بۋحارەستە بولعان نارازىلىق شەرۋىنىڭ سالدارىنان 400-گە جۋىق ادام زارداپ شەكتى. بۇل جايىندا Qamshy.kz اقپارات اگەنتتىگى ازاتتىق راديوسىنا سىلتەمە جاساپ حابارلايدى.

رۋمىنيا حالقى بيلىككە قارسى نارازىلىق شەرۋىن ۇيىمداستىرىپ، بيلىكتىڭ وتستاۆكاعا كەتۋىن جانە جاڭا پارلامەنت سايلاۋىن ۇيىمداستىرۋدى تالاپ ەتۋدە. ولار قازىرگى سوسيال-دەموكراتيالىق پارتيانى جەمقورلىققا ايىپتاپ، «ۇرىلار پارتياسى» دەپ اتادى. ءتۇرلى دەرەكتەردە كورسەتىلگەندەي، نارازىلىق شەرۋىنە بار-جوعى 60-100 ادام قاتىسقان ەكەن. جەرگىلىكتى پوليسيا وكىلدەرى ميتينگ بولعان جەردەن 33 ادامدى تۇتقىنداعانىن ايتتى. سەگىز قىلمىستىق ءىس قوزعالعان.

نارازىلىق بىلدىرۋشىلەر بۋحارەستەگى ورتالىق الاڭعا جينالىپ، جولداردى جاۋىپ تاستاعان. كەيىننەن سۋ تولتىرىلعان بوتەلكەلەردى لاقتىرا باستاعان. وقيعا ورنىنا دەرەۋ جەتكەن پوليسيا قىزمەتكەرلەرى نارازىلىق بىلدىرۋشىلەردى قىسىپ، ولارعا قارسى ۋلى گاز، سۋ شاشاتىن قۇرالدار مەن جارىق شىعاراتىن گراناتالاردى پايدالانعان.

پرەزيدەنت كلاۋس يوحاننيس پوليسيا قىزمەتكەرلەرىنىڭ بۇل ىس-ارەكەتىن تىم قاتىگەز دەپ سىناپ، ىىم-دە تۇسىنىكتەمە بەرۋدى تالاپ ەتتى.

نارازىلىق شەرۋىنىڭ قوزعاۋشى كۇشى شەتەلدەردە وقىپ، ءبىلىم الىپ جۇرگەن رۋمىندار بولدى.

ايتا كەتەيىك، 2014 جىلى بولعان پرەزيدەنت سا يلاۋىندا كلاۋس يوحاننيس جەڭىسكە جەتكەن بولاتىن. ول ءدال سول شەتەل دياسپوراسىنىڭ قولداۋىمەن جەڭگەن ەكەن. 2016 جىلى بولعان پارلامەنت سايلاۋىندا سوسيال-دەموكراتيالىق پارتيا جەڭىپ شىققان. پرەزيدەنتتىڭ جاقتاستارى ەلدەگى سوسيال-دەموكراتيالىق پارتيانى جەمقور دەپ ايىپتاسا، پارتيا جاقتاستارى رۋمىنيا پرەزيدەنتىنە بيلىگىن اسىرا پايدالاندى دەپ ايىپ تاعۋدا.