باس پروكۋروردىڭ ءتوراعالىق ەتۋىمەن زاڭدىلىقتى، قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ وتىرىسى ءوتتى، وندا قىلمىستىق پروسەستى سيفرلاندىرۋ، سونداي-اق قۇقىق قورعاۋ قىزمەتىنىڭ پروسەستىك نەگىزدەرىن جاڭعىرتۋ ماسەلەلەرى تالقىلاندى، دەپ حابارلايدى Qamshy.kz اقپارات اگەنتتىگى ق ر باس پروكۋراتۋرانىڭ باسپا ءسوز قىزمەتىنە سىلتەمە جاساپ.

ءىس-شاراعا پرەمەر-مينيستردىڭ ورىنباسارى اسقار جۇماعالييەۆ، پرەزيدەنت اكىمشىلىگىنىڭ، ۇكىمەتتىڭ وكىلدەرى، قارجى ءمينيسترى، ۇيلەستىرۋ كەڭەسىنىڭ مۇشەلەرى قاتىستى.

مەملەكەت باسشىسىنىڭ «سيفرلى قازاقستان» باعدارلاماسى شەڭبەرىندەگى تاپسىرماسىنا سايكەس ەلىمىزدە قىلمىستىق سوت ءىسىن جۇرگىزۋ ەلەكتروندى فورماتقا كەزەڭ-كەزەڭمەن كوشىرۋدىڭ جۇزەگە اسىرىلىپ جاتقانى اتالىپ ءوتتى.

جوبانى ىسكە اسىرۋدىڭ باستى ماقساتى – ازاماتتاردىڭ قۇقىقتارىن قورعاۋ جانە سوت تورەلىگىنە جىلدام قول جەتكىزۋدى قامتاماسىز ەتۋ.

اۆتوماتتاندىرۋ قىلمىستىق پروسەستىڭ بارلىق ساتىسىن: قىلمىستى تىركەۋدەن باستاپ ۇكىم ورىندالعانعا دەيىن قامتيدى دەپ كۇتىلۋدە.

ىستەردى ەلەكتروندى فورماتتا تەرگەپ-تەكسەرۋدىڭ ارتىقشىلىعى – وڭتايلاندىرۋ، دالەلدەمەلەردى جيناۋ جانە پروسەستىك قۇجاتتاردى جاساۋ راسىمدەرىنىڭ جەڭىلدەتىلۋى، سونداي-اق پروكۋرورلىق جانە سوت باقىلاۋىنىڭ كۇشەيۋى.

بۇگىنگى تاڭدا 5 مىڭعا جۋىق ءىس ەلەكتروندى تۇردە تەرگەپ-تەكسەرىلۋدە، ونىڭ  2،3 مىڭى سوتقا جولدانعان.

ۇيلەستىرۋ كەڭەسىنىڭ ءتوراعاسى – باس پروكۋرور قايرات قوجامجاروۆ اتاپ وتكەندەي، ەلەكتروندى سوت ءىسىن جۇرگىزۋدى تولىققاندى ەنگىزۋ ءۇشىن قىلمىستىق قۋدالاۋ ورگاندارىن قارجىلاندىرۋ، تيىسىنشە تەحنيكالىق جاراقتاندىرۋ جانە قىزمەتكەرلەرگە ونى جۇرگىزۋ داعدىلارىن وقىتۋ ماسەلەلەرىن شەشۋ قاجەت.

وسىعان بايلانىستى، ۇكىمەت مۇشەلەرى جوبانى ودان ءارى ىسكە اسىرۋ ءۇشىن قاراجات ءبولۋ ماسەلەسىن تالقىلادى، ال قۇقىق قورعاۋ ورگاندارىنىڭ باسشىلارىنا قىلمىستىق پروسەستى كەزەڭ-كەزەڭمەن اۆتوماتتاندىرۋ مەرزىمىنىڭ مۇلتىكسىز ساقتالۋىن قامتاماسىز ەتۋ تاپسىرىلدى.

ودان كەيىن قىلمىستىق پروسەستە ازاماتتاردىڭ قورعالۋ دەڭگەيىن كوتەرۋ، ونىڭ اسىرە قاتاڭدىعىن تومەندەتۋ، قىلمىستىق سوت ءىسىن جۇرگىزۋ نىساندارىن وڭتايلاندىرۋ بويىنشا ۋاكىلەتتى ورگاندار قابىلداپ جاتقان شارالار تۋرالى باياندامالار تىڭدالدى.

مىسالى، قىلمىستىق جانە قىلمىستىق-پروسەستىك زاڭنامانى جاڭعىرتۋعا باعىتتالعان زاڭ قولدانىستا بولعان 7 اي ىشىندە ۇستالعاندار (9 789-دان 6 508-گە دەيىن)، كۇزەتپەن ۇستالعاندار (8 835-تەن 6 148-گە دەيىن) جانە باس بوستاندىعىنان ايىرۋعا سوتتالعاندار (12 414-تەن 4 231-گە دەيىن) سانى ۇشتەن ءبىر بولىگىنە ازايعان.

ازاماتتاردىڭ كونستيتۋسيالىق قۇقىقتارىن قورعاۋ ماقساتىندا سوتقا بارلىق تەرگەۋ ارەكەتتەرىن سانكسيالاۋ بويىنشا وكىلەتتىكتەردى كەزەڭ-كەزەڭمەن بەرۋ اياقتالدى.

اعىمداعى جىلدىڭ ناۋرىزىنان باستاپ سوتتار جاسىرىن تەرگەۋ ارەكەتتەرىن جۇرگىزۋگە 8 مىڭ سانكسيا بەرگەن.

بۇيرىقتىق ءىس جۇرگىزۋ تارتىبىمەن 600-دەن استام ءىس اياقتالعان.

باس پروكۋرور جاسىرىن تەرگەۋ ارەكەتتەرىنە باستاما جاساۋ كەزىندە زاڭدىلىقتىڭ جانە ازاماتتاردىڭ قۇقىقتارىنىڭ بۇزىلۋىنا جول بەرىلمەۋىنە، ازاماتتاردى نەگىزسىز ۇستاۋ فاكتىلەرىن بولدىرماۋعا، دالەلدەمەلەردى جيناۋ بويىنشا ادۆوكاتتاردىڭ وكىلەتتىكتەرىن ىسكە اسىرۋ كەپىلدىگىنىڭ قامتاماسىز ەتىلۋىنە ايرىقشا كوڭىل اۋداردى.

ۇيلەستىرۋ كەڭەسىنىڭ قورىتىندىسى بويىنشا ءبىرقاتار ناقتى ۇسىنىمدار ازىرلەندى.