كوپشىلىك تاعاتسىزدانا كۇتكەن «I am a singer Kazakhstan» تەلەجوباسىنىڭ ەكىنشى ماۋسىمىنىڭ العاشقى شىعارىلىمى دا كورەرمەنگە جول تارتتى. جوبا ۇيىمداستىرۋشىلارى ۋادە بەرگەندەي، شوۋدىڭ جارق-جۇرق ەتكەن ساحناسى مەن وندا شىرقالعان اسەم اندەر بىر-بىرىمەن ۇيلەسىم تاۋىپ، ءا دەگەننەن حالىقتى ەرەكشە سەزىمگە بولەدى.

جۇرەك تولقىتار ساتتەر، ەرەكشە تولعانىستار، ۋايىم مەن قۋانىش، توگىلگەن كوز جاسى، جوباداعى ورىن ءۇشىن تارتىس ءبىرىنشى شىعارىلىمنان-اق باستالىپ كەتتى. «I am a singer Kazakhstan» شوۋىنىڭ العاشقى كەزەڭىندە قازىلار القاسى قۇرامىنداعى ماقپال يسابەكوۆا، ساكەن مايعازييەۆ، ەلحان احمەدوۆ سىندى بەلگىلى ونەر يەلەرىن جىلاتقان ەرەكشە وقيعا ورىن الدى. وعان سەبەپ بولعان الماتى وبلىسى، جاركەنت قالاسىنان كەلگەن ماقسات داۋرەنبەكوۆ ەسىمدى ۇمىتكەر ەدى. ماقسات ساحناعا مايكل دجەكسوننىڭ ايگىلى «You are not alone» انىمەن شىقتى. ءوزىن جاي عانا بەينە وپەراتورمىن دەپ تانىستىرعان جاس جىگىتتىڭ داۋسىنداعى تەبىرەنىس، ونىڭ جۇرەكپەن شىرقاعان ءانى قازىلار القاسىنا ەرەكشە اسەر ەتتى. وعان قوسا، ماقسات ىرىكتەۋ كەزىندە ورىنداعان باتىرحان شۇكەنوۆتىڭ «وتان-انا» ءانىنىڭ ءبىر شۋماعىن شىرقاپ بەرگەن ساتتە ماقپال يسابەكوۆا مەن جانىنداعى سەرىكتەرى كوز جاستارىن تيا الماي، جىلاپ جىبەردى. ونەردەگى ۇزەڭگىلەس دوستارى، مارقۇم باتىرحان شۇكەنوۆتىڭ وسى ءبىر تاماشا ءانى ماقساتتىڭ ورىنداۋىندا شىنىمەن تابيعي شىققان ەدى.

بۇل شوۋعا قانداي ماقساتپەن كەلدىڭ دەگەن سۇراققا ماقسات: «مەن مۇندا ءوزىمدى كورسەتۋ ءۇشىن ەمەس، باعىمدى سىناۋعا كەلدىم. انشىلىكتى كاسىپ ەتپەيمىن. ءبىراق ونەر ادامدارىنا، ولاردىڭ ومىرىنە قاتتى قىزىعامىن، تالانتتارىنا تابىنامىن. ال بىلايعا ۋاقىتتا بەينە وپەراتور رەتىندە ءناپاقامدى تاۋىپ ءجۇرمىن»، - دەپ جاۋاپ بەردى.

وزدەرىڭىز بىلەتىندەي، «I am a singer Kazakhstan»  سايىسىنىڭ ەرەجەسى بويىنشا، زالداعى كورەرمەندەردىڭ 90% داۋسىنا يە بولعان ۇمىتكەر داۋسىز كەلەسى كەزەڭگە وتەدى. ال 60 % داۋىس جيناسا، ولاردىڭ ارى قارايعى تاعدىرىن ساراپشى-قازىلاردىڭ پىكىرى شەشەدى. دەگەنمەن، سايىستىڭ اتى – سايىس. وكىنىشكە قاراي، ساراپشى قازىلاردى ەرەكشە اسەرگە بولەگەن ماقسات كەلەسى كەزەڭگە ءوتۋ ءۇشىن كورەرمەندەر تاراپىنان جەتكىلىكتى داۋىس جيناي المادى.

العاش رەت ساحناعا شىعىپ، ءوزىنىڭ تابيعي داۋسىمەن، بىرەگەي ورىنداۋ مانەرىمەن كادىمگى كاسىبي انشىلەردى تاڭداي قاقتىرعان جاس جىگىت قارسى الدىندا وتىرعان ونەر يەلەرىنە باسىن ءيىپ، «I am a singer Kazakhstan»  شوۋىمەن قوش ايتىستى.