قازاقستان ىشكى ىستەر مينيسترلىگى قىلمىستىق-اتقارۋ جۇيەسى كوميتەتى (قاجك) ازاتتىققا مۇحتار جاكىشيەۆتىڭ ادۆوكاتى نۇرلان بەيسەكەيەۆتىڭ ءوتىنىش حاتىن العاندارىن راستادى. ادۆوكات جاكىشيەۆتىڭ ءحال ۇستىندە جاتقان ناۋقاس اناسىمەن كەزدەسۋىنە رۇقسات بەرۋىن سۇرايدى. كوميتەت وكىلى جاكىشيەۆ ادۆوكاتىنىڭ وتىنىشىنە قاتىستى جاۋاپ "سالدەن سوڭ بەرىلەتىنىن" ايتتى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. 

ءىىم مەن قاجك باسشىلىعىنا جىبەرگەن وتىنىشىندە ادۆوكات بەيسەكەيەۆ قىلمىستىق-اتقارۋ كودەكسىنىنىڭ 113-بابىنىڭ 1-تارماعىنا سىلتەمە جاسايدى. وعان سايكەس، "جازاسىن وتەۋشى جاقىن تۋىسىنىڭ قايتىس بولۋىنا نەمەسە ناۋقاستىڭ ءومiرiنە قاتەر ءتوندiرەتىندەي قاتتى اۋىرۋىنا بايلانىستى، بارۋ-قايتۋ جولىنا قاجەت (بەس ءتاۋلiكتەن اسپايتىن) ۋاقىتتى ەسەپتەمەگەندە، جەتi ءتاۋلiكتەن اسپايتىن مەرزiمگە تۇزەتۋ مەكەمەسىنەن شىعۋىنا" قۇقىعى بار.

ادۆوكات مينيسترلىك پەن كوميتەتتى مۇحتار جاكىشيەۆتى اناسىنىڭ جاعدايى جايلى حاباردار ەتۋدى جانە سەمەي قالاسىنداعى وۆ 156/14 تۇزەتۋ مەكەمەسىنىڭ باسشىلىعىن اتالعان باپتىڭ ورىندالۋىن قامتاماسىز ەتۋدى سۇرايدى.

مۇحتار جاكىشيەۆ 2009 جىلى مامىردا ۇستالعان سوڭ سىبايلاس جەمقورلىق قىلمىسىن جاسادى دەپ ايىپتالىپ، 14 جىلعا سوتتالعان. ول جازاسىن وتەۋگە الدىمەن الماتى وبلىسىنداعى زارەچنىي كەنتىندەگى تۇرمەگە جىبەرىلگەن، كەيىن قاراعاندى وبلىسىنىڭ دولينكا كەنتىندەگى قاتاڭ رەجيمدەگى اك-159/6 كولونياسىندا بولدى. 2015 جىلى تۋىستارى، ادۆوكاتى مەن قۇقىق قورعاۋشىلاردىڭ ءوتىنىشىنىڭ ارقاسىندا ول دولينكادان قايتا زارەچنىيعا جىبەرىلگەن. ءبىراق 2017 جىلى ۇقك-نىڭ بۇرىنعى ءتوراعاسى نارتاي دۇتبايەۆتىڭ ىسىنە قاتىستى تەرگەۋ ىسىنە قاتىسۋ ءۇشىن استانا قالاسىنىڭ يزولياتورىنا ەتاپپەن جىبەرىلگەن. تەرگەۋ ءىسى اياقتالعان سوڭ مامىر ايىندا دولينكاعا، ال شىلدە ايىنان بەرى سەمەي قالاسىنداعى قاتاڭ رەجيمدەگى كولونيادا جازاسىن وتەپ جاتىر.

55 جاستاعى مۇحتار جاكىشيەۆ ساياساتپەن اينالىسپاعانىمەن، 2013 جىلى قازاقستاندىق ءبىرقاتار قۇقىق قورعاۋ ۇيىمدارى ونى ساياسي تۇتقىن دەپ تانىعان.