«سۋعا ءجۇزىپ قايتايىق استانادا» دەدىك. تولاسسىز جاۋعان جاڭبىردىڭ كەسىرىنەن سۋ استىندا قالعان بايعۇس استانالىقتاردىڭ جاعدايىن ويلاپ، الماتىدا وتىرعان ءبىز قىنجىلدىق. ءبىراق ەلوردانىڭ اكىمدىگى قىنجىلدى ما، بىلمەدىك. ازىرگە تەمىر تەحنيكا، قارا جۇمىسشىلار ءوز جۇمىسىن اتقارىپ الەك. بۇل تۋرالى قالا اكىمدىگى سان رەت باسپا ءسوز بايانداماسىن جاسادى. دەگەنمەن ماسەلەنىڭ تۇيتكىلى شەشىلمەگەن. اۋا رايى بولجامىنا سەنسەك، "قازگيدرومەت" قاتەلەسپەسە، رەسپۋبليكا كولەمىندە تاعى دا جاۋىن-شاشىن، بۇرشاق جاۋماق. ال، باس قالا بولسا، ۆەنەسيا بولىپ قالا بەرمەك.

تۋعان كۇنگە  19 ملرد تەڭگەسىن اياماعان بيلىك ارىق قازدىرۋعا كەلگەندە نەگە ايانىپ قالعان دەگەن زاڭدى سۇراق تۋىندايدى. نە دە بولسا پارلامەنت سەناتىنىڭ سپيكەرى قاسىم-جومارت توقايەۆ اشۋعا ءمىنىپ، «ەلباسىنىڭ قاتاڭ تاپسىرماسىنا قاراماستان استانا جەلگە توتەپ بەرسە دە، سۋعا توتەپ بەرە المايتىن بولىپ شىقتى. استانالىقتار سودان زارداپ شەگۋدە. سونىمەن قاتار استانامىزدىڭ حالىقارالىق بەدەلىنە نۇقسان كەلۋدە. بۇل ماسەلەنى تۋعان كۇن تويلاماس بۇرىن شەشۋگە بولاتىن ەدى عوي» دەپتى.

پرەمەر-مينيستر ساعىنتايەۆ ءوز كەزەگىندە اكىمدىكتى كىنالادى. «قالانىڭ جاعدايىنا اكىمدىك جاۋاپ بەرەتىنىن بىلەمىز. قايتالاپ ايتامىن، قالادا ورىن العان كەز كەلگەن جاعدايعا اكىميات باسپەن جاۋاپ بەرەدى.  تۇرعىندار مەن قوعامدىق كولىك جاپا شەكپەۋى ءتيىس. ماسەلە تەك يميدجدە ەمەس. بۇل جامان ادەتكە اينالىپ بارا جاتىر. سۋ استىندا قالىپ جاتقان سول باياعى كوشەلەر، سول باياعى اۋداندار. ارىقتاردى ۋاقىتىندا تازالاپ وتىرۋ ماقسات» دەپ جاۋاپ قاتتى باقىتجان مىرزا.

رمك "قازگيدرومەتتىڭ" باسپا ءسوز حاتشىسى گۇلۆيرا جانبايەۆانىڭ ايتۋى بويىنشا جاڭبىردىڭ مولشەردەن تىس جاۋاتىندىعى جايلى اقپارات استانا قالاسىنىڭ توتەنشە جاعدايلار دەپارتامەنتىنە، اكىمياتقا  الدىن-الا بەرىلگەن بولاتىن. "ولار ءوز كەزەگىندە تۇرعىندارعا سمس-حابارلاما جىبەردى. ءوز باسىم الەۋمەتتىك جەلىلەرگە، جەرگىلىكتى جۋرناليستەرگە اۋا رايى بولجامى تۋرالى اقپارات تاراتتىم" دەدى باسپا ءسوز حاتشىسى.

استانانىڭ مىنا مۇشكىل جاعدايى «نۇح» كينوسىن ەسكە سالدى. جاۋىن-شاشىننىڭ مولشەردەن تىس جاۋاتىنىن "قازگيدرومەت" بىلسە دە (كۇمانىمىز بار-اۆت.) بىلمەگەندەي قىلدى. دابىل قاعاتىن نۇح پايعامبار (ع.س.) جوق. قۇتقارامىن دەيتىن دە نۇح پايعامبار (ع.س.) جوق. تاپسىرما بەرەتىن، ايتۋىن ايتاتىن نۇرسۇلتانىمىز بار، وعان ءبىراق قۇلاق اساتىن، جاۋاپكەرشىلىكتى مويىنمەن كوتەرە الاتىن اكىم جوق. نە دەيمىز، استانالىقتارعا جاراتۋشى يەمىز سابىر بەرسىن، اۋرۋ-سىرقاۋدان قارتتار مەن بالالاردى ساقتاي كورسىن!

نازارلارىڭىزعا ""قازگيدرومەتتىڭ" الداعى ءۇش كۇنگە ارنالعان اۋا رايى بولجامىن ۇسىنامىز: "سالقىن جانە جاڭبىرلى. 2018 جىلعى 23-25 تامىزعا ارنالعان بولجام: قازاقستاننىڭ سولتۇستىك بولىگىنە جاڭا جەر ايماعىنان سۋىق اۋا ماسسالارى تۇسەتىن بولادى. سوندىقتان كۇزگى، بۇلتتى، جاڭبىرلى اۋا-رايى،   24-25 تامىزدا سولتۇستىك وبلىستاردا قاتتى جاڭبىر جانە ەكپىندى جەل، اۋا تەمپەراتۋراسى تۇندە 5-13 گرادۋسقا دەيىن، كۇندىز 10-18 گرادۋس جىلىعا دەيىن كۇتىلەدى. تەك وڭتۇستىك وڭىرلەردە جاۋىن-شاشىنسىز جىلى اۋا-رايى ساقتالادى.