باستىقتىڭ الدىندا باس كيىم شەشپەگەنى ءۇشىن ماكس بوقايەۆقا ەكىنشى رەت سوگىس جاريالادى. وسىعان دەيىن Qamshy.kz اقپارات اگەنتتىگى باستىقتىڭ الدىندا باس كيىمىن شەشپەگەن ماكس بوقايەۆقا اۋىر جازا قولدانىلاتىنىن جازعان. تالعات ايان ماكس بوقايەۆقا ەسكەرتۋ بەرىپ، جازا قولداناتىن بولسا، ونىڭ بوستاندىققا شىعۋ ۋاقىتى الىستاپ، 6 ايعا سۋس-قا قامالاتىنىن ايتتى. سونىمەن بىرگە ماكس بوقايەۆ اناسىمەن كەزدەسۋ تۇرماق تاكسافون ارقىلى دا سويلەسە المايدى.  

تالعات  ايان ءوزىنىڭ فەسبۋك پاراقشاسىنا ماكس بوقاۆقا پەتروپاۆل قالاسىنداعى ەس-164/3 كولونيا اكىمشىلىگىنىڭ ەكىنشى رەت سوگىس جاريالاعانىن جازىپ، بيلىكتەن بەلسەندىنى جايىنا قالدىرۋدى تالاپ ەتتى.

«2016 جىلى جەر ميتينگىسىن ۇيىمداستىرعانى ءۇشىن 5 جىلعا سوتتالعان ماكس بوقايەۆقا پەتروپاۆل قالاسىنداعى ەس-164/3 كولونيا اكىمشىلىگى ەكىنشى رەت سوگىس جاريالادى. كۇندەلىكتى تەكسەرۋ كەزىندە جاساق باسشىسىنىڭ الدىندا باس كيىمىن شەشپەگەنى ءۇشىن. وسىنداي دا بولادى... باستىق الدىندا باس كيىم شەشۋ تۋرالى تالاپ ادامنىڭ ار-نامىسىن تاپتايدى.

سونىمەن قاتار، بۇل كورىنەۋ زاڭسىزدىق، سەبەبى باس كيىمىن شەشۋ تۋرالى مىندەت ءىىم - 20.02.2017 جىلعى N36 قۇپيا بۇيرىعىندا كورسەتىلگەن. بۇل بۇيرىقتى ەش جەردەن تابا المايسىز، ونىڭ قۇپيالى دەگەن گريفى بار. ياعني، قىزمەتكەرلەردەن باسقا ەشكىم كورمەگەن بۇيرىق نەگىزىندە ماكستى جازالادى. سوندا سوتتالعاندار بۇل بۇيرىقپەن تانىسا المايدى، ءبىراق ورىنداۋعا مىندەتتى. وسىنداي دا جاعداي بولادى، وقىرماندار.

ءقازىر ماكستىڭ ادۆوكاتتارى كۋيس-پەن سوتتاسىپ جاتىر، وسى قۇپيا بۇيرىقتى زاڭسىز دەپ تانۋ تۋرالى. ءبىرىنشى سوت تالاپ ارىزدى قاناعاتتىرمادى، جاقىندا استانا قالالىق سوتىندا اپەللياسيالىق شاعىم قارالادى. ادىلدىك جەڭەر دەگەن ءۇمىت جوق.

بۇل جاعدايدى، ەگەر ماي قىزمەتكەرى سىزگە ايىپپۇل سالىپ، ءبىراق ءجول-جۇرۋ ەرەجەسىن قۇپيا دەگەنىمەن بىردەي. ءىىم-نىڭ كۋيس باسشىسى بازىلبەكوۆ، باس پروكۋرور، جوعارعى سوت باسشىسى زاڭسىزدىقتاردى توقتاتىپ، حالىق الدىنداعى ابىرويلارىڭدى ودان سايىن تۇسىرە بەرمەي، ونسىز دا باس بوستاندىعىنان ايىرىلعان ماكستى جايىنا قالدىرىڭدار»، دەپ جازادى تالعات ايان.

ال تالعات اياننىڭ بۇل جازباسىن وقىپ شىققان 2016 جىلى جازاسىن وتەگەن الماتىلىق تۇرعىن ۆلاديمير كوزلوۆ مۇنداي زاڭ تالابى جوق ەكەنىن جازعان.

«مەن بىلەمىن، 2016 جىلى مۇنداي تەكسەرۋ ەرەجەسى بولماعان. سەبەبى مەن كەزىندە تەكسەرىس كەزىندە باس كيىمىمدى شەشكەن جوقپىن. ماعان بەرىلگەن بۇيرىقتى، زاڭ تالاپتارىن جاتقا ايتىپ بەرىپ، ورىنداماعان بولاتىنمىن. بۇل تالاپتى باسقا ادامدار ويدان شىعارعان. تەكسەرۋشىلەر جازاسىن وتەۋشىلەردەن باس كيىمدەرىن شەشىپ،  وزدەرىنىڭ الدىندا باس يەتىن مالاي، قۇل جاساۋعا تىرىسادى»،— دەيدى ۆلاديمير كوزلوۆ.