قازاقستان رەسپۋبليكاسىنىڭ دەنساۋلىق ساقتاۋ مينيسترلىگى اعىمداعى جىلدىڭ سوڭىنا دەيىن بارلىق قاجەتتى قۇجاتتاردى ەلەكتروندىق فورماتقا كوشىرۋدى جوسپارلاپ وتىر.

بيىلعى جىلدىڭ سوڭىنا دەيىن قازاقستاندىقتار دەنساۋلىق ساقتاۋ مينيسترلىگىنە قاتىستى قىزمەتتەردى ەلەكتروندىق ۇكىمەت پورتالى نەمەسە حقكو-تارى ارقىلى الا الادى.

ق ر دەنساۋلىق ساقتاۋ ۆيسە-مينيسترى ولجاس ابىشيەۆ پەن باسقا دا ۆيسە-مينيسترلەر مەن ءىرى IT-كومپانيالاردىڭ وكىلدەرى قاتىسقان «Digital Arena» ءوتتى. فورۋم شەڭبەرىندە دەنساۋلىق ساقتاۋ مينيسترلىگىنىڭ مەديسينا سالاسىن سيفرلىق تەحنولوگيالارعا كوشىرۋ، سونىڭ ىشىندە قىزمەت الۋشىلارعا قاجەتتى قۇجاتتاردى بەرۋ تولىقتاي ەلەكتروندى فورماتقا اۋىساتىنى تۋرالى مالىمدەندى.

«ءبىزدىڭ ەلەكتروندىق فورماتقا كوشۋدەگى باستى ماقسات سىبايلاس جەمقورلىق ماسەلەلەرىن ازايتۋ. ول ءۇشىن مەملەكەتتىك ورگانداردىڭ قىزمەتكەرلەرى مەن ازاماتتاردىڭ اراسىندا تىكەلەي بايلانىستى ءۇزىپ، قىزمەتتەردىڭ بارلىق ءتۇرىن ەلەكتروندىق فورماتقا كوشىرۋدەمىز. ياعني، بارلىق قىزمەتتەردى ەلەكتروندى ۇكىمەت ارقىلى (ەلەكتروندىق ليسەنزيالاۋ پورتالى) نەمەسە حقكو ارقىلى ازاماتتاردىڭ مەملەكەتتىك مەكەمەلەرمەن بايلانىسىن بارىنشا ازايتۋ ماقساتىندا جىلدىڭ سوڭىنا دەيىن تۇگەلدەي قىزمەتتەردى ەلەكتروندىق فورماتقا اۋدارۋدى جوسپارلاپ وتىرمىز»، – دەدى ولجاس ابىشيەۆ.

ول فارماسيەۆتيكالىق قىزمەتكە ليسەنزيا الۋ، پسيحوديسپانسەر جانە ناركولوگيالىق ديسپانسەرلەردەن انىقتاما الۋ، سونداي-اق 088 جانە 086 نىساندارىنداعى انىقتامالاردى الۋ سياقتى قىزمەتتەردى اتاپ ءوتتى.

«ازاماتتاردىڭ جۇمىسقا ورنالاسۋ بارىسىندا بۇل انىقتامالاردىڭ بارلىعى ەلەكتروندى فورماتتا بولادى، سول سەبەپتى مۇنداي قۇجاتتار جالعان جاسالىنبايدى، سەبەبى بۇل قۇجات دەنساۋلىق ساقتاۋ جۇيەسىندە زاڭداستىرىلعان»، – دەپ ءتۇسىندىردى ۆيسە-مينيستر.

اعىمداعى جىلدىڭ جەلتوقسان ايىنا دەيىن جۇمىس بارىسىن اتالعان فورماتقا كوشىرۋ مينيسترلىك تاراپىنان كوزدەلىپ وتىر.

سونداي-اق، ۆيسە-مينيستردىڭ ايتۋىنشا، قازىرگى ۋاقىتتا وسى جوبانى قارجىلاندىرۋدىڭ ءۇش ءتۇرى بار: اقپاراتتاندىرۋدىڭ قىزمەت كورسەتۋ مودەلى، ءمجا ءۇشىن جەكە قارجىلىق باستامالار، جانە دە مەملەكەتتىك ورگانداردىڭ جانە ۆەدومستۆولىق باعىنىشتى ۇيىمداردىڭ قاراجاتىنان قارجىلاندىرۋ.

«زەردە» حولدينگىنىڭ ۇكىمەتتىك دەڭگەيدە بەكىتىلگەن اقپاراتتاندىرۋدىڭ سەرۆيستىك ۇلگىسى بويىنشا مەملەكەتتىك ورگان الدىمەن «زەردەگە» ءوتىنىم جىبەرەدى. ودان ءارى كەرەكتى قىزمەتتەردى الۋ ءۇشىن بايقاۋ جاريالانىپ، كومپانيالاردى جيناۋ، قاراجاتتاندىرۋ «زەردە» ارقىلى جۇزەگە اسىرىلادى»،  – دەدى ول.

مەملەكەتتىك-جەكەمەنشىكتىك سەرىكتەستىكتەن قارجىلاندىرۋعا كەلەتىن بولساق، كومپانيالاردىڭ وزدەرى وسى باستامانى قولدانادى.

«كومپانيا كەلىپ، بۇل جوبانى جۇزەگە اسىرۋعا دايىن ەكەندىگىن ايتادى: «مىنە، جوبا، بيزنەس-جوسپار، قارجى مودەلى». ەگەر ۇكىمەتتىك اگەنتتىك بۇل قارجى ۇلگىسىمەن كەلىسەتىن بولسا، ءبىز «مەملەكەتتىك-جەكەشەلىك ارىپتەستىك تۋرالى» زاڭدى قاراستىرىپ كەلىسسوزدەر جۇرگىزە باستايمىز»، – دەدى ۆيسە-مينيستر.

 «ۇشىنشىدەن، مەملەكەتتىك ورگانداردىڭ نەمەسە باعىنىشتى ۇيىمدارداردىڭ قىزمەتتەرىن جۇزەگە اسىراتىن جيناقتارى بار، ولار وزدەرىنىڭ قىزمەتىن جۇزەگە اسىرادى جانە ولاردىڭ تازا پايداسىنىڭ ءبىر بولىگى رەتىندە ءبىز كىشىگىرىم جوبالاردى تىكەلەي قارجىلاندىرۋدى قاراستىرا الامىز» – دەپ اتاپ و. ابىشيەۆ.