مەملەكەت باسشىسى زاماناۋي دىبىس كۇشەيتكىش جانە جارىق تەحنيكاسىمەن، سونداي-اق LED ەكرانمەن جابدىقتالعان، ءبىر مەزگىلدە 1000 ءارتىس ونەر كورسەتەتىن، كوپفۋنكسيالى ساحناسىنىڭ ەنى 70 مەتر بولاتىن اشىق اسپان استىنداعى امفيتەاتردى كوردى.

نۇرسۇلتان نازاربايەۆ ونەر ادامدارىمەن اڭگىمەلەسۋ بارىسىندا اقتاۋ قالاسىنىڭ جانە ماڭعىستاۋ ءوڭىرىنىڭ قارقىندى دامىپ كەلە جاتقانىن ەرەكشە اتاپ ءوتتى.

– قۇرمەتتى ماڭعىستاۋلىقتار، سىزدەر الەمدىك تاريحقا ەنەتىن ايتۋلى وقيعاعا كۋا بولعالى تۇرسىزدار. ەرتەڭ العاش رەت بەس مەملەكەتتىڭ باسشىلارى كاسپيي تەڭىزىنىڭ قۇقىقتىق مارتەبەسىن ايقىندايتىن قۇجاتقا قول قويادى. وبلىستا تۋريزم دامىپ كەلەدى، تەڭىز پورتتارى مەن الەۋمەتتىك نىساندار سالىنۋدا. وسىنىڭ ءبارى سىزدەر ءۇشىن، بالالارىڭىز بەن سىزدەردىڭ بولاشاقتارىڭىز ءۇشىن جاسالۋدا، – دەدى قازاقستان پرەزيدەنتى.

اقتاۋ قالاسىنداعى تەڭىز جاعالاۋىندا روتوندالار، باقىلاۋ مۇنارالارى، بالالارعا ارنالعان جانە سپورتپەن شۇعىلداناتىن الاڭدار، دەمالۋشىلار ءۇشىن شاتىرلار مەن ورىندىقتار ورناتىلعان. بۇكىل جاعالاۋ بويىنا شاعىن 16 ساۋلەت نىسانى قويىلعان.