قايمىعاتىن ەمەس. يىققا قولى جەتكەندە جۇلقىلاپ ۇلگەرىپ جاتتى. 
نە كەرەك، الگى تۇرىك تەكتەس بەيتانىس مەنى ەسىگىمنىڭ الدىنا دەيىن قۋىپ باردى. ابىروي بولعاندا ۇيدە بالام جانە ءىنىم بار ەدى. مەنىڭ جانۇشىرعان داۋسىمدى ەستىپ، ەسىك اشىپ، "نە بولدى، نەگە ايقايلادىڭىز؟" دەپ سۇراپ جاتىر. 13-تە عانا بولعانمەن، داۋىستارى جۋانداپ كەلە جاتقان "پەرەحودنوي ۆوزراستتاعى" بالالار عوي. 
قۋىپ كەلە جاتقان قاراقشىم وسى كەزدە كىلت توقتادى. ايتپەسە...
ايتپەسە جۇگىرىپ كەلە جاتىپ شەشىپ ۇلگەرگەن بەلبەۋىمەن ۇرسا نەمەسە قىلقىندىرسا... قۇداي ساقتاسىن! دالا قاراڭعى، پودەزد قاراڭعى بولسا ءبىر ءسارى. اينالا جاپ-جارىق، كۇن باتپاعان ءارى جۇرتتىڭ ءبارى جۇمىستان قايتىپ جاتاتىن قاۋىرت شاقتا ەشنارسەدەن تايسالماي بۇلاي شابۋىلداعان جان ەرەسەكتەر تۇگەل جۇمىستا، بالالار پاتەرلەرىنە وزدەرى كىرىپ-شىعىپ جۇرگەن تاپا-تال تۇستە بىرەۋىن ءولتىرىپ، ەكىنشىسىن زورلاپ كەتۋدەن، ۇيلەرىن توناپ، ورتەپ جىبەرۋدەن تايىنبايتىنى انىق!
مەن 102-گە 2 رەت "زۆوندادىم". كوتەرگەن جان بولمادى. (ولاردىڭ تۇتقانى الۋى "ازاپ" ەكەنىن وتكەندە ادۆوكات بولات دوسىبەكوۆ تە ءوز پاراقشاسىندا جازعان بولاتىن). 
ۋچاستكوۆىيعا 5-6 رەت زۆونداپ ءجۇرىپ، تۇنگى 11.30-دا زورعا شاقىرىپ الدىق-اۋ.
ولار كەلگەنشە جاس بالالارى كۇنىمەن پودەزدە ءوز بەتىنشە ويناپ، كىرىپ-شىعىپ جۇرەتىن بىرنەشە وتباسىعا ەسكەرتىپ، بالالارعا اباي بولۋىن تاپسىردىم. قىزىق الدە سۇمدىق دەيىن بە، وسى جەردە ءمالىم بولدى! الگى مەنى قۋالاپ جۇرگەن "مانياك" سودان تۋرا 1 اپتا بۇرىن جوعارى قاباتتا تۇراتىن د. ەسىمدى كەلىنشەكتى دە پاتەرىنە دەيىن "اڭدىپ" بارعان. كۇندىز! تاپا-تال تۇستە! امال جوق، اشىعىن ايتايىن، ول كەزدە دە الگى سۇم بەلبەۋىن شەشىپ العان! 
انىقتاعانىمىز، ول ەشكىمنىڭ تۋىسى، تانىسى ەمەس ەكەن. ونى پودەزدە 3-4 كورشى كورگەن. ءبارى دە ەشكىمنىڭ ۇيىنە كىرمەي، اينالشىقتاپ جۇرەدى دەيدى. ءبىر ايدان بەرى...
مۇمكىن تورۋىلداپ، ەرەسەكتەرى جۇمىستا، بالالارى قاراۋسىز پاتەرگە توناۋعا دايىندالىپ جۇرگەن شىعار؟ 
بەلبەۋىن شەشكىش سۇم ەكەن، بالالاردىڭ ءبىرىن زورلاپ كەتسە شە؟
ءبارى مۇمكىن عوي!
تاپا-تال تۇستە ايەلدەردى قۋالاپ جۇرگەن مۇنداي سۇمنان ءبارى شىعادى! 
... بۇل ماسەلە بويىنشا مەن ارىز جازدىم، "وپەرگە" قىلقىلداپ ءجۇرىپ فوتوروبوت جاساتتىم. پودەزگە ءىلىپ قويسام، بالالار دا، تۇرعىندار دا ساق بولار دەگەن ويىم بار ەدى. ءبىراق ونى قولعا بەرمەدى. بولمايدى دەدى. 
وسى جەردە ءبىر سۇراق تۋىندايدى: عالامتوردا كۇدىكتىلەر مەن قىلمىسكەرلەردىڭ فوتوروبوتى تۇرماق بەينەجازباسى مەن سۋرەتتەرى دە جۇرەدى عوي. ال بۇل جاعدايدا نەگە رۇقسات جوق بولىپ قالدى؟
جارايدى، ونى قويا تۇرايىن. ايتايىن دەگەنىم، بۇل ارىز بويىنشا تىرس ەتىپ قوزعالعان پوليسەي بولعان جوق. تاپ سول "قاراقشى" قۋعان د-دان دا ەشقايسىسى ەشتەڭە سۇرامادى.
تىم-تىرىس!
جيىرما كۇننەن بەرى!!!
ءۇش اپتا بۇرىن كەلگەن مىنا ءسمس-تى قۇشاقتاپ ءالى وتىرمىن..."