تۇركيالىق دارىگەرلەر بالامدى بەرمەي جاتىر!  الماتىلىق كەلىنشەك داريا ۆاسيليەۆا بۇقارادان كومەك سۇراۋدا. ول وسىدان ءبىر اي  بۇرىن انادولى ەلىندە وتباسىمەن دەمالىپ ءجۇرىپ، مەرزىمىنەن ەرتە  بوسانىپ قالعان. الايدا، ءسابي شالا-جانسار تۋىلعاندىقتان شەتەلدىك  اق حالاتتىلار ونى ينكۋباتورعا ورنالاستىرىپ، كۇنىنە 3،5 مىڭ دوللاردان اقشا تولەۋىن تالاپ ەتكەن. قوماقتى قاراجاتتى قالتاسى كوتەرمەگەن كەلىنشەك امالسىز بالاسىن تاستاپ ەلگە ورالدى. ءبىراق، تۇركيا تاراپى باسقا ءۋاج ايتىپ وتىر! بۇل تۋرالى ەۋرازيا ءبىرىنشى ارناسى حابارلايدى. 
 
وقيعا ماۋسىمنىڭ 29-نان 30-نا قاراعان ءتۇنى بولعان. دەمالىستا جۇرگەن داريانىڭ كەنەتتەن ءىشى ءبۇرىپ سالا بەرىپتى. 

وتاعاسى جەدەل-جاردەم شاقىرعانىمەن بىردەن كەلە قويماپتى.تاڭعا جاقىن ءوز كۇشتەرىمەن اۋرۋحاناعا تارتىپ وتىرادى. الايدا، تولعاعى قىسقان كەلىنشەك ورتا جولدا  بوسانىپ قويادى.

«اۋرۋحاناعا دەيىن جەتىپ ۇلگەرمەدىك.جانارماي بەكەتىنەن توقتادىق! مەن سول جەردە بوساندىم. ءوز بەتىممەن! سوسىن سوندا جەدەل-جاردەم قىزمەتكەرلەرىن شاقىرتتىق!» - دەيدى قالا تۇرعىنى داريا ۆاسيليەۆا.

شالا تۋعان شاقالاقتىڭ سالماعى نەبارى 750 گرامم.

ونى تۇرىك دارىگەرلەرى ينكۋباتورعا سالىپ، انتالياداعى اۋرۋحاناعا جونەلتەدى. ءبىراق ونداعى ءبىر كۇندىك قىزمەت قۇنى 3.5 مىڭ دوللار. بۇل قاراجاتتى الماتىلىق وتباسىنىڭ قالتاسى كوتەرمەيدى، ال تۇركيا تاراپى اقشانى تولەمەسەڭدەر بالانى بەرمەيمىز دەپ قوقان-لوقى كورسەتىپتى.  

«25 شىلدە كۇنى مەن تولەۋىمىز ءتيىس قاراجات تۇرالى مالىمەت الدىرتتىم. وعان ساي ءبىز كلينيكاعا 15 مىڭ دوللار قارىز ەكەنبىز. ال، ءبىزدىڭ مەديسينالىق ساقتاندىرۋ فيرماسى بۇل شىعىندى وتەۋگە قاۋقارسىز. نەدە بولسا ءبىز بالامىزدى الىپ كەتەمىز. بۇل ءبىزدىڭ كوپتەن كۇتكەن العاشقى نارەستەمىز!» - دەيدى قالا تۇرعىنى داريا ۆاسيليەۆا.

الايدا ماسەلەگە ارالاسقان جاۋاپتى مينيسترلىك وقيعانىڭ اناۋ ايتقانداي ەمەستىگىن حابارلادى. تۇركيالىق دارىگەرلەر ولارعا داريا نارەستەدەن ءوزى باس تارتقاندىعىن جەتكىزىپتى. ويتكەنى، شالا تۋعان شاقالاقتىڭ ادام بولىپ كەتۋىنە كۇماندانعان. 

«قازىرگى ۋاقىتتا بالا سول اۋرۋحانادا جاتىر.جاعدايى جاقسى!ءبىراق، ارنايى كۇتىم قاجەت. اتا-اناسى ءتيىستى قاراجاتتى تولەگەننەن كەيىن قازاقستانعا الىپ كەتۋگە بولادى» - ق ر سىرتقى ىستەر مينيسترلىگىنىڭ وكىلى ايبەك سمادياروۆ.

كەلىنشەكتىڭ كەراعار ارەكەتى بولدى ما؟ ول جاعى ازىرگە بەلگىسىز. انىعى ەلىمىزدىڭ سىرتقى ىستەر مينيسترلىگى كومەك كورسەتۋگە دايىن. 

سونداعى كونسۋل انتالياداعى اقشاقۇمار اۋرۋحانا باسشىلىعىمەن كەزدەسۋدى ۇيىمداستىرىپ بەرمەك. بالانىڭ قۇجاتتارىن راسىمدەۋ ماسەلەسىن دە مينيسترلىك ءوز موينىنا الىپ وتىر.