"اماندىق مىرزا، اۋىلىڭىزدى كىم توناپ ءجۇر" دەگەن ماتەريال بۇگىن "قامشى" بەتىنەن جارىق كورگەن بولاتىن. قالامى قارىمدى جۋرناليست سانسىزباي نۇربابا الماتى وبلىسى ەڭبەكشىقازاق اۋدانىنا قاراستى سوگەتى اۋىلى تۇرعىندارىنىڭ سۋ قۇبىرى ماسەلەسى بويىنشا دۇرلىگىپ جاتقانىن، جەرگىلىكتى قازاقتىڭ ناز-وكپەسىن وبلىس اكىمى اماندىق باتالوۆقا جەتكىزۋدى پارىز دەپ ءبىلىپتى. ءبىز دە مالمەن كۇن كورىپ وتىرعان حالىقتىڭ جانايقايىن جوعارى جاقتاعىلارعا جەتكىزۋ جولىندا سەبەپكەر بولۋدى ءجون دەپ شەشتىك. قۋانىشىمىزعا وراي، الماتى وبلىسى اكىمىنىڭ باسپا ءسوز حاتشىسى عالىمۇرات جۇكەل رەداكسيا پوشتاسىنا اتالمىش ماقالاعا قاتىستى جاۋاپ جىبەرىپ وتىر. ونى وقىرمان نازارىنا ۇسىنامىز:

"سوگەتى اۋىلدىق وكرۋگى اكىمى اپپاراتىنا 2018 جىلدىڭ شىلدە ايىنىڭ 28 كۇنى اۋىل تۇرعىندارىنان مال سۋعارۋعا ارنالعان سۋ قۇبىرلارىنىڭ بولشەكتەنىپ شىعارىلعانى تۋرالى اقپارات ءتۇستى. اتالعان ماسەلە بويىنشا اۋىلدىق وكرۋگ اكىمى اپپاراتىنىڭ قىزمەتكەرلەرى، جەرگىلىكتى ۋچاسكىلىك ينسپەكتورمەن بىرگە ورىنعا شىعىپ، 800 مەتر سۋ قۇبىرلارىنىڭ قازىلعاندىعىن انىقتادى. سول ۋاقىتتا، زاڭسىز جاسالعان ارەكەت بويىنشا اكت ازىرلەنىپ، بارلىق اقپاراتتار پوليسيا بولىمشەسىنە تاپسىرىلدى. ۋاقىتشا ساقتاۋ ءۇشىن اتالعان قۇبىرلار اۋىلدىق وكرۋگى اكىمىمەن الىندى، ىشكى ىستەر بولىمىنە ارىز بەرىلدى.

انىقتالعان جايت بويىنشا پوليسيا بولىمشەسىمەن سوتقا دەيىنگى الدىن-الا تەرگەۋ جۇمىستارى جۇرگىزىلدى. الايدا، بەلگىسىز ازاماتتارمەن قۇبىرلاردى قايتا بولشەكتەپ الۋ ارەكەتى قايتالاندى. بۇل تۇستا اۋىلدىق وكرۋگ اكىمىمەن 2018 جىلدىڭ 12 قىركۇيەگىندە ىشكى ىستەر ورگاندارىنا قايتا ارىز بەرىلىپ، قۇبىرلاردى قازۋعا قاتىستى جۇرگىزىلىپ جاتقان جۇمىستاردى توقتاتۋ بويىنشا شارا قابىلداندى.

قازىرگى ۋاقىتتا زاڭسىز قۇبىرلاردى بولشەكتەپ الۋ بويىنشا جۇرگىزىلگەن جۇمىستار توقتاتىلىپ، اتالعان جايتتىڭ ۇيىمداستىرۋشىلارىن جانە قىلمىستىڭ مۇشەلەرىن ۇستاۋ بويىنشا ىشكى ىستەر ورگاندارىمەن ارنايى ءىس-شارالار وتكىزىلۋدە. كورسەتىلگەن زالال ارەكەتتەر بويىنشا، سونىمەن قاتار جەردى قالپىنا كەلتىرۋ جۇمىستارى ايىپتى جاق تاراپىنان قاراستىرىلاتىن بولادى".