ماحابباتقا سەنەسىز بە؟ ال سۇيگەن ادامى ءۇشىن ءومىرىن قۇربان ەتۋگە دايار جانداردىڭ بارىنا شە؟ بىلەسىز بە، ءدال وسى ساتتەن باستاپ ماحاببات دەگەن ۇلى سەزىمنىڭ تەرەڭىنە شىنايى ءۇڭىلدىم، سەزىندىم، سەندىم، اشىعىن ايتقاندا، تومەندەگى وقيعا مەنى سەندىردى. 1970 جىلدارى اتاقتى فۋتبولشى بولعان جان-پەردىڭ ايەلى ۇيقىدا جاتقان، ءتىپتى وزگەلەرى ولدىگە ساناعان كۇيەۋى ءۇشىن 35 جىل بويى ءۇمىت ۇزبەي ءومىر ءسۇرىپ كەلەدى. سۇيگەن جارىنىڭ ءبىر كۇنى تىك تۇرىپ، قۇشاعىنا الىپ، قاپسىرا قۇشاقتايتىندىعىنا سەنەدى. تەك كينولاردا عانا كەزدەسەتىن قيال-عاجايىپقا تولى بۇل وقيعا كەز كەلگەن تاس جۇرەكتى جىبىتەرى انىق.  

ماڭگىلىك 17 ناۋرىز

بەرنادەت ادامس امەريكالىق «سۋىر كۇنى» ءفيلمىن جەك كورەدى. ول ءۇشىن «سۋىر كۇنى» جاي عانا كينونىڭ سيۋجەتى ەمەس، ءومىرى. مىنە، 35 جىل بويى بەرنادەتىڭ ءار كۇنى بىر-بىرىنە ۇقساس. فرانسيالىق كەسسارگ كوممۋناسىنداعى كىشىگىرىم ءۇي، سول باياعى بولمە، جيھاز، سول توسەك جانە 35 جىل بويى توسەكتە تاپجىلماي جاتقان ەر ادام. ول ەر ادام 1970 جىلدارى فرانسيانىڭ ۇلتتىق قۇراماسىندا ويناعان بەلگىلى فۋتبولشى، جارى - جان-پەر ادامس.

1982 جىلدىڭ 17 ناۋرىزىندا فۋتبولشىنىڭ ءومىرى توقتاپ قالعان. ءدال سول كۇنى ول تىزەسىندەگى سىڭىرىنە كىشىگىرىم وپەراسيا جاساتۋ ءۇشىن ليوندىق اۋرۋحاناعا بارادى. اۋرۋحاناعا بارا جاتقان جولدا كارەراسىنا نۇكتە قويلارىن ول ىشتەي سەزدى مە ەكەن؟! سوڭعى كۇندەرى تىزەسى اۋىرىپ، مازاسى قاشىپ جۇرگەن. بىرنەشە اي بويى اۋىرسىنۋدى باساتىن دارىلەر قابىلداپ ءجۇردى. جاتتىعۋلارى اياقتالعان سوڭ پاريجگە بارىپ، وپەراسيا جاساتۋدى جوسپارلادى. الايدا ليوندىق اۋرۋحانادا جۇمىس ىستەيتىن تانىس دارىگەرى ءوز كلينيكاسىندا-اق ەمدەپ جازىپ بەرەتىنىن ايتىپ شاقىرادى.

وپەراسيا بارىسىندا ەشقانداي قيىندىق تۋىندامايدى. ءبىراق تاعدىرعا امالىڭ بار ما؟ سول ۋاقىتتا فرانسيادا دارىگەرلەردىڭ شەرۋى ءجۇرىپ جاتتى. اۋرۋحاناعا دارىگەرلەر جەتىسپەدى. انەستەزيولوگ ايەل ەدۋارد ەرريوتا ءبىر ۋاقىتتا ءۇش وپەراسيانى ءوزى جاسايدى. ەرەسەكتەرمەن قوسا بالاعا دا ءوزى وتا جاساپتى. سونىڭ كەسىرىنەن جان-پەرگە بايقاۋسىزدا ەكى مارتە ناركوز دوزاسىن سالىپ قويادى. ال حيرۋرگتىڭ كومەكشىلەرى جۇمىسقا جاڭادان ورنالاسقان تاجىريبەسىز ماماندار ەدى.

