موڭعوليا پرەزيدەنتى ح.باتتۋلگا موڭعولياداعى مادەنيەت ەلشىلەرىمەن كەزدەستى. ولاردىڭ اراسىندا حالىقارالىق تۇركى اكادەمياسى عىلىم ءبولىمىنىڭ اعا مەنەدجەرى اقەدىل تويشان ۇلى دا بار. بۇل تۋرالى سوڭعوليا پرەزيدەنتىنىڭ رەسمي سايتى حابارلادى.

كەزدەسۋدە باتتۋلگا موڭعوليا مادەنيەت ەلشىسى دەگەن ابىرويلى دا جاۋاپكەرشىلىگى زور مىندەتتى ادال اتقارىپ، شىعارماشىلىق ەڭبەگىمەن موڭعوليانىڭ مادەني قاتىناسىنا ەلەۋلى ۇلەس قوسىپ جۇرگەن ازاماتتارعا العىسىن ءبىلدىردى. پرەزيدەنت ەلشىلەردى موڭعول ەلىنىڭ الەۋمەتتىك، ەكونوميكالىق، مادەني بايلانىستارى تۋرالى اقپارات الماسىپ، تاريحي، مادەني مۇرالاردى جۇيەلى ناسيحاتتاپ، ۇكىمەتتىك جانە قوعامدىق ۇيىمدارمەن تىعىز بىرلىكتە، بەلسەندى جۇمىس جاساۋعا شاقىردى.

ءوز سوزىندە باتتۋلگا: «ءبىزدىڭ كەڭ بايتاق جەرىمىزدە عۇن، تۇرىك، موڭعول يمپەريالارى ءومىر سۇرگەن، الەمگە اسەر ەتكەن. كوشپەلى وركەنيەت داستۇرگە باي. سول سەبەپتەن تۋريزمگە اسا ءمان بەرىپ، الداعى ۋاقىتتا ءىرى باعدارلاما جاساماقپىز. بۇل جۇيەدە تۇركى مۇراسىنا ارنالعان كەشەن دە بوي كوتەرەدى، مەن وسى ماسەلەنى الداعى ۋاقىتتا پارلامەنتكە تانىستىراتىن بولامىن»، - دەدى.

قازاقستانداعى موڭعوليانىڭ مادەنيەت ەلشىسى، عالىم، TWESCO عىلىم ءبولىمىنىڭ اعا مەنەدجەرى اقەدىل تويشان ۇلى: «ەلباسى نۇرسۇلتان نازاربايەۆتىڭ باستاماسىمەن قۇرىلعان حالىقارالىق تۇركى اكادەمياسى كوشپەلى وركەنيەتتى زەرتتەۋگە جۇيەلى ءمان بەرىپ كەلەدى. اكادەميا موڭعوليانىڭ بۇلعىن ايماعىندا ورنالاسقان شيۆەەت ۋلاان كەشەنىنە ءۇش جىل ارحەولوگيالىق زەرتتەۋ جۇرگىزدى، ناتيجەسى تابىستى بولدى. موڭعوليا ۇلتتىق مۋزەيىمەن بىرلەسىپ كەرۋلەن جوباسىن جۇزەگە اسىرىپ، حەنتاي ايماعىنداعى حايااحۋداگ كونە تۇركى كەشەنىنە ارحەولوگيالىق قازبا جۇرگىزىپ، زەرتتەۋ ناتيجەلى بولدى. كەشەندەردەن تابىلعان قازىنالار تاريحىمىزدى زەردەلەۋگە سونى سەرپىن بەرەرى ءسوزسىز. ەسكەرتكىشتەردى قورعاۋعا ءارى ساقتاۋعا ۇلەس قوسىلۋدا. وسى عىلىمي ەكسپەديسيالارعا كومەك كورسەتكەن موڭعولياعا، ارىپتەس عىلىمي-مادەني ۇجىمدارعا، عالىمدارعا العىسىمىز شەكسىز. الداعى جوسپارلارىمىزعا قولداۋ ءبىلدىرىپ، قابىلداعانىڭىزعا راقمەت ايتامىز»، - دەدى.

كەزدەسۋگە موڭعوليانىڭ سىرتقى ىستەر ۆيسە-مينيسترى ب.باتسەسەگ، موڭعوليا پرەزيدەنتىنىڭ كەڭەسشىسى ت.تەگشجارگال باستاعان رەسمي وكىلدەر، موڭعوليانىڭ مادەنيەت ەلشىلەرى قاتىستى.

ايتا كەتەيىك، ۇلانباتىر قالاسىندا موڭعوليا مادەنيەت ەلشىلەرىنىڭ العاشقى فورۋمى باستالدى. القالى جيىندا القالى جيىندا موڭعوليانىڭ قازاقستانداعى مادەنيەت ەلشىسى، عالىم ا.تويشان ۇلى سوڭعى جىلدارى حالىقارالىق تۇركى اكادەمياسى مەن موڭعوليا اراسىنداعى عىلىمي-مادەني بايلانىستاردىڭ قارقىندى دامىعانى تۋرالى بايان ەتتى. موڭعوليا سىرتقى ىستەر ءمينيسترى ب.باتسەسەگ جيىنعا قاتىسۋشىلارعا تولاعاي تابىس تىلەپ، عالىم اقەدىل تويشانۇلىن موڭعوليا سىرتقى ىستەر ءمينيسترىنىڭ ارنايى سەرتيفيكاتىمەن ماراپاتتادى.