ەس-تۇسسىز اۋىر حالدە توسەنىشتە جاتقان بالانىڭ تابىلعاندىعى تۋرالى اقپارات جاعامىزدى ۇستاتتى. ادامگەرشىلىكتەن جۇرداي جۇرگىزۋشى بالانى قاعىپ كەتىپ قانا قويماي، وعان كومەك شاقىرۋدىڭ ورنىنا قۇر توسەنىشكە جاتقىزىپ كەتكەن دەگەن مالىمەت پايدا بولعاندا جۇرگىزۋشىنى قارعاپ-سىلەدىك. سويتسەك، بۇل قورقىنىشتى حيكايانىڭ تەك بەر جاعى ەكەن. اراققا سىلقيا تويعان تۋعان اكەسى ءتىل الماعان ءوز بالاسىن تاسپەن ۇرىپ، سودان سوڭ وقيعا ورنىنان قاشىپ كەتكەندىگى راستالدى. اكەسىنىڭ بۇل اقىلعا سىيىمسىز، ادامدىققا جاتپايتىن ارەكەتى جىعىلعانعا جۇدىرىق بولدى. ۇرى-قارىلاردان، پەدوفيلدەردەن، قانىشەر قىلمىسكەرلەردەن كوز اشپايتىن بولدىق. ميلليون ادام تاعدىرىنا الاڭداعان بالاعا قاتىستى بۇگىن جاڭا اقپارات پايدا بولدى. ەۋرازيا ءبىرىنشى ارناسىنىڭ بەرگەن مالىمەتىنە سايكەس، تۋعان اكەسىنىڭ قولىنان جازىم بولا جازداعان بالا بۇگىندە قاجەتتى بارلىق ەم-دومدى الىپ بولىپ، اياققا تۇرىپتى. بىرنەشە كۇننەن سوڭ ۇيىنە قايتاتىن بالا بولاشاقتا باسىنا تاعى ءبىر وتا جاسايتىن بولادى.