شىمكەنتتە ءبىر توپ سوتتالعان ازامات تۇرمەدەگى زاڭسىزدىقتاردىڭ بەتىن اشتى. ءتىپتى ءوز سوزدەرى دالەلدى بولۋ ءۇشىن جابىق مەكەمەنىڭ كامەراسىندا وتىرىپ، ۆيدەوۇندەۋ جاريالادى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ.

كامەراعا ۇيالى تەلەفون كىرگىزۋدىڭ قۇنى — 100 مىڭ تەڭگە

شىمكەنتتەگى يچ 167/11 تۇزەۋ مەكەمەسىندەگى جاعدايعا كوڭىلى تولماعان سوتتالۋشىلار بىرنەشە رەت قۇزىرلى ورگاندارعا شاعىم تۇسىرگەن. 

الايدا ول شاعىم ىشتەن شىقپاي، ەش ناتيجە بولماعان سوڭ ءۇش ازامات تۇرمەدەگى بىلىقتاردى جۇرتقا جاريا ەتپەك بولىپ، ءبارىن بەينەتاسپاعا تۇسىرگەن. ايتۋلارىنشا، اباقتى ىشىندە كوپ سۇراقتى اقشاعا شەشۋگە بولادى. مەكەمە قىزمەتكەرلەرى ءتىپتى وزدەرى ىشكە ۇيالى تەلەفون كىرگىزىپ بەرۋگە ۇسىنىس تاستاعان. تەك بايلانىس قۇرالىن كامەراعا كىرگىزۋ ءۇشىن ولار قوماقتى قارجى الىپ وتىرعان. 

"مىنا تەلەفوندى ساتىپ الدىم. جالپى 100 مىڭ تەڭگە بەردىم. الدىندا تاعى ءبىر وسىنداي "پروستوي" تەلەفون كىرگىزىپ بەرگەن ماعان. ىستەمەي قالدى دا، سوسىن ونى سۋعا اعىزىپ جىبەردىك. ءبارى بىلەدى ءبىزدىڭ تەلەفونمەن سويلەسەتىنىمىزدى. مىنە، قۋاتتىعىشى. ارتىندا تاعى دا SIM كارتالارىم بار"،-دەيدى سوتتالۋشىلاردىڭ ءبىرى. 

بايلانىس قۇرالىن جەتكىزىپ بەرۋشى جازاسىن وتەۋشىلەردىڭ قىزمەتى ءۇشىن الاتىن اقىسىنىڭ قىمبات ەكەنىن ايتقاندا: "ءبىز باستىق ەكەۋمىز بۇل اقشانىڭ بارلىعىن قالتامىزعا تىعادى دەيسىڭدەر مە؟ ءبىزدىڭ دە بەرەتىن جەرلەرىمىز بار" دەپ جاۋاپ قاتىپتى. 

كارتا بيزنەسى ءورشىپ تۇر 

ۆيدەودا جازاسىن وتەۋشىلەر ءوز سوزدەرى دالەلدى بولسىن دەپ قولدارىنداعى ءبىر-بىر ۇيالى تەلەفوندارىن كورسەتەدى. ول از دەگەندەي، جابىق مەكەمەسىندە كارتا بيزنەسى تۋرالى ءسوز قوزعايدى. سوتتالۋشىلار تۇزەۋ مەكەمەسىنىڭ قىزمەتكەرلەرىن قۇمار ويىن ارقىلى وڭاي تابىس تاۋىپ وتىر دەپ ايىپتادى. 

"جازامدى وتەپ جاتقان كەزدە جالعاسبايەۆ ەرمەك ماعان كەلىپ، "كارتاعا ويىن ۇيىمداستىرىپ، ماعان ىشتەن اقشا شىعارىپ بەرشى" دەدى. "ءيا"دەپ الىپ الدىم دا، سىزدەرگە زاڭسىز ىس-ارەكەتتەرىن دالەلدەپ بەرىپ جاتىرمىن. "ۇشتەن ءبىرىن ماعان، ۇشتەن ءبىرىن "ۆور ۆ زاكونە"-لارعا جىبەرىپ وتىراسىڭ" دەدى. "ءيا-يا" دەدىم، "ولارعا مىنا نوۆىي SIM كارتامەن زۆوندا" دەپ اكەپ بەردى. مەن ەشكىمگە زۆونداماي، سىزدەرگە دالەلدەپ وتىرمىن"، — دەيدى جازاسىن وتەۋشى بەينەجازبادا. 

