تۇركىستان وبلىسىنىڭ كەنتاۋ قالاسىنداعى قالالىق ورتالىق اۋرۋحاناسىندا زاماناۋي جوعارى تەحنولوگيالىق تەكسەرۋ مۇمكىندىگى بار ينسۋلت ورتالىعى پايدالانۋعا بەرىلدى.
اۋرۋحانا بازاسىندا اشىلعان ينسۋلت ورتالىعى كومپيۋتەرلىك توموگرافيامەن جابدىقتالعان. زامان تالابىنا ساي جاڭا قوندىرعى ينسۋلت پەن باس مي جاراقاتىن ناقتى انىقتاۋعا مۇمكىندىك بەرەدى.
زاماناۋي ۇلگىدەگى مەديسينالىق قۇرىلعى جاپوندىق Optima 540 كومپيۋتەرلىك توموگرافياسىن ساتىپ الۋعا وبلىستىق بيۋدجەت ەسەبىنەن 269،5 ملن. تەڭگە بولىنگەن.
ەندىگى كەزەكتە كەنتاۋلىقتارعا اتالعان مەديسينالىق قىزمەتتى الۋ ءۇشىن باسقا قالاعا ساپار شەكپەۋىنە دە بولادى.
جاڭا تەحنولوگيا، ادام دەنساۋلىعى سىر بەرگەننەن سىرقاتتى انىقتاپ بەرەدى.
«كومپيۋتەرلىك توموگرافيا اۋرۋدى العاشقى بەلگىلەرىنەن-اق انىقتاۋعا مۇمكىندىك بەرەدى. اپپاراتتىڭ كومەگىمەن باستاعى ىسىكتەر مەن قابىنۋ پروسەسىن، سۇيەك قۇرىلىمىنداعى اۋرۋلاردىڭ اۋىر جاعدايىنىڭ ءوزىن ناقتى تابۋعا بولادى»، – دەيدى ماماندار.
سونىمەن قاتار، مۇنداي تەحنولوگيا ارقىلى كەۋدەنى، اسقازان، اش ىشەكتىڭ، مۇرىن قۋىسى مەن بۇيرەكتەگى اۋىتقۋلاردى تەكسەرۋگە بولادى.
ەسكە سالا كەتەتىن جايت، تۇركىستان وبلىستىق دەنساۋلىق ساقتاۋ باسقارماسىنىڭ باسشىسى مۇقان ەگىزبايەۆتىڭ ايتۋىنشا، كەلەسى جىلدان باستاپ جاڭا وبلىس ورتالىعىندا بىرنەشە اۋرۋحانا مەن ەمحانالار، پەرزەنتحانالار مەن زاماناۋي تالاپقا ساي ەمدەۋ ورتالىقتارى بوي كوتەرمەك. جوبالاۋ جۇمىستارىنا شەتەلدىك كومپانيالار دا تارتىلادى دەپ كۇتىلۋدە.
«جوسپار بويىنشا وبلىس ورتالىعىنان 610 ورىندىق وبلىستىق كوپسالالى اۋرۋحانا سالىنادى. ەكىنشىدەن، وبلىستىق بالالار اۋرۋحاناسىنا قوسىمشا 150 ورىندىق عيمارات قۇرىلىسىن باستاۋ قولعا الىنىپ جاتىر. سونداي-اق، 500 كەلۋشىگە ارنالعان ەمحانا مەن وبلىستىق قان جانە سپيد ورتالىقتارىنىڭ، تۋبەركۋلەزگە قارسى جانە ونكولوگيالىق ديسپانسەردىڭ قۇرىلىسى باستالادى. بۇل ماقساتتا جوبالاۋ-سمەتالىق قۇجاتتارىنا قاجەتتى قارجى ءبولىندى»، –دەيدى باسقارما باسشىسى.
ايتا كەتەلىك، كومپيۋتەرلىك توموگرافيا اعزانىڭ بارلىق بولىمدەرى مەن جۇيەلەرىنە زەرتتەۋدى جۇرگىزۋگە مۇمكىندىك بەرەدى. قاراما-قارسى تۇستەردى قولدانىپ، باعدارلامانىڭ ارنايى پاكەتتەرىن قوسۋ ارقىلى جۇرەكتىڭ اتەروسكلەروزى كۇرە تامىرىنىڭ زاقىمدانۋ دەڭگەيىن انىقتاۋعا، وستەوپوروز اۋرۋىنا كۇدىكتەنگەن جاعدايدا، سۇيەك تىندەرىنىڭ مينەرالدى تىعىزدىعىن انىقتاي الادى. كومپيۋتەرلىك توموگرافتى ءارتۇرلى باعدارلامالارمەن جۇرگىزۋ ساپاسى فرايبۋرگ قالاسى ۋنيۆەرسيتەتتىك كلينيكاسىنىڭ جەتەكشى ماماندارىمەن جوعارى باعالانعان.
