تەمىرتاۋ قالاسىنداعى ۇلتتىق ۇلاننىڭ 5516 اسكەري ءبولىمىنىڭ اعا لەيتەنانتى د.بەكتىبايەۆ پەن اعا سەرجانت ك.بەردياروۆ كۇندىزگى 12:00-لەر شاماسىندا جول جيەگىندە كەلە جاتىپ، كومەك سۇراپ ايعايلاعان داۋىستى ەستيدى.

جان ۇشىرا شىققان جايسىز داۋىس كوشە بويىنداعى كافەلەردىڭ بىرىنەن شىققان بولاتىن. شۇعىل كومەككە كەلگەن اسكەريلەرگە كۋاگەرلەر كىسى ءولىمى ورىن العانىن ايتىپ، كۇدىكتى قاشىپ كەتكەن باعىتتى كورسەتەدى. ۇلاندىق ساربازدار وقيعا جەلىسىن سارالاي كەلىپ، كۇدىكتىنىڭ بازارعا قاراي بەت العانىن تەز ءتۇسىنىپ، سوڭىنا تۇسەدى. اعا  لەيتەنانت د.بەكتىبايەۆ قاشقىندى قۋىپ جەتىپ، جەكپە-جەك سايىسىنىڭ ءادىسىن قولدانا وتىرىپ، كۇدىكتىنى تىرپ ەتكىزبەي قۇرىقتايدى. كەيىننەن كافە قىزمەتكەرلەرىنىڭ شاقىرۋىمەن تەمىرتاۋ قالالىق ءىىب تەرگەۋ توبىنىڭ ماماندارى وقيعا ورنىنا كەلىپ، تۇتقىن قۇزىرلى ورگان وكىلدەرىنە تاپسىرىلدى.

ۇلتتىق ۇلان باسپا ءسوز قىزمەتى