بۇگىن ق ر پرەزيدەنتى نۇرسۇلتان نازاربايەۆتىڭ قاتىسۋىمەن قۇرىق پورتىنداعى مۋلتيمودالدىق كولىك حابىن تانىستىرۋعا ارنالعان سالتاناتتى شارا وتەدى، دەپ حابارلايدى قازاقپارات. 

وسى ايتۋلى شاراعا وننان استام ەلدەن كەلگەن كولىك-لوگيستيكالىق كومپانيالاردىڭ وكىلدەرى قاتىسۋدا. ولاردىڭ اراسىندا ازەربايجان، يران، جۇڭگو، ءباا، رەسەي، تاجىكستان، تۇركىمەنستان، تۇركيا، وزبەكستان جانە باسقا دا ەلدەردىڭ ماماندارى بار. 

ايتا كەتەيىك، قۇرىق پورتى كاسپيي تەڭىزىنىڭ شىعىس جاعالاۋىندا ورنالاسقان. اۋا رايىنىڭ قولايلىلىعىنا بايلانىستى پورتتا قىسى-جازى توقتاۋسىز اۆتوكولىك پەن تەمىرجول پارومى جۇمىس ىستەيدى. كاسپيي تەڭىزى ارقىلى باتىس باعداردا ەكسپورتتىق الەۋەتتى كۇشەيتۋ ءۇشىن پاروم قىزمەتىن قولدانۋ جايى مەملەكەت باسشىسىنىڭ 2014 جىلعى 11 قاراشاداعى «نۇرلى جول -بولاشاققا باستار جول» اتتى جولداۋىندا ايتىلدى. «نۇرلى جول» مەملەكەتتىك باعدارلاماسىنىڭ سينەرگيالىق جوباسى قۇرىق پورتىندا قوسارلانعان تەحنولوگيالىق ينفراقۇرىلىمدى جاساقتاۋعا مۇمكىندىك بەردى. بورجاقتى-ەرساي تەمىرجول جەلىسى سالىنىپ، پورت ايدىنىنا تىرەلدى. قازىرگى كەزدە اقتاۋ مەن قۇرىق پورتىن جالعايتىن ءۇشىنشى تەحنيكالىق كاتەگورياداعى ەكى جولاقتى جولى سالىنۋدا. سونىمەن قاتار، اتىراۋ- استراحان جولى سالىنۋدا. بۇل ەكى جولدى سالۋداعى ماقسات - وزبەكستان، رەسەي، قىتايمەن جۇك جەتكىزۋ مەرزىمىن ازايتىپ، تاۋار اينالىمىن كۇشەيتۋ. بۇل ەل ەكونوميكاسىن دامىتۋدا جاڭا مۇمكىندىكتەرگە جول اشادى. جوبا اياسىندا اقتاۋ پورتىنىڭ سولتۇستىك جاعالاۋىن كەڭەيتۋ كەزىندە ءۇش تەرمينالدىق نىسان ىسكە قوسىلدى. بۇل ءوز كەزەگىندە باستى جۇكتەردى وتكىزۋ كولەمىن ەكى ەسەگە ءوسىردى.

ەستەرىڭىزدە بولسا، قۇرىق پورتىنداعى وتكىزۋ كەشەنى نىساندارىنىڭ قۇرىلىسى 2015 جىلى ساۋىردە باستالدى. 2016 جىلعى 6 جەلتوقساندا مەملەكەت باسشىسىنىڭ قاتىسۋىمەن وتكىزىلگەن جالپىۇلتتىق تەلەكوپىر كەزىندە پورتتىڭ العاشقى وتكىزۋ كەشەنى مەن تەمىرجول جولى ىسكە قوسىلدى.

«قۇرىق پورتى ءبىزدى كاۆكاز بەن ەۋروپاعا شىعارادى. بۇل - ءبىزدىڭ جاڭعىرتۋدى دامىتۋداعى كوپتەن كۇتكەن جوبامىز»،-دەپ اتاپ ءوتتى ن. نازاربايەۆ. 

ال 2017 جىلعى 6 جەلتوقساندا جالپىۇلتتىق تەلەكوپىر كەزىندە قۇرىق پورتىنداعى اۆتوكولىك ايلاعى مەن اۆتوموبيل پارومىنا ارنالعان گيدروتەحنيكالىق عيمارات تەستىلىك رەجىمدە ىسكە قوسىلدى.  

2017 جىلى 19 قازاندا قۇرىق پورتىنىڭ تەمىرجول پارومى تەرمينالى العاشقى ميلليون توننا جۇكتى وتكىزدى. 2017 جىلى 1،5 ميلليون توننا جۇك وتكىزىلىپ، 320 كەمە پورتقا كىرگەن. 2017 جىلى جەلتوقساندا قۇرىق پورتىندا «ازەربايجان كاسپيي تەڭىز كەمە كولىگى» جاق Ro-Ro تيپىندەگى «بياستياكار گارا گارايەۆ» كەمەسىمەن جەڭىل جانە جۇك اۆتوكولىكتەرى وتكىزىلدى. پاروم كەشەنى استىق، مۇناي ونىمدەرى، تىڭايتقىش، حيميالىق زاتتار مەن باسقا دا جۇكتەردى وتكىزە الادى. مۇندا بيىلعى 7 ايدا 1،2 ميلليون توننا جۇك وتكىزىلگەن. 

پورت اۋماعىندا 4 ايماق بار: تۇسىرۋ-تيەۋ كەشەنىنىڭ وپەراسيالىق جۇمىس ورنى، تەحنولوگيالىق وپەراسيا وندىرىستىك ايماعى، جالپى پورتتىق نىساندار ايماعى جانە جولاۋشىلارمەن جۇمىس ايماعى.