پارتيالىق جاڭعىرتۋ باسىمدىقتارىنىڭ ءبىرى – پارتيا قاتارىن ساپالى جاقسارتۋ بولىپ تابىلادى. وسىعان بايلانىستى پارتياعا قابىلداۋ جانە مۇشەلەرىن ەسەپكە الۋ تاسىلدەرى قايتا قارالادى دەپ جازادى Qamshy.kz اقپارات اگەنتتىگى. ەگەر بۇرىن پارتيا مۇشەلەرى تۋرالى اقپارات تەك 2 باعىت، 22 پارامەتر بويىنشا مالىمەتتەردى قامتىسا، ەندى 9 نەگىزگى باعىت بويىنشا – 70-تەن استام پارامەترلەردى قامتيدى. وسى جانە وزگەدە جاڭاشىلدىقتار «نۇر وتان» پارتياسى باستاۋىش پارتيا ۇيىمدارىنىڭ قىزمەتىن جانداندىرۋعا ارنالعان تۇجىرىمداما جوباسىنا ەنگەن.

اتالمىش قۇجاتتى پاتيالىقتار تامىز ايىنان باستاۋ العان «باستاۋىش پارتيا ۇيىمدارىنىڭ» ايماقتىق فورۋمىندارىندا تالقىلاۋدا. وسى ۋاقىتقا  وڭتۇستىك، ورتالىق سولتۇستىك-شىعىس وڭىرلەرىن قامتىعان، 800-گە جۋىق باستاۋىش پارتيا ۇيىم باسشىلارىنىڭ باسىن قوسقان فورۋمدار شىمكەنت، قاراعاندى، پاۆلودار قالالارىندا وتكەن بولاتىن. ەندى سوڭعى ايماقتىق فورۋم اقتوبە قالاسىندا ءوتتى.

اقتوبەدەگى القالى جيىندا ماڭعىستاۋ، اتىراۋ، باتىس قازاقستان جانە اقتوبە وبلىستارىنان جينالعان 200-دەن استام پارتيالىقتار باستاۋىش پارتيا ۇيىمدارىنىڭ قىزمەتىن جانداندىرۋعا ارنالعان تۇجىرىمداما جوباسىن تالقىلادى.

فورۋم جۇمىسى 4 سەكسيا بويىنشا ءجۇرىپ، ءار سەكسيادا پارتيالىقتار كوتەرىلگەن تاقىرىپتار توڭىرەگىندە ءوز ۇسىنىس، پىكىرلەرىن ايتتى.

سەكسيا جۇمىستارىنا «نۇر وتان» پارتياسىنىڭ حاتشىسى تامارا دۇيسەنوۆا جەكە قاتىسىپ، ايتىلعان ۇسىنىستاردىڭ بارلىعى ىرىكتەلىپ، ساراپتالىپ، جىل سوڭىندا استانادا وتەتىن رەسپۋبليكالىق بپۇ-نىڭ فورۋمىندا جاريالاناتىنىن جەتكىزدى.

تۇجىرىمداما جوباسى باستاۋىش پارتيا ۇيىمدارىنىڭ جۇمىس تاسىلدەرىن قايتا قۇرۋدى قاراستىرادى. بپۇ جۇمىسىن جانداندىرۋ ءۇشىن قولدانىستاعى كوزقاراستار قايتا قارالىپ، جاڭا تاسىلدەر، باعىتتار قالىپتاسادى. بۇل تۋرالى ءبىرىنشى سەكسيادا ايتىلدى. سەكسيا بارىسىندا بپۇ-نىڭ قىزمەتىن باستاۋىش پارتيا ۇيىمى جانە پارتيا مۇشەلەرىنىڭ دەرەكتەر بازاسىن وزەكتەندىرۋ، جۇمىستارى تالقىلاندى. سونىمەن قاتار، قاتىسۋشىلار پارتيانىڭ بارلىق قىزمەتىن سيفرلاندىرۋعا، پارتيا مۇشەلەرىنىڭ ءبىرىڭعاي بازاسىن قۇرىپ، قۇجات اينالىمىن قىسقارتۋعا جانە پارتيا قىزمەتىنىڭ تيىمدىلىگىن ارتتىرۋعا باعىتتالعان «ساندىق پارتيا» جوباسىمەن تانىستى.

ەكىنشى سەكسيادا پارتيا جۇمىسىنىڭ الەۋمەتتىك جەلىدەگى تەحنولوگيالارى تۋرالى ايتىلدى. بۇل سەكسيادا پارتيالىقتار الەۋمەتتىك جەلىدە قالاي جۇمىس ىستەۋ كەرەكتىگىن، زاماناۋي جاڭا تاسىلدەردى ۇيرەندى.

ءۇشىنشى سەكسيادا شاعىن جانە ورتا بيزنەستى دامىتۋ، سيفرلاندىرۋ، «رۋحاني جاڭعىرۋ» شەڭبەرىندەگى پارتيالىق جوبالاردى ىسكە اسىرۋ تاسىلدەرى، سپيكەرلەرمەن جۇمىس جاساۋ مەxانيزىمدەرى تالقىلاندى. 

ءتورتىنشى سەكسيانىڭ جۇمىسى پارتيالىق كادرلار رەزەرۆىن قالىپتاستىرۋ ماسەلەلەرىنە ارنالدى. وندا پارتيالىق كادرلىق رەزەرۆ قالىپتاستىرۋدىڭ ماقساتى جانە نەگىزى قاعيدالارى ءتۇسىندىرىلدى. پارتيالىق رەزەرۆكە ەنگەن بپۇ-نىڭ ۇزدىك ءتوراعالارى مەن بەلسەندى پارتيا مۇشەلەرى مەملەكەتتىك ورگاندارداعى ساياسي جانە سايلانبالى لاۋازىمدارعا جانە پارتيالىق ورگاندارداعى لاۋازىمدارعا ۇسىنىلاتىن بولادى.

- كەلەسى جىلدىڭ ءبىرىنشى قاڭتارىنان باستاپ «سايلاۋ» تۋرالى زاڭعا ەنگەن وزگەرىستەر مەن تولىقتىرۋلار ءوز كۇشىنە ەنەدى. سوعان سايكەس اۋداندىق دەڭگەيدەن باستاپ جەرگىلىكتى ءماسليحاتقا سايلاۋ پارتيالىق ءتىزىم ارقىلى وتەتىن بولادى. ال، پارتيالىق ءتىزىم پارتيالىق كادرلىق رەزەرۆتەن الىنۋى قاجەت. بۇگىن ءبىز فورۋم بارىسىندا پارتيالىق كادرلىق رەزەرۆتىڭ قالاي قالىپتاساتىنى تۋرالى جانە سول تىزىمگە ەنگەن ۇمىتكەرلەردى ۇسىنۋىدا كەزدەسەتىن كەدەرگىلەردى تالقىلايتىن بولامىز، - دەدى پارتيا حاتشىسى.