قازاقستاندا ەكى-اق دارەتحانا الەمدىك ستاندارتقا ساي كەلەدى. ولار استاناداعى ن.نازاربايەۆ اۋەجايىنىڭ جاڭا تەرمينالى مەن ەلورداداعى جاڭا تەمىرجول ۆوكزالىندا ورنالاسقان. بۇل تۋرالى بۇگىن ق ر مادەنيەت جانە سپورت ۆيسە-مينيسترى ەرلان قوجاعاپانوۆ ايتتى، دەپ حابارلايدى Qamshy.kz اقپارات اگەنتتىگى Baq.kz-كە سىلتەمە جاساي وتىرىپ.

ۆيسە-مينيستردىڭ ايتۋىنشا، دۇنيەجۇزىلىك تۋريستىك كەڭەس نورماسىنا ساي ءار 50 شاقىرىم سايىن ءبىر دارەتحانادان بولۋى ءتيىس. ءارى الەمدىك ستاندارتقا ساي بولۋ ءۇشىن اجەتحانا ساپالى بولۋى كەرەك. وندا مىندەتتى تۇردە ىستىق سۋى بولۋى ءتيىس.

«ءبىز جاڭا زاڭ جوباسىندا جول بويىنداعى سەرۆيسكە باسا نازار اۋدارىپ وتىرمىز. ءبىز قاي جولدى الساق تا ولاردىڭ بويىندا ەشقانداي سەرۆيس جوق. ءجونى ءتۇزۋ دارەتحانا جوق. ءبىز ەرىكتىلەردىڭ كومەگىمەن ەلدەگى بۇكىل اجەتحانانى تەكسەردىك. قازاقستاندا حالىقارالىق ستاندارتقا ساي ەكى اق دارەتحانا بار. بىرەۋى – استاناداعى ن.نازاربايەۆ اۋەجايىنىڭ جاڭادان سالىنعان تەرمينالىندا، ەكىنشىسى – ەلوردادا جاڭادان سالىنعان تەمىرجول ۆوكزالىندا ورنالاسقان. وكىنىشكە وراي، ەلىمىزدە حالىقارالىق نورماعا سايكەس باسقا بىردە-بىر اجەتحانا جوق»، - دەدى قوجاعاپانوۆ.

ۆيسە-مينيستردىڭ مالىمەتىنشە، قازاقستاندا جول بويىنداعى سەرۆيستى كوزدەيتىن KazWay جوباسى ءالى شيكى، وعان ءقازىر وزگەرىستەر ەنگىزىلىپ جاتىر.

«بۇگىنگى تاڭدا شەتەلدىك تۋريستەر جولدان دارەتحانا تابا المايدى. ال بار اجەتحانالاردىڭ ءتۇرى ادامدى ۇيالتادى. سول ءۇشىن ءبىز جاڭا زاڭدا جانە مەملەكەتتىك باعدارلامادا جول بويىندا تۇرعان مەكەمەلەردى مەملەكەتتىك جەڭىلدىكتەرمەن قامتاماسىز ەتۋ ماسەلەلەرىن قاراستىرامىز. وسى سالادا ەندى بەلسەندى جۇمىس اتقارامىز»، - دەدى ەرلان قوجاعاپانوۆ.

اتاپ وتسەك، بۇگىن ادىلەت مينيسترلىگىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۋريستىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تۇجىرىمداماسى قارالعان بولاتىن.