شوقان ەسىمدى بالا شىمكەنتتە دۇنيەگە كەلگەن. ءقازىر ونىڭ مەرحيور دەگەن ەكىنشى ەسىمى بار. ول فرانسيا استاناسى پاريجدە تۇرادى. شىمكەنتتەگى مامانداندىرىلعان بوبەكتەر ۇيىنە 11 جىلدان كەيىن كەلىپ وتىر.

شوقاننىڭ اناسىنىڭ ايتۋىنشا، شوقان ەتتى جاقسى كورەدى. ايراندى دا ءسۇيسىنىپ ىشىەدى ەكەن. الايدا فرانسيادا بۇل ءونىمدى تابۋ قيىن كورىنەدى.

شوقاندى اسىراپ العان اناسى ونىڭ ەسىمىن وزگەرتپەي، ەكىنشى ات بەرگەن. ونىڭ شىققان تەگىن، تۋعان جەرى تۋرالى دا ايتقان. شوقان تاريحي وتانىن كورگىسى كەلگەندىگىن ايتقاندا، اناسى قارسىلىق بىلدىرمەگەن.

ولار استانادا بولعان. ءقازىر شىمكەنتتە. كەلەسى ايالداما – تۇركىستان ەكەنىن ايتادى.

شوقاننىڭ اناسىنىڭ ايتۋىنشا، فرانسيادا اسىراندى قازاق بالالار كوپ. ولار بىرىگىپ قازاق ءتىلىن ۇيرەنىپ ءجۇر. باستاپقى كەزدە قازاق ءتىلى ءمۇعالىمىن تابۋ قيىنعا سوققان. ءقازىر بالالاردى فرانسيادا ءبىلىم الىپ جاتقان قازاقستاندىق ستۋدەنت وقىتىپ جاتىر.