دەنيس تەننىڭ اناسى وكسانا تەن حالىققا ۇندەۋ جولدادى، دەپ حابارلايدى قازاقپارات.
«قايعىمىزدى ءبولىسىپ، وسىنداي قىسىلتاياڭ شاقتا وتباسىمىزعا قولداۋ كورسەتكەنى ءۇشىن بۇكىل قازاقستان حالقىنا جانە حالىقارالىق قاۋىمداستىققا دەنيس تەننىڭ تۋىستارىنىڭ اتىنان راحمەت ايتقىم كەلەدى. اسىرەسە نۇرسۇلتان ءابىش ۇلى نازاربايەۆقا ايتار العىسىمىز ەرەكشە. پرەزيدەنت ءارقاشان دەنيسكە قولداۋ كورسەتىپ، كومەكتەسۋمەن بولدى. سونىمەن قاتار، مەملەكەتتىك ورگاندار مەن اكىمدىككە دە كورسەتكەن قولداۋلارى ءۇشىن كوپ راحمەت. قارا جامىلعان كۇننەن بەرى قازاقستاندىق جانە حالىقارالىق ب ا ق وكىلدەرى بىرنەشە رەت حابارلاستى. دەنيستەن ايرىلىپ قالعانىمىزعا ءالى دە سەنە الماي، قايعىدان ەس جيا الماي ءجۇرمىز، سوندىقتان ءدال ءقازىر جۋرناليستەردىڭ سۇراقتارىنا جاۋاپ بەرۋگە ال-دارمەنىمىز جەتەر ەمەس. ءبىزدىڭ ورتاق قايعىمىزعا، سونداي-اق سۇحبات بەرۋگە دايىن ەمەستىگىمىزگە تۇسىنىستىكپەن قاراۋلارىڭىزدى وتىنەمىز. ۇلىمىزدىڭ ابىرويلى ەسىمىن جادىمىزدان شىعارماي، تەك قانا جاقسى سوزبەن ەسكە الايىقشى»، - دەدى وكسانا تەن.
ەسكە سالساق، قازاقستاندىق مانەرلەپ سىرعاناۋشى دەنيس تەن 19 شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى مەن بايسەيىتوۆا كوشەلەرىنىڭ قيىلىسىندا 19 شىلدەدە تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن.
2،5 ساعاتقا جالعاسقان رەانيماسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى.
ادام ءولتىرۋ بابىمەن قىلمىستىق ءىس قوزعالدى.
كەيىن بەلگىلى بولعانداي، سپورتشىنىڭ ولىمىنە قاتىسى بار ەكى كۇدىكتىنىڭ ءبىرى ۇستالىپ، ول قىلمىسىن مويىندادى. ەكىنشى كۇدىكتى - 1994 جىلى تۋعان قىزىلوردا وبلىسى، قارماقشى اۋدانى، اقاي اۋىلىنىڭ تۋماسى ارمان قۇدايبەرگەنوۆكە ىزدەۋ جاريالاندى.
سونداي-اق، دەنيس تەننىڭ ولىمىنە كۇدىكتى نۇرالى قياسوۆ كۇزەتپەن المالى اۋداندىق سوتىنا جەتكىزىلگەن.
ال دەنيس تەننىڭ ءولىمى بويىنشا كۇدىكتى ەكىنشى ادام ارمان قۇدايبەرگەنوۆ ۇستالدى.
پىكىر قالدىرۋ