جاينامازدى تەپكەن جاتتىقتىرۋشىنىڭ جات قىلىعى مىرزاحمەتوۆ مىرزانىڭ مازاسىن قاشىردى. ءدۇيىم ەلگە ءدىن دۇشپانى بوپ كورىنگەن ۇستازدى ۇياتتى ارەكەتى ءۇشىن كەشىرىم سۇراتىپ، كامەرانىڭ «الدىنا كەلتىردى». دەمالىستا جاتقان ايماق باسشىسىنىڭ دەن قويعانى جاقسى ارينە. وسى وقيعا بولعانى كۇنى-اق، تەڭبىل دوپ ترەنەرى جۇمىستان قۋىلدى. جۋرناليستەرگە جۋىماي، قاشا جونەلگەنى داۋدىڭ دابىسىن باسپاي، ودان سايىن وتىن ۇدەتە ءتۇستى. ءبىرىنشى كۇنى باسى بالەگە قالعان باپكەر ءوزى تىكەلەي باعىناتىن باسقاراما باسشىسىنا تۇسىنىكتەمە بەرىپ ءتۇسىپ كەلە جاتقان. 9 قاباتتى باسقارمانىڭ باسپالداعىمەن بار كۇشىمەن جۇگىرىپ، جۋرناليستەرگە جەتكىزبەي كەتكەن ەدى. وسىلايشا، اياق دوپ شەبەرى ەكەنىن اڭعارتقان المات مىرزا، ءوز ىسىنە وكىنەتىنىن سول كۇنى-اق ايتۋى كەرەك ەدى. ءىس سوزىلعان سايىن سوڭىن تاپپاي، تالقىلانا، تالدانا تۇسەتىنى بار. دەگەنمەن، ادام بولعان سوڭ ابدىرايدى، پەندە بولعان سوڭ قاتەلەسەدى.
الەۋمەتتىك جەلى دەگەنىڭىز ول - قۇدىققا قۇلاعان قۇلاننىڭ قۇلاعىنا قۇرباقا ويناتاتىن بۇگىنگى ورتا عوي. الدىمەن:
-!!- جاينامازدى تەپكەنى ءۇشىن جازعىردىق؛
-!!- بالالاردى بالاعاتتاعانى ءۇشىن باستىرمالاتا سوكتىك؛
-!!- ادەپسىزدىگىن اڭگىمە قىلدىق؛
-!!- قالا بەردى قاشقانىن قوزعادىق؛
ەندى كەسىرلەنىپ بارىپ، كەشىرىم سۇراعانىن جازىپ جاتىرمىز. وسىلاي دا وسىلاي... ول تاقىرىپ شۇبار-الا ورتادا شۇباتىلا بەرەدى ەكەن.
بۇل جەردە بالالاردىڭ دا بالە بوپ تۇرعانىن ايتقىم كەلەدى. بۇگىنگىنىڭ بالدارى مەن بۇرىنعىنىڭ ۇلدارىن تارازىعا تارتىپ، مەترمەن ولشەسەك تە، سالماعى مەن ساناسىن سالىستىرۋعا كەلمەيدى. ارىدان ايتايىن ەندى...
«ءبىزدىڭ كەزىمىزدە باسىمىزعا تابۋرەتكا جارعان»
دارىندى بالالاردى دايارلايتىن سپورت مەكتەبىندە ءبىزدىڭ اۋىلدان دا ءبىر بورەس بالا وقىعان ەدى.
