قازاقستان پرەزيدەنتى نۇرسۇلتان نازاربايەۆ قاراعاندىنىڭ ميلليونەر قالا اتانعانىن قالايدى، دەپ جازادى Qamshy.kz اقپارات اگەنتتىگى.

«بۇگىن ماعان قاراعاندىنىڭ اشىق الاڭداعى جاڭا ورتالىعىن كورسەتتى. ەسىمە تازا، اشىق الاڭدا استانانى سالعان كەزىم ءتۇستى. ونداي جەردە كەز كەلگەن ارحيتەكتۋرالىق ويلارىڭدى جۇزەگە اسىرا الاسىڭ. قالانىڭ ورتالىعى وسىندا بولادى. بۇل جەردە جۇمىس ىستەپ جۇرگەنىمدە قازىرگى ۋاقىتتا اكىمدىك پەن وزگە دە ءزاۋلىم عيماراتتارى بار قاراعاندىنىڭ استىندا جوعارى ساپالى كومىردىڭ ميللياردتاعان تونناسى جاتقانىن بىلەتىن ەدىك.

70 جىلدارى سسرو كومىر ونەركاسىبى مينيسترلىگى كومىردى شىعارۋ ءۇشىن قالانى وڭتۇستىك شىعىسقا كوشىرۋدى جوسپارلاعان. بالكىم، ءبارى بىردەن بولا قويماس. ءبىراق ۇلكەن قالانى ءدال وسى ورتالىقتا سالۋ كەرەك»، - دەدى مەملەكەت باسشىسى قاراعاندى وبلىسىن الەۋمەتتىك-ەكونوميكالىق دامىتۋ تۋرالى وتىرىس بارىسىندا.

نازاربايەۆتىڭ پىكىرىنشە، قاراعاندى ءتورتىنشى ميلليونەر قالا اتانۋعا ابدەن لايىق ءارى مۇمكىندىگى زور.

«بۇگىندە قالادا 500 مىڭ ادام تۇرادى. قاراعاندىنىڭ ميلليونەر قالا اتانعانىن قالايمىن. الماتىدا 2 ميلليونعا جۋىق ادام بار، استاناداعى ميلليون تۇرعىن 2030-ا دەيىن ەكى ميلليونعا جەتىپ قالۋى عاجاپ ەمەس. شىمكەنت تە ميلليونەر قالا بۇگىن. ال ەندى ميلليونەر قالالاردىڭ ساناتىنا قاراعاندى قوسىلۋى كەرەك. ول ءۇشىن ادامداردىڭ جۇمىس ىستەۋىنە ىڭعايلى كاسىپورىنداردى دامىتۋ كەرەك»، - دەدى ەلباسى.

ايتا كەتەيىك، نۇرسۇلتان نازاربايەۆ رەسمي ساپارمەن قاراعاندىعا بارعان. وندا ەلباسىنا تۇرعىن ۇيلەر مەن الەۋمەتتىك نىسانداردىڭ قۇرىلىسى تۋرالى باياندالدى.