كەشە كەشكىسىن ساعات 20:30 شاماسىندا استانا قالاسىنداعى ابىلاي حان كوشەسىنىڭ بويىندا قوعامدىق قاۋىپسىزدىكتى قاداعالاپ جۇرگەن ۇلتتىق ۇلاننىڭ 5573 اسكەري ءبولىمىنىڭ اسكەري جاساعى 9 قاباتتى تۇرعىن ءۇيدىڭ تەرەزەسىندە وتىرعان ەر ادامدى بايقايدى.

جاساق باستىعى قاتارداعى جاۋىنگەر ادىلەت نۇربايەۆ راسيا ارقىلى جەدەل بايلانىسقا شىعىپ، بيىكتەن قۇلاۋ ارقىلى وز-وزىنە قول سالماق بولعان كىسى جايلى اقپاراتتى كەزەكشى بولىمگە حابارلايدى. سودان سوڭ ۇلاندىق جاۋىنگەرلەر ادىلەت نۇربايەۆ پەن ايبەك الماحانوۆ جانە ناريمان احمەت دەرەۋ توعىزىنشى قاباتقا كوتەرىلگەندە تەرەزەدەن تومەن سەكىرۋگە ىڭعايلانىپ وتىرعان ەر ادامدى كورەدى.

ساربازدار وزدەرىنە سەنىمدى كەيىپتە ءارى ءابجىل ارەكەت ەتىپ، ازاماتتى اجال اۋزىنان قۇتقارىپ قالدى. كەيىننەن ول ءتيىستى سالا ماماندارىنىڭ ءوز دەڭگەيىندە جۇمىس جۇرگىزۋى ءۇشىن الماتى اۋداندىق ءىىب قىزمەتكەرلەرىنە تاپسىرىلدى.

ۇلتتىق ۇلان باسپا ءسوز قىزمەتى