قورعاستا وڭباي تاياق جەپ، جاعى سىنعان شەكاراشى توبەلەستى و باستا ءوزى باستاعان كورىنەدى. سىرتقى بەينەباقىلاۋ كامەراسىنا ەفرەيتور مەن ءتىلماش اراسىندا جانجال وتىنىڭ تۇتانعان ءساتى ءتۇسىپ قالعان دەپ حابارلايدى كتك تەلەارناسى.
ايىپتى رەتىندە قاماۋعا الىنعان ءازىلحان ءازىمحاننىڭ ادۆوكاتى مەن جاقىندارى ەندى ءىستىڭ اق-قاراسىن اجىراتۋدى تالاپ ەتىپ وتىر.
ەستەرىڭىزگە سالايىق، وتكەن اپتادا قورعاس شەكارا بەكەتىندە توبەلەس بولىپ، 25 جاستاعى ەفرەيتەر اۋرۋحاناعا جەتكىزىلگەن ەدى.
باسى جارىلىپ، جاعى سىنىپ، قانعا بوككەن شەكاراشى نۇرجان مولداشتىڭ ۆيدەوسى الەۋمەتتىك جەلىگە جابىرلەنۋشى رەتىندە تارالدى. جاۋىنگەرگە جۇدىرىق جۇمساعان ءازىلحان ءازىمحان ارتىنشا قاماۋعا الىندى. الايدا داۋدىڭ باسى كىمنەن باستالعانىن باقىلاۋ كامەراسىنداعى جازبا تايعا تاڭبا باسقانداي كورسەتەدى. ءاۋ باستا تىلماشپەن سوزگە كەلگەن ەفرەيتور ەرەگىستى ءوزى باستاپ، سوققىنى ءبىرىنشى بولىپ سىلتەگەن. قاباعى جارىلعاننان قانى باسىنا شاپقان ءازىلحاننىڭ قارىمتا جاساعان ءبىر سوققىسىنان ەفرەيتور سۇلاپ ءتۇسىپتى.
ابىر-سابىرداعى دابىراعا جۇرت ۇيمەلەپ جەتكەندە شەكاراشى ەسىنەن تانىپ جاتقان. نۇرجان مولداش دەرەۋ پانفيلوۆ اۋداندىق اۋرۋحاناسىنا جەتكىزىلدى. ءازىلحان ءازىمحاننىڭ ادۆوكاتى ەفرەيتوردىڭ ءوزى ەكىلەنىپ، ەرەگىسپەگەندە جاعداي وسىلايشا ۋشىقپاس ەدى دەيدى. قورعاستاعى قىرىلىس ءقازىر وبلىستىق ىشكى ىستەر باسقارماسىنىڭ باقىلاۋىندا. تەرگەۋ جالعاسىپ جاتىر. «بيلىك وكىلىنە كۇش كورسەتۋ» بابى بويىنشا ءىس قوزعالعان. باقىلاۋ كامەراسىنداعى جازبا ماي شاممەن قارالسا، جابىرلەنۋشى مەن ايىپتىنىڭ ورنى الماسۋى مۇمكىن بە دەگەن سۇراق كوپتىڭ كوكەيىندە تۇر.
