1968 جىلى كسرو چەحوسلوۆاكياعا باسىپ كىردى. سوندا بىرنەشە ورىس دەموكراتى ماسكەۋ قىزىل الاڭىندا نارازىلىق ءبىلدىرىپ، شاعىن قارسىلىق اكسيا جاساپتى. ولاردى كسرو ءۇش ارىپتەرى ون مينۋتتەن كەيىن ۇستاپ العان بولاتىن. 2014 جىلى رەسەي قىرىمدى ۋكراينادان جالعان رەفەرەندۋم جاساپ اننەكسيا جولىمەن تارتىپ العاندا، بىردە  ءبىر رەسەي ورىسى قارسى شىقپاعان. سودان بەرى بۇگىنگى كۇنگە دەيىن رەسەي شىعىس ۋكراينادا جاريالانباعان سوعىس جۇرگىزىپ كەلەدى. بۇل سوعىس گيبريدتىك، جاسىرىن، جىمىسقى سوعىس ەكىنشى دۇنيەجۇزىلىك سوعىسىنان دا ۇزاق ۋاقىت سوزىلىپ كەلەدى. شىعىس ۋكراينا مەن قىرىم ورىستارى «ۋكراينا – وڭاي ولجا بولادى» دەپ ويلاعان ەكەن. رەسەي اسكەرى ۋكراينادان بارلىق وڭتۇستىك ولكەلەرىن باسىپ الىپ، ونى  “نوۆوروسسيا  ولكەسى” دەپ جاريالاپ،   رەسەيگە ءتيىستى جەرلەر دەمەك جوسپارى بولعان. يمپەريالىق پيعىلداعى  رەسەي ورىستارى بۇل ساياساتتى قۇپتاپ،  پۋتينگە قول شاپالاقتادى.

ءبىز ورىسقا ۋكرايننەن جاقىن ۇلت جوق دەپ جۇرسەك، ورەكەڭدەر اعايىننان جەر تارتىپ الىپ،  ءماز بولدى. ورىس ۋكرايندەردى «حوحول»، ۋكرايندەر ورىستى ەسەسىنە «موسكال»  دەۋشى ەدى. اعايىندى شىعىس سلاۆيان حالىقتاردىڭ ءبىر بىرىنە ەركەلەتىپ قويعان اتتارى دەپ ويلاۋشى ەدىك. جوق، بۇل ناعىز كەمسىتۋشىلىك ەكەن، ءتىپتى  راسالىق كەمسىتۋشىلىك دەپ باعالايدى بىرەۋلەر. ءومىر كورسەتكەندەي بۇل اششى شىندىق، راستىعى وسىدان بىلاي ۋكراين حالقى رەسەي اگرەسسياسىن ءپۋتيننىڭ تراگيكالىق قاتەلىگى ەمەس، ورىستىڭ ۋكرايندەرگە عاسىرلار بويى كەلە جاتقان جاۋلىق پيعىلى دەيتىن بولدى. ساياسي ناتيجەسىندە: رەسەي  اگرەسسياسى كوپتەگەن  تىم ورىستانعان ۋكرايندەردى «ناعىز ۋكرايندىققا» اپاردى. ۋكراينا اسكەرىن ءتيىستى اسكەري دايىندىق دەڭگەيىنە اكەلدى، باتىس ەلدەرى ناتو قۇرامىنداعى اقش پەن ەۋروپالىق وداق ۋكرايناعا اۋقىمدى قارۋ-جاراق پەن فينانستىق ەكونوميكالىق كومەك كورسەتتى. سوڭعى ەكى-ۇش جىلى ۋكراينا ەكونوميكاسى ورلەۋدە، بۇل باتىس ەلدەرىنىڭ ينۆەستيسيالارىنىڭ اسەرى. ءيا، ۋكراينا اسكەرى مەن بەيبىت حالقى سوعىس زاردابىن كورۋدە.

شىعىس ۋكراينا مەن قىرىمنىڭ ورىسى مەن ۋكرايندەر اراسىندا سەپاراتيستىك پيعىل كوپ تاراعان ەدى. بۇگىن سەپاراتيستىك ولكەلەر جۇرتشىلىعى وكىنۋدە. 2014 جىلى سەپاراتيستەر بالالارىمىز ماسكەۋدە وقيتىن بولادى، ال ءوزىمىز رەسەيلىك پەنسياعا قولىمىز جەتەدى دەپ دامەلەنگەن. ال ءىس جۇزىندە ولار رەسەي ازاماتتىعىن الىپ ۇلگەرسە دە، ولارعا ويداعىداي جاقسىلىق كەلگەن جوق. سوعىستىڭ اتى سوعىس. شىعىس ۋكراينادا سەپاراتيستەردىڭ بالالارى سوعىسقا قاتىسۋعا ءماجبۇر. ادام شىعىنى بار. شىعىس ۋكراينا سەپاراتيستەرى اتاماندار مەن بانديتتەردىڭ قولىنا ءتۇستى، دۇكەندەر مەن بيزنەستەر تونالۋدا. رەسەي جىبەرگەن قارجىلار ۇرلانۋدا. بۇگىنگى كۇنى رەسەيدىڭ ءوزى باتىس سانكسيالارى اسەرىنەن تەرەڭ ستاگناسيا مەن تۇرمىستىق تاۋقىمەتتەرگە ۇرىندى. رەسەيدىڭ وزىندە شىعىس ۋكرايناداعى جانە قىرىم  سەپاراتيستەرىنە كومەكتەسۋگە قارجى تاپشى. قىرىمعا كەلىپ دەمالۋشىلار سانى ساپ تيىلدى. بۇرىن رەسەيدەن دە، ۋكرايناداندا كەلۋشىلەر كوپ ەدى. ۋكراينا قىرىمعا جىبەرىلەتىن سۋدى بوگەپ، قىرىمنىڭ اۋىل شارۋاشىلىعىن سۋسىز قالدىردى. قىرىممەن بيزنەس جاسايتىن كومپانيالار جانە جەكە تۇلعالار سانكسيالاردان شوشىپ، قىرىممەن قاتىناس جاساعىسى جوق. سونىمەن قىرىم مەن شىعىس ۋكراينا ىڭىرانىپ، بارماعىن تىستەپ وتىر، ءبىراق امال جوق. شىعىس ۋكراينا  مەن قىرىم سەپاراتيستەرىنىڭ باسىنان وتكەنى ءبىزدىڭ سەپاراتيستىك ويداعى وتانداستارىمىزدى قاتتى ويلاندىردى.

ءازىمباي عالي