تۇركىستان بازارىنا كىرسەڭ، قالانىپ تۇرعان شاپان. كوزدىڭ جاۋىن الادى. كىرسە – شىققىسىز. ءبىراق، الگى شاپانداردىڭ جانىنا بارىپ ساۋساعىڭمەن سيپالاي باستاساڭ، ويۋ-ورنەكتەرى شيراتىلىپ، قابىرشاقتانىپ ۇگىتىلە باستايدى. باسىم بولىگىنىڭ – اپپليكاسيا ەكەنى كورىنىپ تۇر. قولونەر شەبەرلەرى جاقسى بىلەدى، اپپليكاسيا دەپ وتىرعانىمىز، ساپاسىز جۇقالتاڭ قيىندىلاردى ورنەكتەپ، جەلىمدەپ ۇتىكتەپ جاپسىرۋ. بۇل – ۋاقىتشا دۇنيە. سوندىقتان دا، قارا بازاردا قىتايدان جەتكىزىلگەن شاپانىڭىز تەڭ-تەڭ بولىپ ءۇيىلىپ جاتىر. بىرتىندەپ الاسىز با، كەلىلەپ الاسىز با، ەشكىم قولىڭىزدى قاقپايدى. ارزان بولعان سوڭ با (تۇركىستان بازارىندا 3-5 مىڭنىڭ اراسى)، سول شاپاندار سومكە ىشىندە ۋماجدالىپ، جيىن-قۇدالىقتاردا كوشىپ ءجۇر. تويعا بارسا شاپانسىز قايتپايتىن اتى دارداي اعالارىمىزدىڭ ۇيىندە دە وسىناۋ سىي-كادەگە كەلگەن «قۇرمەتتى كيىم» ساندىقتا يلەنىپ جاتىر. شەتىنەن سۋىرىپ الىپ، مەرەيتويلاردا سىيلى اعالارىنىڭ يىعىنا جاۋىپ جاتقاندارى. 
اسىرەسە، تويدا، قاريالاردى قاز-قاتار ءتىزىپ قويىپ، شاپان جابا باستاعاننان-اق، ولار الدەنەدەن شوشىنعانداي، ىلە يىقتارىنان شاپاندارىن جۇلىپ الىپ، پاكەتتەرىنە توعىتىپ جاتقاندارىن بايقايسىڭ. كيگىسى كەلمەگەنى. دەنەگە قونىمدى، ءتاۋىر بولسا كيەدى عوي. شالعايلارىنا ءسۇرىنىپ، ولپى-سولپى بولىپ جۇرگىسى كەلمەيدى. قالپاقتارى دا ىڭعايسىز. شۇيدەڭنەن سىرعىپ، مۇرنىڭا ءتۇسىپ، مازاڭدى الادى. ەكى بۇكتەلگەن بورىكتەرى دە باسىڭا كارتون قاپتاعانداي ءبىرتۇرلى ىڭعايسىز. 
اتام زاماننان قۇرمەت پەن ىزەت بەلگىسىندەي بولعان وسى ءقادىرلى كيىمىمىزدى تىم سايقىمازاققا اينالدىرىپ العان جوقپىز با دەپ ويلايسىڭ كەيدە. بايدىڭ دا، جارلىنىڭ دا يىعىنا جاۋىپ جاتىرمىز. ىلگەرىدە قۇرمەتتى قوناققا، اقىنعا، باتىرعا، پالۋانعا، ەلگە ەڭبەك سىڭىرگەن ارداقتى، ايتۋلى ازاماتتارعا عانا شاپان جابىلاتىن. بۇل «باتىر»، «اقىن»، «پالۋان» دەگەن قۇرمەتتى اتاقتاردان كەيىنگى بەرىلەتىن قۇرمەتتەۋ، سىي-سياپات، ماراپات، ماداق بەلگىسى. وندا دا قانداي شاپان دەسەڭىزشى! تىسى مەن استارىنىڭ اراسىنا ءجۇن نەمەسە ماتا سالىنىپ، سىرتى شۇعا، بارقىت سياقتى ادەمى، مىقتى ماتادان قاپتالىپ، ءىشى استارلاناتىن. جىبەك، بارشا سياقتى باعالى ماتالار پايدالانىلاتىن. ءوڭىرى التىن جىپپەن وقالانىپ، اشەكەيلەنەتىن. قىسقاسى، قازىرگى توي-قۇدالىق شاپان ءقادىرىن ءتۇسىرىپ ءبىتتى.
شاپان جابۋ – ءبىزدىڭ ءداستۇر عوي. ولاي بولسا، نەگە ءبىز شاپان تىككىشتەردەن قۇرمەتتى كيىمىمىزدىڭ تاريحي كەيپىن ساقتاۋدى تالاپ ەتە المايمىز؟ الدە، ولپى-سولپى كيىم ۇناي ما بىزگە؟ مەيلى، قىمبات-اق بولا قويسىن، دەنەگە قونىمدى، ەتەك-جەڭىن جيناقى، جاراسىمدى ەتىپ تىگۋ قيىن با؟ ويۋىن دا تىم جىلتىراتا بەرمەي، ءالسىز ءسان ۇلگىسىنە سالىپ كەستەلەپ وقالاۋعا بولادى عوي. سوندا اعالارىمىز يىقتارىنا جاپقان شاپاندارىن پاكەتكە جاسىرماي، كەرىسىنشە، تاستاماي كيىپ جۇرەر ەدى.

بەكجىگىت سەردالىنىڭ فەيسبۋك پاراقشاسىنان