بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ باتىس قازاقستان وبلىسىنا جۇمىس ساپارىمەن باردى. وبلىس اكتيۆى جيىنىندا ەلباسىنىڭ 5 الەۋمەتتىك باستاماسى اياسىندا وڭىردە اتقارىلىپ جاتقان جۇمىستار سارالانىپ، اقپاراتتىق تەحنولوگيالاردى بارلىق سالادا ءتيىمدى قولدانۋ جايى تالقىلاندى.
باس قوسۋدى اشقان وبلىس اكىمى بيىلعى 1 ماۋسىمدا وتكەن پارتيانىڭ ساياسي كەڭەسىندە ەلباسى، پارتيا ءتوراعاسىنىڭ پارتيا قىزمەتىن جاڭعىرتۋ اياسىندا 20-دان استام جوبانى جۇزەگە اسىرۋدى تاپسىرعانىن ايتتى. وسى ورايدا پارتيانىڭ وبلىستىق فيليالىمەن اۋقىمدى جۇمىستار اتقارۋدا.
- ناتيجەسىندە اۋىل-ايماقتاردا جاڭاشىل باعىتتاعى قۆوركينگ ورتالىقتار اشىلىپ، كىتاپحانالاردىڭ جۇمىستارى جانداندى، زامان تالاپتارىنا ساي قايتا تۇلەدى. 8 IT سىنىپتار اشىلىپ، مەكتەپ اسحانالارى مەن سپورت الاڭدارىن جاڭعىرۋ، اۋىلدىق جەرلەردە اعىلشىن ءتىلىن ۇيرەنۋ ءۇشىن قولايلى ورتا قالىپتاستىرۋ سياقتى ناقتى جوبالارىمىز بار. باستاۋىش پارتيا ۇيىمدارىنا ەرەكشە نازار اۋدارىلىپ، ولاردىڭ جۇمىسىنا قولداۋ كورسەتىلىپ، ولارعا جۇكتەلىپ وتىرعان ناقتى جۇمىستاردىڭ ساپاسىن ارتتىرۋعا مۇمكىندىك بەرىلدى. وبلىسىمىزدا پارتيالىق كادرلار رەزەرۆىن بەلسەندى ساياسي مەملەكەتتىك جانە اكىمشىلىك لاۋازىمداردى ۇسىنۋ جۇمىستارى، مەريتوكراتيا پرينسيپىندە قابىلەتتىلىگىنە جانە ىسكەرلىگىنە ساي سايلانبالى ورگاندارعا ىرىكتەۋ جۇمىستارى جۇرگىزىلىپ كەلەدى، - دەدى التاي كولگىنوۆ.
90 پاتەرلىك تۇرعىن ءۇي 7 ايعا جۋىق ۋاقىتتا سالىنىپ ءبىتتى. باسپانا ءبىرىنشى كەزەكتە ۇيگە مۇقتاج ازاماتتارعا بەرىلمەك. جارتىسى «7-20-25» باعدارلاماسى تالاپتارىمەن ساۋدالانادى. «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ قۋانىش يەلەرىنە پاتەر كىلتتەرىن سالتاناتتى تۇردە تابىستادى.
بقو-عا جۇمىس ساپارىمەن كەلگەن «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ وبلىس اكىمى التاي كولگىنوۆپەن بىرگە اتالمىش باعدارلامانىڭ وڭىردەگى العاشقى قاتىسۋشىلارىنا پاتەر كىلتتەرىن تابىس ەتتى.
ماۋلەن اشىمبايەۆ «7-20-25» باعدارلاماسى قوعامداعى ەڭ وزەكتى ماسەلەلەردىڭ ءبىرى - باسپانا جايىن ءتيىمدى شەشۋگە باعىتتالعان ماڭىزدى باستاما، اسىرەسە، جاس وتباسىلار ءۇشىن ۇلكەن مۇمكىندىك ەكەندىگىن جەتكىزدى.
7 ايدا وڭىردە 251 مىڭ شارشى مەتر تۇرعىن ءۇي پايدالانۋعا بەرىلگەن. بۇل وتكەن جىلمەن سالىستىرعاندا 9 پايىزعا ارتىق. بيىل وبلىس ورتالىعىندا ءبىر عانا «نۇرلى جەر» باعدارلاماسى ارقىلى 21 تۇرعىن ءۇي سالىنباق. قادەشيەۆتەر اۋلەتىندە بۇگىن ۇلكەن قۋانىش. ءۇيدىڭ كەنجەسى ايناشتىڭ ەندى ءوز پاتەرى بار. اۋداندىق اۋرۋحانادا زاڭگەر بولىپ قىزمەت ىستەيتىن ول «تۇرعىن ءۇي» جيناق بانكىنەن شوت اشىپ، قاراجات جيناعان.
- باسپانانى كەز كەلگەن وتباسى ءۇشىن بولاشاققا سالىنعان ينۆەستيسيا دەسەك تە، ارتىق ەمەس. وسىلايشا ەلباسى بارشا قازاقستاندىقتاردىڭ ءۇيلى بولۋىنا داڭعىل جول اشىپ، يپوتەكالىق نەسيەلەردىڭ قولجەتىمدىلىگىن قامتاماسىز ەتىپ وتىر. وسى ساپار ناتيجەسىندە بەس باستامانىڭ باتىس قازاقستان وبلىسىندا تابىستى جۇزەگە اسىرىلىپ جاتقانىنا كۋا بولدىق. الداعى ۋاقىتتا دا پارتيا بۇل جۇمىستاردى باقىلاۋدى جالعاستىرا بەرەدى، - دەدى پارتيا ءتوراعاسىنىڭ ءبىرىنشى ورىنباسارى.
ايتا كەتەيىك، وڭىردە تۇرعىن ءۇي قارقىندى سالىنۋدا. بيىلعى جەتى ايدا 250 مىڭ شارشى مەتردەن استام باسپانا ىسكە قوسىلدى. جىل سوڭىنا دەيىن تاعى 415،7 مىڭ شارشى مەتر، سونىڭ ىشىندە بەس الەۋمەتتىك باستامانىڭ ءبىرىنشى باعىتى بويىنشا 46 مىڭ شارشى مەتر تۇرعىن بوي كوتەرمەكشى. «7-20-25» باعدارلاماسىن جۇزەگە اسىرۋعا جاۋاپتى ەكىنشى دەڭگەيلى بانك وكىلدەرىنىڭ سوزىنە قاراعاندا، بقو بويىنشا 55 ءوتىنىش كەلىپ تۇسكەن. ورال قالاسى بويىنشا 19 مىڭ ادام تۇرعىن ءۇي كەزەگىندە تۇر.
