ەلىمىزدە تىرشىلىك جاڭارعان ۋاقىتتا جىلدا بولاتىن ءاۋىس-تۇيىستىڭ بەرگى بەتى كورىنە باستادى. كۇنى كەشە ەلباسىنىڭ جارلىعىمەن استانا قالاسىنىڭ اكىمى اسەت يسەكەشيەۆ قىزمەتىنەن بوساتىلىپ، پرەزيدەنت اكىمشىلىگىنىڭ باسشىسى لاۋازىمىنا تاعايىندالدى. مەملەكەت باسشىسىنىڭ مۇنداي شەشىمىنە قاتىستى ەل اراسىنداعى پىكىر ەكىگە ءبولىندى. الايدا قولداپ، شەشىمنەن وڭتايلى ناتيجە كۇتەتىندەردىڭ قاتارى ارتقان. ماسەلەن، يسەكەشيەۆتى جاڭا ءارى جاۋاپتى لاۋازىمىمەن قۇتتىقتاپ، قۋانىشىمەن بولىسكەندەردىڭ قاتارىندا بلوگەر، ساراپشى سىرىم ءابدىراحمانوۆ، تانىمال پيار مامانى قۋات دومباي،  بەلسەندى ارۋجان سايىندار بار. ال كەيبىرى فەيسبۋكتە وتىراتىن شەنەۋنىكتى «ەندىگى پاراقشاسىن ءوشىرىپ، مەنمەنسىپ كەتەتىن شىعار» دەپ تە بولجادى. الايدا ەكس-اكىمنىڭ پاراقشاسى ءالى سول قالپىندا، ءتىپتى اكىمدىكتىڭ سايتىنداعى جاڭالىقپەن ءبولىسىپ قويىپتى.

جالپى يسەكەشيەۆ حالىق ءۇشىن نەسىمەن ەستە قالدى؟ ءبىر ءتىزىپ شىقساق...

اسەت يسەكەشيەۆ ەكى جىل استانانىڭ اكىمى بولعان ۋاقىتتا ەكى جىلدا دا قاتتى جاڭبىر سالدارىنان قالانى سۋ باستى. استانا دەسە، وزگە قالا تۇرعىندارىنىڭ كوز الدىنا ەلەستەيتىنى جاڭبىر مەن سۋ استىندا قالعان قالا ەكەندىگىندە كۇمانىمىز جوق. ياعني اكىمنىڭ شەشىمىن تاپپاعان ماسەلەلەرىنىڭ ەڭ باستىسى - قالاداعى ارىق جۇيەسىنىڭ ءجوندى تارتىلماۋى. اتالمىش ماسەلەگە قاتىستى ەكس-اكىم  ەلباسىدان سوگىس تە الدى. ال بىلتىر ساۋىردە قالاداعى تارتىپسىزدىكتىڭ كەسىرىنەن نازاربايەۆتان ءسوز ەستىگەن يسەكەشيەۆ تاڭعى 6-دان باستاپ قالانى رەتكە كەلتىرۋدى باستاپ كەتكەن ەدى.

بۇدان وزگە، اكىم قاراماعىنداعى شەنەۋنىكتەردى تاكسيگە وتىرعىزدى. ۆەلوسيپەدشىلەردىڭ جاعدايىن جاسادى، ياعني ۆەلوجولداردىڭ سانى ارتتى. ءتۇرلى جوبالاردى جۇزەگە اسىردى. ماسەلەن، "Smart Astana"، "بالاباقشاعا كەزەكتى ەسق" ارقىلى الۋ، استانا LRT، ت.ب.

يسەكەشيەۆتىڭ استانا – «سامايا ۆىشكا» دەپ اندەتۋى اكىمنىڭ زاماناۋي بولۋدان قورىقپايتىندىعىنىڭ بىردەن-بىر دالەلى بولسا كەرەك.

جالپى يسەكەشيەۆ قالا تۇرعىندارى ءۇشىن قاراپايىم اكىم رەتىندە ەستە قالدى دەسەك ابدەن بولادى. ال ساياساتكەرلەر نە دەيدى؟ اكىمنىڭ پرەزيدەنت اكىمشىلىگىنىڭ باسشىسى بولىپ تاعايىندالۋىن ساياساتتانۋشى ايدوس سارىم قولداپ وتىر. ايتۋىنشا، اسەت يسەكەشيەۆ بەلەستەردى باعىندىرعان جاس ءارى تاجىريبەلى مامان.

«پرەزيدەنت اكىمشىلىگىنىڭ باسشىسى – جابىق قىزمەتتىڭ ءبىرى. مينيسترلىكتەگى، اكىمدىكتەگى باسشىلار اتقارعان جۇمىستارىن ايتىپ، تۇسىندىرۋگە ءماجبۇر بولسا، پرەزيدەنت اكىمشىلىگىنىڭ قىزمەتكەرى ءوزىنىڭ باعىت-باعدارى جايىندا ەشكىمگە ءتىس جارمايدى. اسەت يسەكەشيەۆ – زاماناۋي ادام، وسى زاماننىڭ تۇلەگى. بالكىم ءبىر سۇحبات بەرىپ، ۇلكەن ماقالا جازىپ، ءوزىنىڭ الداعى باعىت-باعدارى تۋرالى ناقتى اڭگىمە ايتسا نەمەسە پرەزيدەنت مىناداي تاپسىرمالار بەردى، جۇمىس سوعان نەگىزدەلەدى دەپ ايتسا، قوعام ءۇشىن دە، ساياسي مادەنيەتىمىز ءۇشىن دە جاقسى بولار ەدى»، - دەپ ويىمەن ءبولىستى ساياساتتانۋشى.

