الماتى قالاسىنداعى «اتاكەنت» ساۋدا ورتالىعىنىڭ الدىنا ورناتىلعان ءتيىننىڭ ءمۇسىنىن رەسەي الماق.

بۇل تۋرالى قازاقستاندىق جانە شەتەلدىك ساۋلەتشىلەر مەن ديزاينەرلەر جينالعان پرەسس-كونفەرەنسيادا ايتىلىپتى. كونفەرەنسيا قالانى وزگەرتۋ بويىنشا وتكىزىلگەن. ديسكۋسسيا بارىسىندا ماماندار داۋعا اينالعان ءتيىندى دە ءسوز ەتتى.

«الىپ ءتيىن جايلى بار الەم تانىدى. بىزدە دە ونى ءجيى تالقىلايدى. ءتىپتى ونەر سۇيەر قاۋىم اراسىندا ونى رەسەيگە اكەلۋ تۋرالى ۇسىنىس بارىن دا ەستىپ قالدىم»، - دەيدى سۋرەتشى، ديزاينەر اندرەي ليۋبلينسكيي.

الماتىلىقتار تۇگىن قالدىرماي سىناعان ءتيىندى ماتەريالدىق ەمەس مادەني مۇرا بويىنشا يۋنەسكو ساراپشىسى، تەنگري حالىقارالىق قور باسقارماسىنىڭ مۇشەسى ەۆفرات يمامبەككە ۇناتقان سەكىلدى. ءبىراق ءوزى ەمەس، كوزدەرى.

«ءتيىننىڭ ءوزى ءسال ۇسقىنسىزداۋ، ەسەسىنە كوزدەرى ادەمى. داۋ-دامايعا تولى بولسا دا ءتيىننىڭ ارقاسىندا ءبىزدى الەم تانىپ وتىر ەمەس پە؟» - دەدى ول.

بۇعان قوسا، الماتىدا تيىننەن بولەك 60 ارحيتەكتۋرالىق ءمۇسىن ورناتىلماق.

ايتا كەتەيىك، شىلدەنىڭ باسىندا «اتاكەنت» ىسكەرلىك ىنتىماقتاستىق ورتالىعى الدىندا الىپ ءتيىن ورناتىلدى. «ءتيىن» ارت نىسانىن جاساپ شىعارعاندار ونىڭ قۇنىن دا ايتىپ بەرگەن ەدى.

Funk كرەاتيۆتى اگەنتتىگىنىڭ باسشىسى مايرا يزمايلوۆانڭ ايتۋىنشا، ءتيىننىڭ قۇنى 23 ميلليون تەڭگەگە شىققان. ونىڭ 15 ميلليونى مەملەكەت قارجىسىنان الىنسا، 8 ميلليوندى اگەنتتىكتىڭ ءوزى شىعارىپتى.

ال بارلىعى 16 ارت-نىسان بولعان كورىنەدى. ءبارىنىڭ باعاسى 78 ميلليون تەڭگەنى قۇرادى.

نەگىزىنەن ءتيىن «الماتى – جىلى قالا» جوباسى اياسىندا سالىنعان. اۆتورى بريتاندىق تانىمال قوعامدىق پابليك-ارت سۋرەتشى الەكس رينسلەر. جوبا باستاماشىلارىنىڭ پىكىرىنشە، الماتىلىق «ءتيىن» قالانىڭ جاڭا كورىكتى جەرىنە اينالىپ، تۇرعىندار مەن تۋريستەر جينالاتىن ورىن بولادى.