بۇگىندە ەلىمىزدىڭ وقىتۋشىلارى بىلىكتىگىن ارتتىرۋ ءۇشىن وبلىس ورتالىعىنا نەمەسە قالالارعا بارىپ ارنايى وقۋ كۋرسىنان وتەدى. بۇل ءوز كەزەگىندە قارجىلىق شىعىنعا، ۋاقىتتىڭ كوپ جۇمسالۋىنا ىقپال ەتەدى. وسىعان بايلانىستى قازاقستاندا الداعى ۋاقىتتا بىلىكتىلىكتى ارتتىرۋ كۋرستارى ونلاين فورماتتا ۇسىنىلادى دەپ جوسپارلانۋدا.

استاناداعى Astana hub تەحنوپاركىندە ەلىمىزدىڭ ءتورت ۆيسە-مينيسترلەرىنىڭ قاتىسۋىمەن «Digital Arena» فورۋمى وتكەن بولاتىن. اتالعان فورۋمدا «اشىق ميكروفون» ايدارى بولىپ، IT سالاسىنداعى بيزنەس باستاۋشىلار ۆيسە-مينيسترلەرگە وزدەرىن تولعاندىرعان سۇراقتارىن قويۋ مۇمكىندىگىنە يە بولدى. وسى رەتتە، قاتىسۋشىلار اراسىندا وتاندىق الەۋمەتتىك جەلىنىڭ جوق ەكەندىگى ايتىلىپ، ءبىلىم جانە عىلىم ۆيسە-مينيسترىنە ۇسىنىستار جاسالعان.

«ءبىز ءبىر جىلدان بەرى وتاندىق الەۋمەتتىك جەلى ازىرلەپ جاتىرمىز. ءبىز دە قازىرگى تاڭدا چات، كانال بارلىعى دايىن. بۇعان قوسا، جاڭالىقتار ءبولىمىن دايىنداپ جاتىرمىز. وسىعان بايلانىستى ءبىز الەۋمەتتىك جەلىلەر ارقىلى قوسىمشا باعدارلامالار ەنگىزگىمىز كەلەدى. مىقتى ۇستازداردىڭ ەفيرلىك ءبىلىم الۋلارىن وسى الەۋمەتتىك جەلى ارقىلى قامتاماسىز ەتسەك دەيمىز. وسىعان قاتىستى سىزدەرمەن جۇمىس ىستەسەك دەگەن نيەتىمىز بار»، – دەپ ءوز ۇسىنىسىن ءبىلدىردى IT كومپانيانىڭ ديرەكتورى.

ۆيسە-مينيستر ءوز كەزەگىندە وسى ماسەلەگە قاتىستى پلاتفورمالار جاسالىپ جاتقانىن، ونلاين جۇيە بويىنشا ءبىرقاتار ىستەر اتقارىلىپ جاتقانىن باسا ايتتى.

«ءقازىر مۇعالىمدەر جىل سايىن وبلىسقا بارىپ، بىلىكتىلىگىن ارتتىرۋ كۋرستارىنان وتەدى. بۇل ماقساتتا كوپتەگەن قاراجات جۇمسالادى. وسىعان بايلانىستى ءبىز ونلاين رەجيمدى ىسكە قوسساق دەيمىز. ءبىز مينيسترلىك وسى ماسەلەگە قاتىستى بارلىق جاعدايدى جاسايمىز ءارى قولداۋ كورسەتەمىز»، – دەدى ق ر ءبىلىم جانە عىلىم ۆيسە-مينيسترى رۇستەم ايداربەك ۇلى.

ر. ايداربەك ۇلىنىڭ ايتۋىنشا، كەز كەلگەن ۇيىمعا اۆتوماتتاندىرۋ جۇيەسى قاجەت. قازىرگى تاڭدا ەلىمىزدەگى مەكتەپتەردە ەلەكتروندى كۇندەلىكتەر كەڭىنەن قولدانىلىپ جاتىر.

سونداي-اق، ول سيتۋاسيالىق ورتالىقتار ارقىلى مەكتەپتەردەگى جاعدايدى ونلاين فورماتتا باقىلاپ وتىرۋدىڭ ماڭىزدى ەكەندىگىنە توقتالدى.

«سيفرلىق ءبىلۋ بەرۋ رەسۋرستارى بار. بۇعان قادام باسىپ جاتىرمىز.  وسىعان سايكەس، قازىرگى تاڭدا ەلىمىزدەگى مەكتەپتەردە bilimland.kz پورتالى جۇمىس ىستەيدى»، – دەدى ر. ايداربەك ۇلى.

ايتا كەتەيىك، استاناداعى Astana hub تەحنوپاركىندە ەلىمىزدەگى
4 مينيسترلىكتىڭ ۆيسە-مينيسترلەرىنىڭ قاتىسۋىمەن «Digital Arena» فورۋمى وتكەن بولاتىن. وعان ق ر دەنساۋلىق ساقتاۋ ۆيسە-مينيسترى ولجاس ابىشيەۆ، ءبىلىم جانە عىلىم ۆيسە-مينيسترى رۇستەم بيعاري، قارجى ۆيسە-مينيسترى رۋسلان ەڭسەبايەۆ جانە ەڭبەك جانە حالىقتى الەۋمەتتىك قورعاۋ ۆيسە-مينيسترى ناريمان مۇقىشيەۆ قاتىستى. ءوز كەزەگىندە ولار ەلىمىزدەگى سيفرلاندىرۋ پروسەسى مەن «سيفرلىق قازاقستان» مەملەكەتتىك باعدارلاماسىنىڭ جۇزەگە اسىرىلۋ جاعدايىن ايتتى. سونداي-اق، جاس ستارتاپەرلەردىڭ ءتيىمدى ۇسىنىستارىن قابىل الاتىندارىن، وتاندىق IT-ماماندارىن قولدايتىندارىن جەتكىزدى.