سونىمەن قاتار اكىمدىك قىزمەتىن دە «جاقسى» دەپ باعالادى.  

«جۇمىسىن بارىنشا اشىق جاسادى. جەكە كولىكتەن باس تارتۋ، قوعامدىق كولىكتىڭ جۇمىسىن ورنىقتىرۋ، جالپى قوعاممەن بايلانىس ورناتا ءبىلدى. ءتىپتى «كىمدە-كىم جەكە پاراقشاسىنا جازسا، ءوزى جاۋاپ بەرەدى» دەگەندى ەستىپ قالدىم. جالپى جاستارمەن تىعىز بايلانىستا بولعان اكىم دەپ ويلايمىن. اكىم دەگەن قۇداي ەمەس، پايعامباردىڭ ۇمبەتى ەمەس، قوعامعا قىزمەت ەتەتىن ازامات. يسەكەشيەۆ قوعامعا قىزمەت كەتە ءبىلدى. تەك وسىنى ءارى قاراي دامىتىپ جالعاستىرا بەرسە دەيمىز»، - دەپ ءسوزىن قورىتىندىلادى.

قوعام بەلسەندىسى، ساياساتتانۋشى مۇحتار تايجاننىڭ دا پىكىرى ايدوس سارىمنان الىستاي قويمادى، تەك كەيبىر جوبالارىنا سىني پىكىر ءبىلدىردى.

«ول اكىم بولعان ۋاقىتتا قالا تازا بولدى. ساياباقتاردىڭ سانى ارتتى. قالانىڭ دامۋى ءۇشىن جىل سايىن قانشاما قاراجات سالىنىپ جاتتى. ونىڭ ورىندى-ورىنسىز جۇمسالعانىن بىلمەيمىن، ءبىراق استانانىڭ كورىكتى قالا بولۋىنا ىقپالىن تيگىزدى. اكىم رەتىندەگى جۇمىسىنا تەرىس پىكىر بىلدىرە المايمىن»، - دەي كەلە كوڭىلى تولماعان ءبىر جايتتى ەسكەرىپ ءوتتى.

«شىنى كەرەك، LRT جوباسىنا كوڭىلىم تولمادى. استانا حالىقارالىق اۋەجايى، EXPO-2017 كورمەسىن، ودان ءارى «ابۋ-دابي پلازا» كوپ قاباتتى كەشەنى جانە جاڭا تەمىرجول ۆوكزالىنىڭ اراسىندا جالعايتىن جاڭا رەلستى كولىك جۇيەسىنىڭ استاناعا قاجەتى جوق. قالا ونسىز دا كىشكەنتاي. ول جوبا ءۇشىن قىتايدان ءبىر  جارىم ميلليارد دوللارعا دەيىن قارىز الدىق. ۇشاقتار دا كوپ ۇشپايدى، بەكەر بولدى. تەك سىرتقى قارىزىمىزدى كوبەيتتى»، - دەدى مۇحتار تايجان.

ال پرەزيدەنت اكىمشىلىگىنىڭ باسشىسى بولىپ تاعايىندالعان اكىمگە ەكونوميست ءارى قوعام بەلسەندىسى مىنانى ايتادى:  

«ول مىنا ساياسي جۇيەنىڭ ساربازى. بۇل جۇيە ءتۇبى وزگەرەدى. سول ۋاقىتتا ونىڭ ءار ساربازى ىستەگەن ىس-ارەكەتىنە جاۋاپ بەرەدى. قازاق ەلىنە پايداسى ءتيدى مە، الدە زيانى ما؟ العاش رەت ورتا بۋىننىڭ وكىلى وسىنداي جوعارى دارەجەگە جەتىپ وتىر. سوندىقتان وعان بىلاي ايتار ەدىم: «اسەت، ەلىمىزدىڭ جاقسارۋىنا ۇلەسىڭدى قوس. سىرتقى قارىزىمىزدى ازايتۋىمىز كەرەك. پارلامەنتتى ادال، دەموكراتيالىق تۇردە سايلايىق. ءيا، پارلامەنتتىڭ ىشىندە ساۋاتتى دەپۋتاتتار بار. ءبىراق وزگەرمەي، سول كۇيى تۇرعانىنا 15 جىلعا جۋىقتادى پارلامەنتكە دەموكراتيالىق زاڭمەن جاڭا تۇلعالار كىرۋ كەرەك. سەن سوعان ۇلەسىڭدى قوسساڭ، نۇر ۇستىنە نۇر بولار ەدى»، - دەپ ءسوزىن اياقتادى.