دەنيس تەننىڭ ءولىمى بويىنشا ىستەگى كۇدىكتى جانار تولىبايەۆا ماس كۇيدە كولىك جۇرگىزگەنى ءۇشىن جۇرگىزۋشى كۋالىگىنەن ايىرىلعان، - دەپ حابارلايدى Tengrinews.kz.

ق ر جوعارعى سوتىنداعى سوت اكتىلەرىنىڭ بازاسىنداعى ماتەريالدارعا سۇيەنسەك، 2018 جىلدىڭ 7 ساۋىرىندە ساعات 3.30-دا جانار تولىبايەۆا جىبەك جولى مەن قازىبەك بي كوشەلەرىنىڭ قيىلىسىندا ماس كۇيدە "Kia Shuma" كولىگىمەن كەلە جاتقان.

ناتيجەسىندە كۇدىكتى ق ر اكىشىلىك قۇقىق بۇزۋشىلىق تۋرالى كودەكستىڭ 608-بابىنىڭ 1-بولىگى بويىنشا ("جۇرگىزۋشىنىڭ كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدە باسقارۋى، سول سياقتى كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ باسقارۋىنا بەرۋ") اكىمشىلىك جاۋاپكەرشىلىككە تارتىلعان. 

Cوت وتىرىسىندا ول كىناسىن مويىندادى.

جامبىل وبلىسى قورداي اۋداندىق سوتى جانار تولىبايەۆانى ءۇش جىلعا كولىك جۇرگىزۋ قۇقىعىنان ايىرۋ تۋرالى شەشىم شىعارعان.

ايتا كەتەيىك، 22 جاستاعى جانار تولىبايەۆا دەنيس تەننىڭ ءولىمى بويىنشا ىستە ءۇشىنشى كۇدىكتى رەتىندە ءوتىپ جاتىر. 27 شىلدەدە ول 2 ايعا قاماۋعا الىنعان بولاتىن. ءىىم باسشىسى جانار تولىبايەۆانىڭ جامبىل وبلىسىنان كەلگەنىن جانە الماتىدا داياشى بولىپ جۇمىس ىستەگەنىن ايتقان ەدى.

ەسكە سالايىق، 19 شىلدەدە الماتىدا بەلگىسىز بىرەۋلەر دەنيس تەندى پىشاقتاپ كەتكەن بولاتىن. وقيعا شامامەن 15.00-دە قۇرمانعازى مەن بايسەيىتوۆا كوشەلەرىنىڭ قيىلىسىندا بولعان. كەيىن قالالىق ءىىد وكىلدەرى دەنيس تەنگە اۆتوۇرىلار شابۋىل جاساعانىن مالىمدەدى. سويتسەك، سپورتشى ۇرىلاردىڭ ۇستىنەن تۇسكەن بولىپ شىقتى. جانجال كەزىندە سپورتشىنىڭ اياعىنا پىشاق ءتيىپ، كوپ قان جوعالتقان. ول اۋرۋحانادا كوز جۇمدى.