سوڭعى ون جىلعا جۋىق ۋاقىتتا ەلىمىزدە تەرروريزم مەن سيرياعا جيھادقا اتتانعان قازاقتاردىڭ ماسەلەسى ۇلتتىق قاۋىپسىزدىككە ءقاۋىپ توندىرەتىندەي دارەجەگە جەتكەن. الەۋمەتتىك جەلىدە قازاقستاندىقتاردى «قاسيەتتى سوعىسقا» شاقىرۋ بەينەجازبالارى جيىلەدى. جيھادشىلاردىڭ سوزدەرىنە ءشۇبا كەلتىرمەگەن قازاقتار ايەلدەرى مەن بالا-شاعاسىن ەرتىپ سيريادان ءبىراق شىقتى. وزدەرىن وتقا ايداعان قازاقستاندىقتار كوپ ۇزاماي قاتەلىكتەرىن ءتۇسىنىپ، ەلگە قايتۋدى اڭساپ ءجۇر. ال ولاردىڭ سيريادا «قانداي جاعدايعا تاپ بولعاندىعىنا قاراماستان» ول ازاماتتاردىڭ قۇقىعى مەن مۇددەسىن قورعاۋ مينيسترلىكتىڭ مىندەتى.
بۇگىن پارلامەنت ءماجىلىسى وتىرىسىندا بۇل ماسەلە قايتا قوزعالىپ، ق ر ءسىم باسشىسىنىڭ ورىنباسارى مۇحتار تىلەۋبەردى سيريا مەن يراكتىڭ سوعىس الاڭدارىندا جۇرگەن قازاقستاندىقتاردى وتانىنا قايتارۋ جۇمىستارىنىڭ جۇرگىزىلىپ جاتقانىن ءارى سوعان اسا نازار اۋدارىلعانىن مالىمدەدى.
«سيريا مەن يراكتا جۇرگەن وتانداستارىمىزدى ىزدەۋ جۇمىستارى ويداعىداي جۇرگىزىلىپ جاتىر. يوردانياداعى ەلشىلىگىمىز بەن ليۆانداعى باس كونسۋلدىعىمىز ءبىزدىڭ ازاماتتارىمىزدى ىزدەۋمەن اينالىسۋدا. سونىمەن قاتار بالالارى سيريادا جۇرگەن اتا-انالاردان دا سۇراۋلار ءتۇسىپ جاتىر. سوندىقتان وسى ماسەلەگە كوپ كوڭىل بولۋدەمىز. ءسىم عانا ەمەس، ارنايى قىزمەت، قورعانىس مينيسترلىگى، ءىىم، تجك دا وسى ىسكە قاتىستى جۇمىلا كىرىستى»، - دەدى ول.
ايتۋىنشا، وتانداستارىمىزدى ەلگە قايتارۋ ءۇشىن ارنايى ۇشاق تا بولىنگەن ەكەن.
«بىرىنشىدەن، ازاماتتارىمىزدىڭ كوبى تەرروريزمگە قاتىسى بار-جوعىن انىقتايتىن ارنايى تەكسەرۋدەن وتەدى. قاتىسى جوقتار قازاقستانعا جىبەرىلەدى. كەيبىر ايەلدەر بالالارىمەن ءجۇر. ولاردىڭ بالالارى اتا-اناسىنىڭ رۇقساتىمەن قازاقستانعا قايتىرىلىپ، اناسى مەن اكەسى وپەراسيا اياقتالعانشا سوندا بولادى»، - دەدى تىلەۋبەردى.
ال «اداسىپ» سيرياعا اتتانعانداردىڭ اتا-انالارى بالالارىنىڭ جازالانۋىن قالايدى. ءتىپتى مۇحتار تىلەۋبەردى نەمەرەلەرىن ءوز قولدارىنا، اتا-انا قۇقىعىنان ايىرۋعا دەيىن باراتىن اجەلەر دە جەتكىلىكتى ەكەنىن ايتتى.