ءدال سول ۋاقىتتا بەرنادەت كوفە ءىشىپ، 11 جاستاعى ۇلى لوران مەن 4 جاسار فرەدريكتىڭ جانىندا وتىر ەدى. بالالارىنا سىر بىلدىرمەسە دە، جۇرەگى الدەنەنى سەزەدى. كۇيەۋى اۋرۋحاناعا اتتانار ساتتە: «ءبارى جاقسى بولادى، ۋايىمدايتىن دانەڭە جوق» دەپ كەتىپ ەدى، ءبىراق ايەل جۇرەگى قاتتى تولقىدى. ال شىنىنا كەلگەندە، بۇل جان-پەردىڭ سوڭعى سوزدەرى ەدى.

مەن سەنى كۇتەمىن

بىرنەشە ساعاتتان سوڭ كۇيەۋىنەن حابار العان بەرنادەت بالالارىن اتاسى مەن اجەسىنە قالدىردى دا، اۋرۋحاناعا قاراي اسىقتى. دارىگەرلەر ادامس حانىمعا شىندىقتى تەلەفون ارقىلى ايتا قويمادى. جان-پەر كوماعا ءتۇسىپ قالعان ەكەن. بەس كۇن بويى بەرنادەت كۇيەۋىنىڭ جانىندا بولدى. شاقىردى، جىلادى، ايقايعا باستى، جوق، جان-پەر ءۇن-تۇنسىز...

كەيىن ونى وزگە اۋرۋحاناعا اۋىستىرۋ جايلى ۇسىنىستار ءتۇستى. سەبەبى دياگنوزى ادام شوشىرلىق ەدى: ميىنىڭ جارتى بولىگى زاقىمدانعان، ءتىپتى ىستەن شىققان، قايتا قالپىنا كەلمەيدى. جان-پەر وزدىگىنشە تىنىس الادى، تەك ءومىر ءسۇرىپ جاتقان جوق.

ء-تىپتى، ويلاۋدىڭ ءوزى قورقىنىشتى، - دەيدى 30 جىلدان كەيىن بەرنادەت. – دارىگەرلەر ەۆتانازيا جايلى ايتتى، ءبىراق مەن باس تارتتىم، ەستىگىم دە كەلمەدى. ەركىنەن تىس ءومىرىن قالايشا قيىپ قويماقپىن؟!

بىرنەشە كۇننەن سوڭ بەرنادەت كۇيەۋىن ۇيىنە الىپ كەتتى. سودان بەرى ءار كۇنىن كۇيەۋىنە قامقورلىق كورسەتۋمەن وتكىزەدى. تۇندە قان ۇيىپ قالماس ءۇشىن تەرىس قاراتىپ جاتقىزادى. كۇندىز جۋىندىرادى، تاماقتاندىرادى، جاڭالىقتارمەن ءبولىسىپ وتىرادى، بىرگە ءان تىڭدايدى. فرانسيادا «شەربۋر قولشاتىرى» ءانى تانىمال ەدى. جاس جۇبايلار ۇيلەنۋ تويلارىندا وسى انگە بيلەپ، سودان بەرى ەكەۋىنىڭ سۇيىكتى اندەرىنە اينالعان. ءان ماتىنىندە «مەن سەنى كۇتەمىن» دەگەن سوزدەرى بار...

ۇيقىداعى اتلەتتىڭ ءۇيى

جان-پەردىڭ بولمەسىندەگى ۋاقىت توقتاپ تۇر. اندا-ساندا كوڭىلىن سۇراپ كەلەتىندەر كىرەدى. بالالارى دا ءجيى كىرىپ تۇرادى. ءقازىر ەكەۋىنىڭ دە 35 جىل بۇرىنعى ادامستان جاستارى ۇلكەن. ۇلكەنى لوران اكەسىن تانىپ ۇلگەرگەن. كوز الدىنا كوڭىلدى، باتىل، مەيىرىمدى اكە ەلەستەيدى. ال كىشىسى تەك سۋرەت ارقىلى تانيدى. جان-پەر مەن بەرنادەتتىڭ نەمەرەلەرى دە بار. ولار اتالارىنىڭ بولمەسىنە كىرىپ، اشىق، ءبىراق كورمەيتىن كوزدەرىنە ءۇڭىلىپ شىعادى.

بەرنادەت ءۇيىن «ۇيقىداعى عاجاپ اتلەتتىڭ ءۇيى» دەپ اتاپ كەتكەن. 35 جىلدان بەرى وزگە ادامدارعا جان-پەردى سۋرەتكە نە ۆيدەوعا تۇسىرۋگە تىيىم سالىپ كەلەدى، تەك ەسكى سۋرەتتەرىن عانا كورسەتەدى.