اۋىلدىڭ الىپتارىن اتىپ جىعاتىن. اتان تۇيەدەي بوپ اۋىلعا سيماعان سوڭ، قارقىن كورسەتەر قارسىلاس تابىلار دەپ قالاعا جىبەرگەنبىز «ىسپورت ىشكولا» دەگەنگە. 2 توقسان وقىدى ما، جازدى ما)) ايتەۋىر ارەڭ دەگەندە اۋىسىپ قۇتىلدىم دەگەن. سول مەكتەپتەن، سول مەكتەپتىڭ جاسى ۇلكەن جىگىتتەرى مەن مۇعالىمدەرىنەن. نەگە دەگەنبىز؟... اۋەلى، ءالىم جەتتىك دەگەن. ارىدەن سوڭ ۇستازدار تاراپىنان دورەكىلىك كورسەتىپ، ءدوڭايبات تانىتاتىندار بار دەگەن. وپشىم ول وقۋ ورداسىن «كىشىگىرىم ارميا» دەپ ايتقانى بار ەدى. ياعني، «دەد وبششينا» دەگەننىڭ داۋىرلەپ تۇرعان كەزى عوي. مۇمكىن، مەكتەپتە سول «ساياسات» ساقتالىپ تۇرعان شىعار. ال، ەرتەڭ ءسىزدىڭ دە التىن اسىقتاي ۇلىڭىز سونداي سپورت مەكتەبىنە بارعىسى كەلۋى مۇمكىن. كۇننىڭ كوزى بەيبىت ءتۇسىپ تۇرعان زاماندا «كۇن كورسەتپەيتىندەر» الدىنان شىقپاسىن دەسەڭىز، ونداي ورتانى ءشىلي قاتتى جاقتاي بەرمەڭىز. دەگەنمەن، تالاي مىقتى تۇلەپ ۇشقانىن مەڭزەپ، ءتوزىمى مىقتىلار تورگە وزعانىن ايتساڭىز ول دا ورىندى. ءبىراق، «ءبىزدىڭ كەزىمىزدە» دەپ باستايتىندار بار اڭگىمەسىن. ءبىز قاشانعى سولاي سويلەيمىز. ءبىز قاشانعى «ءبىزدىڭ كەزىمىزدە باسىمىزعا تابۋرەتكا جارعان، تاس ۋاتقان» دەپ ماقتانا بەرەمىز. نەگە ءسىزدىڭ باسىڭىزدان كەشكەندى بالاڭىز كورۋى كەرەك؟!.
تاسىعان شاينەك توگىلەدى
ەگەر شىن مانىندە شىنىققاندى شىمىر قىلاتىن مەكتەپتەردە جاڭادان كەلگەندەردىڭ جاعاسىنا جارماسا بەرەتىندەر بولسا، ءزابىر كورۋشىلەردىڭ زىعىردانى شىعادى. اشۋمەن دە ايتىپ، اقىلمەن دە ىسكە اسىرۋى مۇمكىن. توقەتەرى، توقىلداۋى. «شىدامنىڭ دا شەگى بار» دەپ اتىلاتىندار از ەمەس. ولار وسىلايشا، ۇستازدارىن «ۇستاپ العانعا» ۇقسايدى. جاسىرىن كامەراعا جازىپ الۋى بالالاردىڭ دا بالە ەكەنىن كورسەتەدى. ولار وسى ارەكەتىمەن ءمۇعالىمنىڭ مارتەبەسىنە دە مىلتىق كەزەپ كەتكەنى بار. ەندى ۇستازدار ەمىن-ەركىن بولا الماي، وقۋشىلار الدىندا وتى ءسونىپ ءجۇرۋى كەرەك پە؟ بۇنداي جاعدايلار بالانى باسقا شىعاراتىنى بار. ونسىز دا كەڭەستىك كەزدەگى ابىرويىن اڭساپ جۇرگەن اعارتۋ ماماندارىنىڭ ارمانى ودان سايىن ورىندالماي بارادى. راس، بۇرىن بالالار بەزىپ كەتەتىن ۇستازىن كوشەدەن كورگەندە. ول جاعىن ۇلكەندەر تالاي تامسانا ايتقان.
مىقتى ماماندى جەبەرىپ الدىق
المات باەتوۆ دەگەن تەڭبىل دوپ ترەنەرىنىڭ 35 جىلدىق جۇمىس تاجىريبەسى بار. تالاي تالانتتاردى تۇلەتكەن. ءبىر عانا مىسالى، فۋتبولدان برازيلياعا بارعان قازاقستاندىق بالالاردىڭ بەسەۋى وسى كىسىنىڭ شاكىرتتەرى. وسىنداي ۇستازدى ۇستاپ قالا المادىق، «ۇستامى جوق» دەپ. بالا مەكتەپتە ساباق وقۋى كەرەك، مەشىتتە ناماز وقيتىنى سەكىلدى. سپورتپەن اينالىساتىن جەردە سپورتپەن اينالىسۋى ءتيىس. ۇستازدارىنىڭ ۇيىمداستىرىپ جاتقان جينالىسىنا ادەيى بارماي، بالالار ارانداتىپ، اشۋلاندىرعان كورىنەدى. ال، اشۋ ۇستىندەگى ادامدى «اقىلمەن ىستەپ» تازعا وتىرعىزعان. نامازوقىعانسىپ.
پى.سى: قۇدايدان قورىقپاعاننان قورىق! اتەيس ادام بولساڭ دا، وزگەنىڭ سەنىمىن وكشەڭمەن باسپا. بالا مەكتەپتە ساباق وقۋى كەرەك، مەشىتتە ناماز وقيتىنى سەكىلدى. اشۋعا بەرىلسەڭ، اشۋىڭ قايتقاندا اقىلىڭنىڭ اشىنعانى اشىنعان.
