وسكەمەن قالاسىنا جاقىن ارادا جاڭا باسشى تاعايىندالادى. بۇل جونىندە بۇگىن كەڭەيتىلگەن اكىمدىك ماجىلىسىندە وبلىس اكىمى دانيال احمەتوۆ مالىمدەدى، دەپ حابارلايدى Qamshy.kz اقپارات اگەنتتىگى altaynews.kz سايتىنا سىلتەمە جاساپ.

– سىزدەردىڭ الدارىڭىزدا اشىق ايتقىم كەلگەن تاعى ءبىر جايت، ول بيىلعى ساۋىردە ريددەر قالاسىندا شەنەۋنىكتەردىڭ قاتىسۋىمەن ورىن العان جول-كولىك وقيعاسىنا قاتىستى ماسەلە. بۇل وقيعا وسى ۋاقىتقا دەيىن قوعامدا ءجيى تالقىلانىپ، باق-تا جەتكىلىكتى جازىلدى. وقيعاعا كىنالى ريددەر قالاسى اكىمىنىڭ ورىنباسارى باۋىرجان قۇرمانبايەۆ ءتيىستى جازاسىن الىپ، سوتتالدى. سونىمەن قاتار، ريددەر قالالىق ىشكى ىستەر باسقارماسىنىڭ ءبىرقاتار باسشىلىق قىزمەتتەگى جانە قاتارداعى پوليسەيلەرى دە قىزمەتتەرىمەن قوش ايتىستى. وقيعاعا قاتىسى بار شەنەۋنىكتەردىڭ ءىسى ادەپ كەڭەسىندە قارالدى. سوندىقتان وسىنىڭ ءبارىن تارازىلاي كەلە، مەن وسكەمەن قالاسىنىڭ اكىمى قۋات تۇمابايەۆقا وسىنداي جاعدايدان كەيىن جوعارى باسشىلىق قىزمەتتە قالا المايتىندىعىن، وعان مورالدىق قۇقىعى جوقتىعىن، ءوز ەركىمەن جۇمىستان كەتۋ تۋرالى ارىز جازۋى كەرەكتىگىن ايتتىم. سوندىقتان، الداعى ۋاقىتتا وبلىس ورتالىعى – وسكەمەن قالاسىندا جاڭا اكىم تاعايىندالاتىن بولادى، – دەدى دانيال احمەتوۆ.

ەسكە سالساق، ريددەردە 19 جاستاعى ەۆگەنيي سمولنيكوۆتى كولىكپەن قاعىپ ولتىرگەن ريددەر قالاسى اكىمىنىڭ ورىنباسارى باۋىرجان قۇرمانعالييەۆتىڭ قاسىندا قۋات تۇمابايەۆ وتىرعان. ول كۋاگەر بولسا دا، حالىق الدىندا وقيعادان كەيىن ابىرويى تومەندەپ، وعان قاتىستى سىن ايتۋشىلار كوبەيىپ كەتكەن بولاتىن.