ادامس فرانسۋز فۋتبولىنىڭ تاريحىنا وشپەس ءىز قالدىرعان تۇلعا. سول سەبەپتى فۋتبول فەدەراسياسى ۇلتتىق قۇراما ويىنشىسىنىڭ وتباسىنا قامقورلىق تانىتىپ وتىرادى. ءالى كۇنگە دەيىن قايىرىمدىلىق ويىندارىن وتكىزەدى ەكەن. قولداۋسىز بەرنادەت 35 جىل بويى مۇنداي اۋىر جۇكتى ارقالاپ جۇرە الماس ەدى. ليوندىق كلينيكاعا قارسى سوت ءىسى دە بولعان، الايدا ناتيجەسى كوڭىلگە قونىمدى ەمەس: ەكى مارتە ناركوز سالعان انەستەزيولوگ ءبىر ايعا قامالىپ، كىشىگىرىم ايىپپۇل تولەدى.

العاشقى جىلدارى بەرنادەتكە اتا-اناسى كومەكتەسىپ ءجۇردى. ءبىر كەزدەرى كۇيەۋ بالالارى رەتىندە قابىلداماعان سۇلۋ بەرنادەتتىڭ اتا-اناسى ۋاقىت وتە كەلە قىزدارى ءۇشىن جانىن بەرۋگە دايىن جان-پەردى تۋعان بالالارىنداي جاقسى كورىپ كەتتى.

باقىتتان جان تاپسىرۋ

ء-وزىمدى «جالعىزبىن» دەپ ايتۋعا اۋزىم بارمايدى. مەن ءۇشىن جان-پەر ءتىرى، ءومىر ءسۇرىپ جاتىر. ءيا، مەنى ەستىمەيدى، ءبىراق كۇيەۋىممەن كۇندە سويلەسەمىن. ءبىراق كەي داۋىستاردى ەستيتىندەي. يت ۇرگەندە، ەسىك تارس جابىلعاندا سەلك ەتەدى، - دەيدى بەرنادەت.

ۋاقىت شىن مانىسىندە توقتاپ قالعانداي. باسىنا بىرەن-ساران اق شاش شىققانى بولماسا، جان-پەر 35 جىل بويى قارتايماعان. بىرنەشە كۇن بۇرىن 69 جاسقا تولدى. وتباسىلىق داستۇرگە ساي بەرنادەت ءار تۋعان كۇنىندە كۇيەۋىنە جاڭا كيىم سىيلايدى. كۇن سايىن جاڭا فۋتبولكا مەن جەمپىر كيگىزىپ قويادى. 1982 جىلى ۋاقىت توقتاپ قالعان بولمەنى جانداندىرىپ وتىرادى.

ادامس حانىم عىلىم الەمىندەگى جاڭالىقتاردى ءجىتى باقىلاپ وتىرادى. كۇندەردىڭ بىرىندە جان-پەر ادامستىڭ توقتاپ قالعان ميىن ىسكە قوساتىن مەديسينا تۋارىنا سەنەدى. الايدا ءبىر وي ونى ءجيى مازالايدى.

-كۇيەۋىمنەن بۇرىن ءولىپ كەتەمىن بە دەپ قورقامىن. مەن جان-پەرگە كۇن سايىن، ساعات سايىن قاجەتپىن. ول كىشكەنتاي بالا سياقتى، مەنسىز ءومىر سۇرە المايدى. مەن بولماسام، وعان كىم قامقورلىق تانىتادى. بالالارىم با؟ ولارعا ماسىل بولعانىن قالامايمىن، ومىرلەرى جارقىن بولسا دەيمىن. بۇل – مەنىڭ تاعدىرىم، - دەيدى ايەل.

بەرنادەتتىڭ ءتوزىمى قاي ۋاقىتقا دەيىن جەتەدى؟ مۇنى اركىم ءارتۇرلى بولجايدى. جان-پەردىڭ وياناتىنىنا ەشكىم سەنبەيدى دە. ءولىم مەن ءومىردىڭ اراسىندا قالىپ قويعان ادامعا قامقورلىق تانىتىپ جاتقان ايەلىنىڭ وقيعاسىن جۇرت ەرتەگىلەر مەن اڭىزدارداعى كەرەمەت ماحاببات حيكايالارىنا تەڭەيدى. الايدا بەرنادەت ءۇشىن سوڭعى 35 جىل ماحابباتپەن قاتار قايعىعا تولى كۇندەر سانالدى.

«35 جىل بويى تەك ءبىر ارمانمەن ءومىر ءسۇرىپ كەلەمىن، ەڭ بولماعاندا 5 مينۋتقا ويانسا ەكەن. ونىڭ داۋسىن ەستىگىم كەلەدى، قۇشاعىن سەزىنگىم كەلەدى. تەك سودان كەيىن ەش الاڭسىز ولەر ەم... باقىتتان ولەر ەم...