"جوعارعى سوت پەن باس پروكۋراتۋرادان اراشا سۇرايمىز" 

"ءبىز شىندىقتى ايتىپ جاتىرمىز. سوتتالعاندار تەلەفوندى، كارتانى، گەرويندى، اناشانى قايدان الادى دەيسىزدەر؟ مىنە، وزدەرى اقشاعا الىپ كەلىپ بەرەدى. وندا مىنا ءۇش تەلەفوندى قالاي كىرگىزەمىز؟ شىمكەنت قالاسى ساۋلە اۋدانىنداعى يچ167/11 تۇرمەسىندە مىنە جاعداي وسىنداي" دەپ جانايقايىن جەتكىزگەندەر تۇرمە كامەرالارىندا تۇرمىستىق زاتتار تەك قاعاز جۇزىندە دەپ وتىر. تاماق ماسەلەسىندە دە ءتيىستى اس-اۋقات بەرىلمەيدى دەگەن تۇرمەدەگىلەر بەينەتاسپانى ق ر جوعارى سوتى مەن باس پروكۋراتۋرا، ۇقك سەكىلدى قۇزىرلى ورگاندار كورسە، تەكسەرۋ شارالارىن جۇرگىزەدى دەگەن ءۇمىتىن جەتكىزدى. 

زاڭسىزدىقتار راستالدى 

ءتورت قابىرعانىڭ ىشىندە وتىرعانداردىڭ جانايقايىنا قاتىستى ءمان-جايدى ءبىلۋ ءۇشىن شىمكەنت قالاسى بويىنشا قىلمىستىق-اتقارۋ جۇيەسى دەپارتامەنتىنە رەسمي حات جولداپ، جاۋابىن الدىق. دەپارتامەنت باسشىسى اتەلبەك دوسماعامبەتوۆ بۇل كەلەڭسىز جاعدايدى جوققا شاعارمادى. تۇزەۋ مەكەمەسىندە ءتىنتۋ شارالارى جۇرگىزىلىپ، تىيىم سالىنعان زاتتار تاركىلەنىپ الىنعان. ال سوتتالۋشىلار زاڭسىز ارەكەتتەرىن ءتىزىپ شىعىپ، اشكەرە ەتكەن مەكەمە قىزمەتكەرلەرى تارتىپتىك شارامەن وڭاي قۇتىلىپ كەتكەن.

"بەينەجازبادا ايتىلعان قىزمەتكەرلەرگە قاتىستى قىزمەتتىك تەكسەرۋ جۇرگىزىلىپ، ناتيجەسىندە وسى فاكتىگە قاتىسى بار دەپ تانىلعان قىزمەتكەرلەر مەن سوتتالعاندارعا قاتىستى تارتىپتىك شارالار قولدانىلدى"، — دەپ جازىلعان دەپارتامەنتتىڭ  جاۋابىندا. 

سونداي-اق، ىشكى ىستەر دەپارتامەنتىندەگىلەر تۇرمەدەگى رەجيمدى قاسكويلىكپەن بۇزۋشى دەپ تانىلعان سوتتالعانداردىڭ بۇل ىس-ارەكەتتەرى ارقىلى قىلمىستىق-اتقارۋ جۇيەسى مەكەمەسى اكىمشىلىگىنىڭ بەدەلىنە نۇقسان كەلتىرمەك بولعانىن اتاپ وتكەن. ولار بولعان جاعدايعا وكىنىش بىلدىرەتىنىن جازباشا تۇردە راستاپتى.