13-14 تامىز ارالىعىندا تۇركيانىڭ ىستامبۇل قالاسىندا يۋنەسكو-نىڭ ەتنوسپورت جونىندەگى كەشەندى كوسۋلتاتيۆتى ءىV كەڭەسى ءوتتى. وسى جيىندا 2021 جىلى قازاقستاننىڭ ەلورداسى استانا قالاسىندا تاريحتاعى تۇڭعىش الەمدىك ەتنوسپورت ويىندارىن وتكىزۋ شەشىمى قابىلداندى. يۋنەسكو-نىڭ تۇراقتى وكىلدەرى، قىرىقتان استام مەملەكەتتىڭ سپورت مينيسترلەرى، دەپۋتاتتارى مەن لاۋازىمدى تۇلعالارى جانە حالىقارالىق سپورت فەدەراسيالارىنىڭ باسشىلارى باس قوسقان كەڭەستە  قازاقستاننىڭ اتالمىش باستاماسىنا ۇلكەن قولداۋ جاسالدى. سونداي-اق، وسى ساپاردا ق ر ۇلتتىق سپورت قاۋىمداستىعى بۇكىلالەمدىك ەتنوسپورت كونفەدەراسياسىنا تولىققاندى مۇشە بولىپ قابىلداندى.

ەسكە سالىپ وتسەك، بيىلعى جىلدىڭ 1-2 شىلدەسىندە يۋنەسكو-نىڭ ءداستۇرلى سپورتتار مەن ويىندار كوميتەتىنىڭ وكىلدەرى استاناعا ارنايى ساپارمەن كەلىپ، يۋنەسكو، ق ر مادەنيەت جانە سپورت مينيسترلىگى جانە ق ر ۇلتتىق سپورت قاۋىمداستىعى اراسىنداعى ءۇشجاقتى نيەتتەستىك جونىندەگى حاتقا قول قويىلعان بولاتىن. قازاقستان مەملەكەتىنىڭ ءى الەمدىك ەتنوسپورت ويىندارىن وتكىزۋگە ۇمىتكەر ەلدىڭ ءبىرى ەكەندىگى سول كەزدە مالىمدەلگەن. 

سونىمەن، يۋنەسكو-نىڭ باستاماسىمەن وتكەن ءداستۇرلى سپورت جونىندەگى دۇنيەجۇزىلىك كەڭەستە 2021 جىلى ءى الەمدىك ەتنوسپورت ويىندارىنىڭ ەلوردامىز تورىندە تۋ كوتەرەتىنى ناقتى ايتىلدى. تاريحتا تۇڭعىش رەت  ۇيىمداستىرىلاتىن بۇل الەمدىك ەتنوسپورت ويىندارىن  يۋنەسكو-نىڭ ءداستۇرلى سپورتتار مەن ويىندار كوميتەتى، بۇكىلالەمدىك ەتنوسپورت كونفەدەراسياسى، ق ر مادەنيەت جانە سپورت مينيسترلىگى جانە ق ر ۇلتتىق سپورت قاۋىمداستىعى بىرلەسە وتكىزەدى. ءسويتىپ، قازاقستان رەسپۋبليكاسىنىڭ تاۋەلسىزدىك العانىنا 30 جىل تولاتىن مەرەكەلى جىلى استانادا جەر جاھاننىڭ تاڭداۋلى ۇلتتىق ويىندارىنان وتەتىن سپورت باسەكەلەرى تاماشالاناتىن بولادى.